އޮސްރާއީލުގެ ބޮޑުވަޒީރު ބެނެޓް ނަފްތާލީ އެމެރިކާއަށް ކުރައްވަން ހަމަޖެހިފަ އޮތް ރަސްމީ ދަތުރުފުޅުގެ ކުރިން، އެގައުމުގެ ރައީސް މިހާރު އެމެރިކާއަށް ކުރައްވަމުން ގެންދަވާ ދަތުރު ފުޅުގައި، އިރާނަށް ނިއުލިއަރ ހަތިޔާރާ ހަމައަށް ދަތުރުކުރުމުގެ ފުރުސަތު ނުދެއްވާނެކަމުގެ ޔަގީންކަން އޭނާއަށް އެމެރިކާގެ ރައީސް ޖޯ ބައިޑްން ދެއްވައިފިއެވެ.
"އަހަރެންގެ ރިޔާސަތުގައި އިރާނަށް ނިއުކުލިއަރ ހަތިޔާރާ ހަމައަށް ދަތުރު ވިޔަކަ ނުދޭނަން،" ބައިޑްން އިސްރާއީލުގެ ރައީސް ރިއުވެން ރިވްލިން އާއި ބައްދަލު ކުރައްވަމުން ވިދާޅުވެފައި ވެއެވެ.
އިރާގު އަދި ސީރިއާގައި ހަރަކާތްތެރިވާ ހަގުރާމަވެރިންނަށް އަމާޒުކޮށް ވައިގެ ހަމަލާ ދިނުމަށް ބައިޑްން އަމުރު ކުރައްވާފައިވަނީ، ކޮންގްރެސްގެ ހުއްދައާ ނުލާ ކަމަށް އެމެރިކާގެ ގާނޫނުހަދާ މަޖިލިހުގެ ބައެއް މެމްބަރުން ވިދާޅުވަމުން ގެންދަވާ ވާހަކަތަކަށްވެސް ބައިޑްން ވަނީ މި ބައްދަވުމުގައި ރައްދު ދެއްވާފައެވެ.
"އެއީ އަހަރެންނަށް ލިބިގެންވާ ބާރެއް،" ބައިޑްން ވިދާޅުވެފައި ވެއެވެ.
އެމެރިކާއާއި އިސްރާއީލާއި ދެމެދު އޮތް ޒަމާންވޯ ގާތް ގުޅުމަށް، މިއަހަރުގެ ޖެނުއަރީމަހު، ޑޮނަލްޑް ޓްރަމްޕް ބަލިކޮށް ބައިޑްން ރިޔާސީ އިންތިޚާބު ކާމިޔާބު ކުރެއްވުމުން، ވަނީ އުދާސްތަކާއި ކުރިމަތި ލާންޖެހިފައެވެ.
އެހެންނަމަވެސް، ނަތަންޔާހޫގެ ސަރުކާރު ބަދަލު، އިސްރާއީލުގެ އާ ބޮޑުވަޒީރު ނަފްތާލީ ބެނެޓް އިސްރާއީލުގެ ބޮޑުވަޒީރުކަމާ ހަވާލުވެވެ ވަޑައިގަތުމާއެކު، އެމެރިކާ އިސްރާއީލުގެ ގުޅުން އަލުން ބަދަހުވުމަށް މިހާރުވަނީ އާ ދޮރުތަކެއް ހުޅުވިފައެވެ. އިސްރާއީލުގެ ބޮޑުވަޒީރު ނަފްތާލީ ބެނެޓް ވަރަށް އަވަހަށް ރަސްމީ ދަތުރުފުޅެއްގައި އެމެރިކާއަށް ވަޑައިގަތުމަށް ވަނީ ހަމަޖެހިފައެވެ.
ވައިޓް ހައުސްގެ ތަރުޖަމާން ޖެން ސާކި ވިދާޅުވެފައިވަނީ، ބައިޑްންއާއި ރިވްލިންގެ ބައްދަލު ކުރެއްވުމުގައި ސަލާމަތީ ދާއިރާއިން ދެގައުމުގެ ގުޅުން ބަދަހި ކުުރުމަށް ވަނީ މަޝްވަރާ ކުރެވިފައެވެ.
ސާކީ އިތުރަށް ވިދާޅުވެފައިވަނީ، ބެނެޓް އެމެރިކާއަށް ވަޑައިގަންނަވާނޭ ދުވަހެއް އަދި ޔަގީން ކުރެވިފައި ނުވި ނަމަވެސް، ބައިޑްން އުއްމީދު ކުރައްވަނީ ވަރަށް އަވަހަށް ބެނެޓް އެމެރިކާއަށް ވަޑައިގަންނަވާނެ ކަމަށް ކަމަށެވެ.
ކޮމެންޓު ފޮނުވާ