އެމެރިކާގެ ރިޔާސީ އިންތިޚާބަށް އެންމެ ހަފްތާއަކަށް ވެފައިވާއިރު، އެމެރިކާއިން އުފައްދަމުން ގެންދާ ކޯވިޑް ވެކްސިން އެމްރިކާގެ ރައްޔިތުންނަށް ހިލޭ ލިބޭނެ ގަތް ހައްދަވާ ދެއްވާނެކަމަށް އެގައުމުގެ ކުރީގެ ނާއިބު ރައީސް، ޑިމޮކްރަޓިކް ޕާޓީގެ ރިޔާސީ ކެޑިޑޭޓް ޖޯ ބައިޑްން ވައުދުވެ ވަޑައިގެންފިއެވެ.
ބައިޑަން މިކަން އިއުލާން ކުރައްވާފައިވަނީ، ހުކުރު ދުވަހު އެމެރިކާގެ ވިލްމިންގޓަންގައި ބޭއްވުނު ކެމްޕެއިން އެއްވުމެއްގައި ވާހަކަ ދައްކަވަމުން، ކޯވިޑް19 އާއި ދެކޮޅަށް އެމަނިކްފާނު ގެންގުޅުއްވާނެ ސިޔާސަތުތައް ހާމަ ކުރައްވަމުންނެވެ.
މިގޮތުން، އެމެރިކާއިން މިހާތަނަށް ދެލައްކައަށްވުރެ ގިނަ މީހުން މަރުވެފައިވާ މިބައްޔާއި ދެކޮޅަށް ވެކްސިނެއް އާންމު ކުރެވުމާއިއެކު، ހެލްތު އިންސޫރަންސަކުން ސިއްހީ މައްސަލަތަކަށް ކަވަރޭޖެ ލިބިފައި ނުވާ ފަރާތްތަކަށްވެސް މިވެކްސިން ހިލޭ ލިބެން ޖެހޭނެކަމަށް ބައިޑަން ވަނީ ވިދާޅުވެފައެވެ. ބައިޑްން ވިދާޅުވެފައިވަނީ، އަންނަ ނޮވެމްބަރު މަހުގެ 3 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި އެމަނިކްފާނު އެމެރިކާގެ ރައީސްކަމަށް އިންތިޚާބު ވެވަޑައިގެންފި ނަމަ، ގަޑުކޮށް ވެކިސިންގެ ޑޯޒުތައް ގަތުމަށް އެގައުމުގެ ފެޑެރަލް ގަވަރމަންޓަށް އަމުރު ކުރައްވާނެއެވެ. ނަޖީތާއެއްގެ ގޮތުން އެއްވެސް އަގަކާއި ނުލާ އެމެރިކާގެ ހުރިހާ ރައްޔިތުންނަށް ވެކްސިން ފޯރުކޮށްދިނުމުގެ ގާބިލްކަން ސަރުކާރަށް ލިބިގެންދާނެ ކަމަށް ބައިޑްން ވިދާޅުވިއެވެ.
މި އެއްވުމުގައި ޖޯ ބައިޑަން ވަނީ ކޯވިޑް ކާރިސާއާއި ދެކޮޅަށް ހަގުރާމަ ކުރައްވާނެ މައިގަޑު ހަތަރު ދާއިރާއެއް ފާހަގަ ކުރައްވާފައެވެ. މިގޮތުން، ހިލޭ ވެކްސިން ފޯރު ކޮށްދިނުމުގެ އިތުރުން، އެގައުމުގެ ގަވަރުނަރުންނަށް ސްޓޭޓްތަކުގައި މާސްކް އެޅުން މަޖުބޫރުކުރުމަށް އެންގެވުމާއި، އަދި ކޯވިޑަށް ޓެސްޓް ކުރެވޭނެ ގައުމީ ނިޒާމެއް އެކުލަވާލުމުގެ އިތުރުން، ކޯވިޑުން ރައްކާތެރިކަމަށް ބޭނުންވާ ރައްކާތެރިވުމަށް ބޭނުންވާ ސާމާނު (ޕާސަނަލް ޕްރޮޓެކްޓިވް އިކުއިޕްމަންޓް) އިތުރަށް އުފެއްދުމާއި ލިބޭނެ އިންތިޒާމް ހަމަޖެއްސުން ހިމެނެއެވެ.
ވަރަށް އަވަހަށް ވެކްސިން އެމެރިކާގެ ރައްޔިތުންނަށް ލިބިގެންދާނެ ކަމަށް އެމެރިކާގެ ރައީސް ޓްރަމްޕް ވިދާޅުވަމުން ގެންދެވި ނަމަވެސް، މިވެކްސިން ރައްޔިތުންނަށް ލިބިގެން ދިއުމާއި ދޭތެރޭ އަދި މަސްތަކެއް ފާއިތުވެގެން ހިގައިދާނެ ކަމަށް ރައްޔިތުން ސަމާލުވެ ތިބުމަށް ބައިޑްން ވަނީ އެދިވަޑައިގެންފައެވެ. އަދި މި ކާރިސާގައި ޓްރަމްޕް ގެންގުޅުއްވި ސިޔާސަތުތަކަށް ވަނީ ވަރަށް ބޮޑަށް ފާޑު ވިދާޅުވެފައެވެ.
އެމެރިކާގެ ރިޔާސީ އިންތިޚާބަށް އެއްމެ އެގާރަ ދުވަހަށް ވެފައިވާއިރު، ދެޕާޓީގެ ކެޑިޑޭޓުންވެސް ގެންދަވަނީ ވަރުގަދައަށް ކެމްޕޭން ކުރައްވަމުންނެވެ. މި އިންތިޚާބުގައި އެމެރިކާގެ ރައްޔިތުންގެ މެދުގައި އެންމެ ބޮޑަށް ބަހުސްކުރެވެމުންދަނީ، އެގައުމުގެ އިގްތިސާދާއި، މިހާރު އެގައުމުގައި ހިގަމުންދާ ނަސްލީ ހަމަނުޖެހުންތަކުގެ އިތުރުން، މުޅި ދުނިޔެއަށް ކުރިމަތިވެފައިވާ ކޯވިޑް19 ކާރިސާގައި އެގައުމުގެ ސަރުކާރުން އަމަލު ކޮށްފައިވާ ގޮތާއި އަދި މިހާރު ސުޕްރީމް ކޯޓުން ހުސްވެފައިވާ ގޮނޑިއަށް ފަޑިޔާރަކު އައްޔަން ކުރުމާއި ގުޅޭގޮތުންނެވެ.
އެމެރިކާގައި މިހާރުވަނީ 8 މިލިޔަން މީހުން ކޯވިޑް-19 އަށް ޕޮޒިޓިވް ވެފައެވެ. އަދި މުޅި ދުނިޔޭގައިވެސް އެއްގައުމަކުން އެންމެ ގިނައަދަދަކަށް މީހުން މިބައްޔަށް ޕޮޒިޓިވްވެފައިވާ ގައުމަކީވެސް އެމެރިކާއެވެ. ދެން އެންމެ ގިނައިން ޕޮޒިޓިވް ވެފައި ވަނީ އިންޑިއާ އަދި ބްރެޒިލް އިންނެވެ. މިބަލީގައި އެމެރިކާގައި މިހާތަނަށް އައިއިރު 2 ލައްކައަށްވުރެ ގިނަ މީހުން ވަނީ މަރުވެފައެވެ..
ނޮވެމްބަރު 3 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގެ އެންމެ ފަހުގެ ޚިޔާލު ހޯދުންތަކުން ދައްކާގޮތުގައި މިއިންތިޚާބުގައި ކުރީގައ އުޅެނީ ޑިމޮކްރަޓިކް ޕާޓީގެ ކެޑިޑޭޓް ޖޯބައިޑްންއެވެ.
