އިންޑިއާގައި، ކޯވިޑް19ގެ ފޭކް ވެކްސިންތައް ފޯރުކޮށްދޭ ސްކީމެއް ހިންގައިގެން 14 މީހަކު އެގައުމުގެ އޮތޯރިޓީތަކުން ހައްޔަރު ކޮށްފިއެވެ.
އިންޑިއާގެ އޮތޯރިޓީތަކުން މައުލުމާތު ދިފައިވާ ގޮތުގައި، މިމީހުން ހައްޔަރު ކުރިއިރު، މި ސްކީމުގެ ދަށުން 2،000 މީހަކަށް އިންޑިއާގެ މުމްބާއީގައި، ކޯވިޑް19ގެ ވެކްސިންގެ ނަމުގައި ލޮނުފެން ހިމެނޭ ވެކްސިން ވަނީ ދީފައެވެ.
ކޯވިޑް19ގެ ފޭކް ވެކްސިން ދެމުންދިޔަ މިމީހުން ހައްޔުރުމަށްފަހު، ފުލުހުންވަނީ، މިމީހުން އަތުން، 20،000 އެމެރިކާ ޑޮލަރުވެސް ހިފަހައްޓާފައެވެ. ހައްޔަރު ކުރި މީހުންގެ ތެރޭގައި ސިއްހީ ދާއިރާގައި މަސައްކަތްކުރާ މީހުންވެސް ހިމެއެވެ.
އިންޑިއާގެ ކަންޑިވަލި އަވަށުގައި ދިރިއުޅޭ މީހުން ބައެއް މީޑިއާތަކަށް މައުލޫމާތު ދީފައިވާ ގޮތުގައި، ފާއިތުވެދިޔަ މޭމަހު އެމީހުންވަނީ، އެސަރަހައްދުގައި ކުރިޔަށް ދިޔަ ވެކްސިން ކޭމްޕެއްގައި، އިންޑިއާއިން އުފައްދާފައިވާ ކޯވިޝީލްޑް ވެކްސިން ޖެހުމަށް ކޮންމެ މީހަކުވެސް 17 އެމެރިކާ ޑޮލަރު ދައްކާފައެވެ.
މި ވެކްސިން ކޭމްޕުން ވެކްސިން ޖެހުމަށްފަހު، ޖެހި މީހުންގެ މެދުގައި ޝައްކު އުފެދުނީ، ވެކްސިން ޖެހި އެއްވެސް މީހަކަށް، ވެކްސިން ޖެހުމަށްފަހު އާންމުކޮށް ފެންނަކަމަށް ބުނާ އެއްވެސް އަލާމާތެއް ފެނިގެން ގޮސްފައި ނުވުމުންނެވެ.
އިންޑިއާގެ ބޮންބޭގެ ހައިކޯޓުން މިހާރުވަނީ މިމައްސަލަ ބެލުމަށްޓަކާ މި ކޭސް މިހާރު ކޯޓުގައި ކުރިޔަށް ގެންދަން ފަށާފައެވެ.
ކޭސް ހުށަހަޅުއްވަމުން، ޕްބްލިކް ޕްރޮސެކިއުޓަރ ދީޕަކް ތަކާރޭ ވިދާޅުވެފައިވަނީ، "2،053 މީހުންނަށް ފޭކް ވެކްސިން" ދީފައިވާ ކަމަށާއި، ފުލުހުން އަދިވެސް ވެކްސިން ދިނުމުގައި ބައިވެރިވެފައިވާ މީހުން ހޯދުމުގެ މަސައްކަތް ކުރަމުންދާ ކަމުގައެވެ.
"ފޭކް ވެކްސިން ދިނުން އަދިވެސް އިތުރުވަމުން ދާދިއުމަކީ ހިތާމަހުރި ކަމެއް،" އިންޑިއާގެ ކޯޓުން ބުނެފައި ވެއެވެ.
މުޅި ދުނިޔޭގައިވެސް ކޯވިޑްގެ ހާލަތު އެންމެ ގޯސް އެއްގައުމު ކަމުގައިވާ އިންޑިއާގައި ކޯވިޑް ބަލީގައި 400،000 އަށްވުރެ ގިނަ މީހުންވަނީ މަރުވެފައެވެ.
އިންޑިއާގައި ކޯވިޑްގެ ހާލަތު އެންމެ ގޯސްވެގެން ދިޔައިރު، ފާއިތުވެދިޔަ މޭމަހު، ދުވާލަކަށް 400،000 އަށްވުރެ ގިނަ މީހުން މިބަލީގައި އޭރު ޕޮޒިޓިވް ވަމުންދިޔަ ނަމަވެސް، ޕޮޒިޓިވް ވާމީހުންގެ އަދަދު ފަހަކަށް އައިސްވަނީ ދަށްވާން ފަށާފައެވެ.
އިންޑިއާއިންވަނީ، ދުނިޔޭގެ އެހެން ގައުމުތަކަށްވުރެ ގިނައިން ކޯވިޑް ވެކްސިން މިހާތަނަށް އައިއިރު ދީފައެވެ. މިގޮތުން މިހާތަނަށް އެގައުމުގައި 290 މިލިއަން މީހުންނަށް ވަނީ ކޯވިޑް19 ވެކްސިން ދީފައެވެ.
ދުނިޔޭގައި ދެވަނައަށް އެންމެ ގިނަ އަދަކަށް ކޯވިޑް19 ވެކްސިން ދީފައިވަނީ އެމެރިކާއިންނެވެ. އެގައުމުގައި 182 މިލިއަން ޑޯޒްގެ ވެކްސިން ދީފައި ވެއެވެ.
