އެމެރިކާގެ ކުރީގެ ޑިފެންސް ސެކެޓްރީ ޑޮނާލްދް ރަމްސްފެލްޑް އުމުރުން 88 އަހަރުގައި ނިޔާވެއްޖެ ކަމަށް، އޭނާގެ އާއިލާއިން ބުދަ ދުވަހު ނެރުނު ބަޔާނެއްގައި ހާމަ ކޮށްފިއެވެ.

A statement from the family of Donald Rumsfeld: pic.twitter.com/AlKYxVvqgF

— Donald Rumsfeld (@RumsfeldOffice) June 30, 2021

ޑޮނަލްޑް ރަމްސްފެލް، އެމެރިކާގެ ޑިފެންސް ސެކެޓްރީކަން ކުރެއްވީ ކުރީގެ ރައީސް ޖޯޖް ޑަބްލިއު ބުޝްގެ ވެރިކަމުގައެވެ. އަދި އޭރު އެމެރިކާއިން އިރާގަށް އަރާ އެގައުމުގެ ވެރިކަން ބަދަލުކުރުމަށް އޭނާ އިސްވެ ވަކާލާތު ކުރެއްވި ކުރެއްވުންތަކުގެ ސަބަބުން، އޭނާއަށް އެތައް ބައެއްގެ ފާޑުކިއުން އަމާޒު ވެފައި ވެއެވެ.

މީގެ އިތުރުން އެމެރިކާއިން އަފްއާނިސްތާނަށް އަރާ، އެގައުމުގައި ހަގުރާމަ ފެށިއިރުވެސް، އެމެރިކާގެ ދިފާއީ މަރުކަޒު ޕެންޓަގަންގެ ހިންގެވުމާ ހަވާލުވެ ހުންނެވީ ޑިނަލްޑް ރަމްސްފެލްޑެވެ. ރައީސް ޖޯޖް ޑަބްލިއު ބުޝް ޑިފެންސް ސެކެޓްރީކަމުން އޭނާ ވަކި ކުރެއްވީ އޭގެ 3 އަހަރު ފަހުން، އެމެރިކާގެ މިޑްޓާރމް އިންތިޚާބުގައި ރިޕަބްލިކަން ޕާޓީއަށް ލިބިގެންދިޔަ ބޮޑު ނާކާމިޔާބީއަށް ފަހުއެވެ.

ރަމްސްފެލްޑް ނިޔާވުމާ ގުޅިގެން ކުރީގެ ރައީސް ބުޝްވަނީ ބަޔާނެއް ނެރުއްވާފައެވެ. މި ބަޔާނުގައި ޑޮނަލްޑް ރަމްސްފެލްޑް ނިޔާވުމުގެ ހިތާމަ ފާޅުކުރައްވާ އަދި އޭނާއަށް ބުޝް ވަރަށް ބޮޑަށް ތައުރީފްވެސް ކުރައްވާފައި ވެއެވެ.

"އޭނާގެ މުޅި ހަޔާތުގައިވެސް، އޭނާއަކީ، ވަރަށް ހިންހެޔޮ މީހެއް. އަދި އޭނާއަކީ އެހެން ހުރިހާ ކަމެއްގެ މައްޗަށް އޭނާގެ އާއިލާ އިސްކުރި މީހެއް،" ކުރީގެ ރައީސްގެ ބަޔާނުގައި ވިދާޅުވެފައި ވެއެވެ. "އަގު ހުރި ޚިދުމަތްތެރިއެއް، އަދި ހެޔޮލަފާ މީހަކު ވަކިވެ ދިއުމުގެ ހިތާމަ ކުރަން."