ހައްޖު ވުމަށްޓަކާ މިފަހަރު ހައްޖަށްދާ ފަރާތްތަކަށް، ހަރަންފުޅުގެ އެކިހިސާބުތަކުގައި، ފެން ފޯރުކޮށްދިނުމަށް ރޮބޯޓުތައް ތައްޔާރު ކުރުމުގެ ގޮތުން، މި ރޮބޯޓްތައް ބޭނުން ކޮށްގެން ހަރަމްފުޅުގައި ޒަމްޒަމް ފެން ފޯރުކޮށްދޭން ފަށައިފިއެވެ.
މި ހައްޖުމޫސުމުގައި، ހަރަމްފުޅުގައި ފެން ފޯރުކޮށްދިނުމަށް ރޮބޮޓްތަކުގެ ބޭނުން ކުރުމަށް ހަމަޖެހިފައިވަނީ، ދުނިޔެއަށް ފެތުރެމުންދާ ކޯވިޑް19ގެ ނުރައްކަލުން ސަލާމަތްވުމަށް ވިހާވެސް ބޮޑަށް ގައިދުރުކަން ބެހެއްޓޭގޮތަށް އިންތިޒާމްތައް ހަމަޖެއްސުމުގެ ގޮތުންނެވެ.
ސައުދީ އަރަބިއާއިން ނިންމާފައިވަނީ، މިއަހަރު ހައްޖަށް ދިއުމުގެ ފުރުސަތު 60،000 މީހުންނަށް ދިނުމަށެވެ. އެހެންނަމަވެސް، މިއީ އާންމު ގޮތެއްގައި ހައްޖަށް ދާމީހުންނާ އަޅާބަލައިރު ވަރަށް މަދު އަދަދެއް ނަމަވެސް، މި އަދަދަކީ ފާއިތުވެދިޔަ އަހަރު ހައްޖަށްދާން ފުރުސަތުދިން މީހުންނަށްވުރެ ގިނަ އަދަދެކެވެ.
ކޯވިޑް19 އައުމުގެ ކުރިން، 2019 ވަނަ އަހަރު ދުނިޔޭގެ އެކި ކަންކޮޅުތަކުން 2.5 މިލިއަނަށްވުރެ ގިނަމީހުން މައްކާއަށް ހައްޖަށް ގޮސްފައި ވެއެވެ.
އޮފިޝަލުން އުއްމީދު ކުރަނީ، ތިން ބަރިއަކަށް ފެންފުޅިތައް ބެހެއްޓޭގޮތަށް، ކަޅާ ހުދުން ޑިޒައިން ކޮށްފައިވާ މި ރޮބޮޓްތަކުން ކޯވިޑް19 ފެތުރިގެން ދިއުން ކޮންޓްރޯލް ކުރެވިގެން ދާނެ ކަމަށެވެ. އަދި މިރޮބޮޓްތަކުން ޚިދުމަތް ލިބިގަންނަން ނޭގިގެން އުޅެފައިވަނީ، މަދު ބަޔަކު ކަމުގައިވެސް އޮފިޝަލުން ބުނެފައި ވެއެވެ.
"މި ރޮބޮޓްތަކުގެ ބޭނުމަކީ، މީހުން ގައިގޯޅިނުވެ، މީހުންނަށް ބޭނުންވާ ޚިދުމަތްތައް ފޯރުކޮށްދިނުން،" މައްކާގެ ގެފުޅުގެ ކައީރީގައިވާ ޒަމްޒަމް ވަޅުން ފެން ފޯރުކޮށް ދިނުމުގެ ކަންކަމާ ހަވާލުވެ ހުންނެވި ބަދުރު އަލް-ލުޤުމާނީ ވިދާޅުވިއެވެ.
"ޒިޔާރަތް ކުރާ މީހުންނަށާއި އަދި ހައްޖާޖީން އެހީތެރި ވެދިނުމަށް ޖުމްލަ 20 ރޮބޮޓު ހަރަކާތްތެރި ވަމުންދާނެ،" ލުޤުމާން ވިދާޅުވިއެވެ. އަދި ވިދާޅުވި ގޮތުގައި ބޭނުން ވެއްޖެ ހާލަތުގައި އިތުރު ރޮބޮޓްތައް ގެނެވޭނެ ކަމުގައެވެ.
ކޮންމެ އަހަރުކެވެސް ހައްޖު މޫސުމްގައި ޒަމްޒަމް ފެނުގެ އެތައްލައްކަ ފެންފުޅި ބަހާލެވެއެވެ.
މިއަހަރުގެ ހައްޖަކީ، ކަޑައެޅިފައިވާ މަދު އަދަދެއްގެ މީހުންނަށް ހައްޖުވުމުގެ ފުރުސަތު ދެވޭ ދެވަނަ ހައްޖު މޫސުމެވެ. އަދި މިއަހަރު ހައްޖަށް ދިއުމުގެ ފުރުސަތު ދެވެނީ، ސައުދީ އަރަބިއާގައި ދިރިއުޅޭ މީހުންގެ ތެރެއިންވެސް ވެކްސިން ޖަހާފައިވާ މީހުންނަށް އެކަންޏެވެ.
