އިނގިރޭސި ޕްރިމިއަރ ލީގުގައި މިރޭ މެންޗެސްޓަރ ސިޓީން ލަނޑެއް ޖަހައި ލީޑް ނަގާފައި ވަނިކޮށް ފަހަތުން އަރައި އެއްވަރުކޮށް ލީޑްސް ޔުނައިޓެޑުން މުހިއްމު ޕޮއިންޓެއް ހޯދައިފިއެވެ.
ލީޑްސްގެ ދަނޑުގައި ކުޅުނު މިމެޗުގެ ފުރަތަމަ 30 މިނެޓުގައި މެޗް ކޮންޓްރޯލްކޮށް ކުޅެމުންގޮސް މެންޗެސްޓަރ ސިޓީން ލީޑް ނެގީ މެޗުގެ 17 ވަނަ މިނެޓުގައި ރަހީމް ސްޓަރލިންއެވެ.
މެންޗެސްޓަރ ސިޓީން ލީޑް ނެގުމާއެކު ލީޑްސްއިން ކުޅުން ރަނގަޅުކޮށް ހަމަލާތައް އުފައްދަން މަސައްކަތް ކުރިއެވެ. ލީޑްސްއިން ނަތީޖާ ހަމަހަމަ ކުރީ މެޗުގެ 56 ވަނަ މިނެޓުގައި ސްޕެއިންގެ ޤައުމީ ޓީމުގެ ފޯވާޑް ރޮޑްރިގޯ މޮރޭނޯއެވެ. މިއީ 9 އަހަރު ފަހުން ރޮޑްރިގޯ އިނގިރޭސި ލީގުގައި ލަނޑެއް ކާމިޔާބު ކުރި ފުރަތަމަފަހަރެވެ.
ތިން ގައުމެއްގެ ލީގު 8 ފަހަރަށް ހޯދާފައިވާ ގާޑިއޯލާ ބުނެފައި ވަނީ ކޯޗެއްގެ ކާމިޔާބީ މިނެކިރާނީ ހަމައެކަނި ހޯދާ ތަށީގެ އަދަދުން ނޫން ކަމަށާއި، ލީޑްސްގެ ކޯޗް ބީލްސާއަށް ގިނަ ތަށިތަކެއް ނުލިބި އޮތް ނަމަވެސް، އަދިވެސް އޭނާއަށްވުރެ ފުޓުބޯޅައިގެ މައުލޫމާތުން މާ ބޮޑަށްވެސް ދަށް ކަމަށެވެ. ގާޑިއޯލާ ވަނީ ބީލްސާގެ ލީޑްސްއިން ކުޅޭ އެޓޭކިން ފުޓުބޯޅައަށް ތައުރީފު ކޮށްފައެވެ.
"މީހެއްގެ ގޮތުގައާއި ކޯޗެއްގެ ގޮތުގައިވެސް އަހަރެން އެންމެ ބޮޑަށް އިހުތިރާމް ކުރާ، އެންމެ ބޮޑަށް ތައުރީފު ކުރާ މީހަކީ ބީލްސާ. އެއީ ބީލްސާއަކީ އެންމެ ތަފާތު، އެންމެ އިތުބާރުހުރި ގޮތްތަކަށް ޓީމު ބައްޓަން ކުރާ ކޯޗު. އެއްވެސް މީހަކަށް ބިލްސާއަކަށް ނުވެވޭނެ. އެއީ އޭނާ ދަނޑު ބޭރުންނާއި މީޑިއާގައި ފެންނަ ގޮތް ވަރަށް ބޮޑަށް ތަފާތު" ގާޑިއޯލާ ބުނެފައި ވެއެވެ.
ޕްރިމިއަރ ލީގުގައި މިސީޒަނުގައި މިހާތަނަށް ސިޓީން 3 މެޗް ކުޅުނުއިރު މޮޅުވެވިފައި ވަނީ އެއްމެޗުންނެވެ. އަދި އެއްމެޗުން ވަނީ ބަލިވެފައެވެ. ލީޑްސްއިން މިހާތަނަށް 4 މެޗް ކުޅެފައިވާއިރު ބަލިވެފައި ވަނީ ފުރަތަމަ މެޗުގައި އެންމެފަހުގެ ޗެމްޕިއަން ލިވަޕޫލް އަތުން އެކަންޏެވެ. ލީގުގައި ލީސްޑްސް އޮތީ 7 ޕޮއިންޓާއެކު 5 ވަނައިގައެވެ.
