ބަހްރައިންގެ ސަލްމާނިޔާ މެޑިކަލް ކޮމްޕްލެކްސްގައި މަސައްކަތް ކުރާ ޑޮކްޓަރަކު، އެތަނުގައި ވިހެއި އެއްމާބަނޑު ދެ ކުއްޖަކު މަރުވެއްޖެކަމަށް ކަށަވަރުކޮށްދީފައިވަނިކޮށް ވަޅުމުގެ ތެރޭގައި އެ ކުދިން، އެވަގުތު މަރުނުވާ ކަން ޔަގީންވެއްޖެ އެވެ.
އެ މައްސަލާގައި މިހާރު އެ ޑޮކްޓަރު ވަނީ ސަސްޕެންޑްކޮށްފައެވެ. އެ ދެ ކުދިން ވިހާފައި ވަނީ އެ ހޮސްޕިޓަލްގައި މީގެ ހަފްތާއެއް ކުރިންނެވެ. މިހާރު އެކަން ވަރަށް ރަނގަޅަށް ހޮސްޕިޓަލުން ވަނީ ބަލަން ފަށާފައެވެ. އެ ކުދިންގެ ބައްޕަ ބުނެފައިވާގޮތުގައި، އެ ކުދިންނަކީ ދުވަސް ނުފުރާ ވިހެއި ކުދިންނެވެ. އަދި އެ ކުދިން މަރުވެއްޖެ ކަމަށް ނިންމައި އޭނާއާ ހަވާލުކުރީ ދަބަހަކަށް ލައިގެންނެވެ. ނަމަވެސް ދެ ކުދިންވެސް މަރުނުވާ ކަން ކަށަވަރުވެފައި ވަނީ ބިލާހް އަލް ގަދީމް ސަހަރާގައި އެ ކުދިން ވަޅުލުގެ ކަންކަން ކުރިއަށް ދަނިކޮށެވެ.
އެ ކުދިން ގޮވައިގެން ވަގުތުން އޭނާ ހަމަ އެ ހޮސްޕިޓާލަށް ދިޔައެވެ. ނަމަވެސް ފަހުން އެ ކުދިން ވަނީ މަރުވެފައެވެ. އެ ކުދިންގެ ބައްޕަ މީސް މީޑިއާގައި އާއްމު ކުރި ޑޮކިޔުމެންޓްގައި އޭނާއަށް އެ ކުދިންގެ ހަށިގަނޑު ލިބުނީ އޮކްޓޯބަރު 16 ވަނަ ދުވަހު އެވެ. އެއީ އެ ކުދިން ދުވަސް ނުފުރާ ވިހެއިތާ އެއް ދުވަސް ފަހެވެ. އެ ރިޕޯޓްގައި ބުނެފައިވާގޮތުގައި އެ ކުދިންގެ ބައްޕަ ހޮސްޕިޓަލަށް ދިޔުމުގެ ކުރިން އެއް ކުއްޖަކު ވަނީ މަރުވެފައެވެ. އަނެއް ކުއްޖާ މަރުވެފައި ވަނީ އެންއައިސީޔޫގައި ފަރުވަދެމުން ދަނިކޮށެވެ.
އެ ހޮސްޕިޓަލްގެ ޗީފް އޮފް މެޑިކަލް ސްޓާފް ނެރުނު ރިޕޯޓްގައި ބުނެފައިވާގޮތުގުން އެ އަންހެން މީހާ ހޮސްޕިޓަލަށް ގެނެސްފައި ވަނީ އޮކްޓޯބަރު 15 ވަނަ ދުވަހުގެ ރޭގަނޑު 8:00 ގައެވެ. އަދި އޭނާ ހޮސްޕިޓަލަށް ގެނައިއިރު، ބަނޑަށް 22 ހަފްތާ ކަމަށާއި، އޭނާގެ ހާލަތުވެސް ސީރިއަސް ކަމަށެވެ. މިހާރު މިކަން ހިނގާދިޔަ ގޮތް އެ ގައުމުގެ ސިއްހަތާއި ބެހޭ ވުޒާރާއިން ދަނީ ބަލަމުންނެވެ.
