ސްރީ ލަންކާގެ އޭޝިއަން އެކަޑަމީ އޮފް އެއިރޯނޯޓިކްސްގެ ދަށުން އައްޑޫ ސިޓީގައި ހިންގާ ފްލައިން ސުކޫލު، ރާއްޖޭގެ އެވިޑް ކޮލެޖުން ގަނެ އެތަން ހިންގުމާއި ހަވާލުވެއްޖެއެވެ.
ރާއްޖޭގައި މަތީ ތަޢުލީމްގެ ކޯސްތައް ހިންގަމުން އަންނަ އެވިޓް ކޮލެޖުން އައްޑޫ ފްލައިން ސްކޫލް ގަނެ އެތަން ހިންގުމާއި ހަވާލުވެފައިމިވަނީ، އެތަނުގައި ހުރި ގިނަ މައްސަލަތަކެއް ފެންމަތިވެ، އެތަން އެގޮތުގައި ކުރިއަށް ނުގެންދެވޭނެކަން ސަރުކާރުން އެކުންފުންޏަށް އަންގާ އިންޒާރު ދީފައިވަނިކޮށެވެ. ތަކުރާރުކޮށް ރަނގަޅުކުރުމަށް އެންގި ކަންކަން ރަނގަޅުނުކޮށް އޮންނަތާ އެތައް ދުވަހެއް ފާއިތުވުމަށްފަހު، އެ ސްކޫލް އެވިޑް ކޮލެޖަށް ވިއްކާލާ އެތަނުގެ އެއްބަސްވުމުގައި ވަނީ މިއަދު ސޮއިކޮށްފައެވެ.
އެގޮތުން އައްޑޫގައި މިއަދު ބޭއްވި ރަސްމިއްޔާތެއްގައި އެވިޑް ކޮލެޖުގެ ފަރާތުން އެއްބަސްވުމުގައި ސޮއިކުރެއްވީ އެ ކޮލެޖުގެ ޗެއާމަން އަބްދުﷲ މުސްތާގް ރަޝާދެވެ. އަދި އޭއޭއޭ އިން ސޮއިކުރެއްވީ އެތަނުގެ ޖެނެރަލް މެނޭޖަރު މުހައްމަދު ފަޒީލް ރަޝީދެވެ. މި އެއްބަސްވުމާއެކު އައްޑޫ ފްލައިން ސްކޫލް އެވިޑު ކޮލެޖުން ހިންގާނީ "އެވިޑް ސްކޫލް އޮފް އޭވިއޭޝަން" (އަސާ) ގެ ނަމުގައެވެ.
ފްލައިން ސްކޫލްގައި ކިޔަވަމުން ދާ ކުދިން، އެކުދިންގެ ކިޔެވުން ނުނިމި ދިގުލައިގެން ދާ މައްސަލާގައި މީގެކުރިން 86 ދަރިވަރަކު ވަނީ ސަރުކާރުގެ ކަމާ ބެހޭ ފަރާތްތަކަށް ޕެޓިޝަނެއްވެސް ހުށަހަޅާފައެވެ. އެހެންނަމަވެސް މި ޕެޓިޝަން ހުށަހެޅުމާއި ގުޅިގެން މީގެތެރެއިން ބައެއް ދަރިވަރުން، އެކި ސަބަބުތައް މެދުވެރިކުރުވާ މި ފްލައިން ސްކޫލުން ވަނީ ވަކި ކޮށްފައެވެ.
މިމަހުގެ 11 ވަނަ ދުވަހު ރައިސް ސޯލިހުވަނީ އެކުދިންނަށް ކިޔެވުމުގައި ކުރިމަތިވެފައިވާ ދަތިތައް ހައްލުކުރުމަށްޓަކާ ބޭންކު އޮފް މޯލްޑިވްސިން ލޯނު ހަމަޖައްސަވާ ދެއްވާނެ ކަމަށް ވިދާޅުވެފައެވެ. އަދި އެސްކޫލުގެ މައްސަލަތަކާ ގުޅޭގޮތުން ސިވިލް އޭވިއޭޝަން އޮތޯރިޓީއިން ކޮށްފައިވާ އޯޑިގައި ފާހަގަ ކޮށްފައި ހުރި މައްސަލަތައް ހައްލު ކޮށްދޭނެކަމަށްވެސް ސަރުކާރުންވަނީ މީގެކުރިން ބުނެފައެވެ.
އަދި ފްލައިން ސްކޫލުގެ މައްސަލަ ހައްލުނުވެ ދިގުލައިގެން ދިއުމުގައި އޮތީ ކޮންބައެއްގެ އިހުމާލެއްތޯ ބެލުމަށް މިނިވަން އޮޑިޓެއް ހެދުމަށްވެސް ނިންމާފައިވާ ކަމަށްވެސް ކުރިން ރައީސް ވަނީ ވިދާޅުވެފައެވެ. އެހެންނަމަވެސް މި އޯޑިޓްގެ މަސައްކަތް ގޮސްފައިވާ ހިސާބެއް އަދި ސަރުކާރުން ހާމަކޮށްފައެއް ނުވެއެވެ.
އައްޑު ފްލައިން ސްކޫލުގެ މައްސަލަ ހައްލު ނުވެ އެތަނުގެ ވެރިންގެ ލައިސަންސްވެސް ބާޠިލްކޮށްފައިވެއެވެ. އަދި އިތުރު ފްލައިން ސްކޫލެއް ހިންގުމަށް ހުޅުވާލާފައިވެއެވެ. އެގޮތުން ރާއްޖޭގައި ފްލައިން ސްކޫލް ހިންގުމަށް 13 ފަރާތަކުން ޝައުގުވެރިކަން ފާޅުކޮށްފައިވާކަމަށް އައިލެންޑް އޭވިއޭޝަނުން ބުނެފައިވެއެވެ.
އައިލެންޑް އޭވިއޭޝަނުން ބުނީ، ރާއްޖޭގައި ފްލައިން ސްކޫލެއް ހިންގުމަށް ޝައުގުވެރިކަން ފާޅުކޮށްފައިވަނީ މިހާރުވެސް ފްލައިން ސްކޫލުތައް ހިންގައި ފަރާތްތަކަކުންކަމަށެވެ. އޭގެ ތެރޭގައި އެމެރިކާއާއި، މެދު އިރުމައްޗާ، ޔޫރަޕްގެ ޤައުމުތަކުގެ އިތުރުން ރާއްޖޭގެ ކުންފުންޏެއްވެސް ހިމެނެއެވެ. އަދި އައިލެންޑް އޭވިއޭޝަނުން ވިދާޅުވީ އެ 13 ކުންފުނި އިވެލުއޭޓް ކުރަމުންދާ ކަމަށެވެ.
