އަހުލީ ހަގުރާމަތަކުގައި ވީރާނެފައިވާ އަފްއާނިސްތާނަށް ސުލްހަ ގެނައުމަށާއި، އަދި އެގައުމުން ހައްދު ފަހަނައަޅާދިއުން ނެތިކޮށްލުމަށް އެމެރިކާއިން 20 އަހަރުވަންދެން ކުރަމުން އައި މަސައްކަތްތައް ފެއިލް ވެފައިވާ ކަމަށް އެގައުމުގެ ކުރީގެ ރައީސް ހާމިދު ކަރުޒާއީ ވިދާޅު ވެއްޖެއެވެ.
20 އަހަރަށްފަހު، އެންމެ ފަހަކާ ޖެހެންދެން އަފްޢާނިސްތާނުގައި ތިބި އެމެރިކާ އަދި ނޭޓޯގެ ސިފައިން އެގައުމުން ފައިބައިގެން ދިއުމަށް މަދު ހަފްތާތަކަކަށް ވެފައި ވަނިކޮށް، މިހަފްތަގެ އާދީއްތަ ދުވަހު އެސޯޝިއޭޓް ޕްރެސްއަށް ދެއްވި އިންޓަވިއުއެއްގައި ކަރުޒާއީ ވިދާޅުވީ، އެގައުމުން ފައިބައިގެންދާ ސިފައިން ފަހަތަށް ދޫކޮށްފައި އެދަނީ ބޮޑުވެގެންވާ ކާރިސާއެއް ކަމުގައެވެ.
"މީގެ 20 އަހަރު ކުރިން ބައިނަލްއަގުވާމީ ފައުޖުތަކުން އަފްޢާނިސްތާނަށް އައީ، މި ގައުމުން ހައްދު ފަހަނައަޅާދިއުން ނައްތާލުމަށާއި، އަދި މިގައުމަށް ހަމަޖެހުން ގެނެސްދިނުމުގެ ސާފު އަމާޒުތަކާއެކު… އެހެންނަމަވެސް، މިއަދު އަފްއާނިސްތާނުގައި ހައްދު ފަހަނައަޅާދިއުން ވަނީ އޭގެ އެންމެ މަތީގައި، އެހެންވީމާ އެމީހުން އެވަނީ ފޭއިލް ވެފަ،" ކަރުޒާއީ ވިދާޅުވިއެވެ.
އޭނާ ވިދާޅުވި ގޮތުގައި އެމެރިކާގެ ސިފައިން ދޫކޮށްފައި ދާ ލެގަސީއަކީ، ހަގުރާމައި ސުންނާފަތި ވެފައިވާ ގައުމެއް، ބޮޑު ކާއިސާއެއްގެ ތެރެއަށް ދޫކޮށްފައި ދިއުން ކަމަށެވެ.
"އަފްއާނިސްތާންގެ ރައްޔިތުންގެ ހައިސިއްޔަތުން އަހަރެމެން ނާކާމިޔާބީތައް އަހަރެމެން ގަބޫލުކުރަން، އެހެންނަމަވެސް، ކޮބާ އެއަށްވުރެ ބޮޑެތި ބާރުތައް، ފައުޖުތައް، އެމީހުން މިތަނަށް އައި ހަގީގީ ސަބަބަކީ ކޮބާ؟ އެމީހުން އެދަނީ އަހަރެމެން ކޮންތާކަށް ދޫކޮށްލާފައި؟" މި ސުވާލުތައް ކުރިމަތި ކުރުވުމަށްފަހު، ސުވާލުތަކުގެ ޖަވާބުވެސް ކަރުޒާއީ ދެއްވިއެވެ. "އަހަރެމެންގެ އަބުރު ވެއްޔާއި މޮޑެލާފައި، އަދި ކާރިސާއެއްގެ ތެރެއަށް އަހަރެމެން ދޫކޮށްލަފަ."
އެހެންނަމަވެސް، އޭނާގެ 13 އަަހަރުގެ ރައީސްކަމުގައި، އެމެރިކާއާއެކީ ނުތަނަވަސް ގުޅުމެއް އޮތް ކަރިޒާއީ ބޭނުންވަނީ، ބޭރުގެ ބާރުތަކުން އަފްޢާނިސްތާން ދޫކޮށް ދާށެވެ. އަދި ވިދާޅުވީ، ސުލްހައިގެ ބޭނުމުގައި އަފްއާނިސްތާނުގެ ރައްޔިތުން ތިބީ އެކަތިގަޑެއްގެ ގޮތުގައި ކަމަށެވެ. އަދި ވިދާޅުވީ އެފްއާނިސްތާން ރައްޔިތުން ބޭނުންވަނީ، އެމީހުން އަމިއްލައަށް އެމީހުންގެ މުސްތަގުބަލް އަރާސްތުކުރަން ކަމުގައެވެ.
"އެމީހުންގެ އަސްކަރިއްޔާ މިތާގައި ނެތްނަމަ އަހަރެމެންގެ ހާލަތު މާރަގަޅުވާނެ،" އޭނާ ވިދާޅުވިއެވެ.
"އަހަރެންގަބޫލު ކުރާގޮތުގައި، އަހަރެމެން އަހަރެމެންގެ ގައުމު ހިމާޔަތް ކުރަންވާނެ، އަދި އަހަރެމެން އަހަރެމެންގެ ރައްޔިތުން ބަލަހައްޓަންވާނެ.. އެހީމުން ތިގެން އަހަރެމެންނަށް އަހަރެމެންނަށް ލިބެންވީ މިންވަރު މިވަނީ ލިބިފަ. އެމީހުން އަފްއާނިސްތާން ދޫކޮށް ހިގައްޖެނަމަ، އަފްއާނިސްތާނުގެ ހާލަތު މާ ރަގަޅުވާނެ."
