ފިރިހެން ބެލެނެ ވެރިޔަކާ (މަހުރަމަކާ) ނުލާ، އަންހެން ބައިވެރިޔަކާ އެކީ، ހައްޖަށްދާން އަންހެންބޭފުޅުންނަށް ރަޖިސްޓްރީ ކުރެވޭގޮތަށް ހަމަޖައްސާފައި ވާހަކަށް، ސައުދީ އަރަބިއާގެ މިނިސްޓްރީ އޮފް ހައްޖުއިން އާދީއްތަ ދުވަހު އިއުލާން ކޮށްފިއެވެ.
"ހައްޖަށް ދާން ބޭނުންވާ ފަރާތްތަކުން ރަޖިސްޓްރީ ވާންޖެހޭނީ އަމިއްލައަށް. އަންހެން ބޭފުޅުންނަށް މަހުރަމަކާ (ފިރިހެން ބެލެނެވެރިޔަކާ) ނުލާ އެހެންނަމަވެސް އިތުރު އަންހެން ބައިވެރިޔަކާ އެކީ ހައްޖަށް ދާން ރަޖިސްޓްރީ ކުރެވޭނެ،" މިނިސްޓްރީން އާންމު ކޮށްފައިވާ މައުލޫމާތުގައި ބަޔާން ކޮށްފައި ވެއެވެ.
ސައުދީ އަރަބިއާގެ މިނިސްޓްރީ އޮފް ހައްޖު އެންޑް އުމްރާއިން މި ހަފްތާގެ ހޮނިހިރު ދުވަހު އިއުލާން ކޮށްފައިވާ ގޮތުގައި، މިއަހަރު ހައްޖަށް ދާން ފުރުސަތު ދެވޭނީ، ސައުދީ އަރަބިޔާގައި ދިރިއުޅޭ އެގައުމުގެ ރައްޔިތުންނާއި އަދި އެގައުމުގައި ދިރިއުޅޭ އެހެން ގައުމުތަކުގެ ރައްޔިތުންގެ ތެރެއިން 60 ހާސް މީހަކަށެވެ.
Requirements and procedure of registration for #Hajj2021 via the electronic portal for domestic pilgrims. https://t.co/gdLeLpzKf8 pic.twitter.com/U3r11sKwct
— Ministry of Hajj and Umrah (@MoHU_En) June 13, 2021
"މުޅި ދުނިޔެ ތަޖުރިބާ ކުރަމުންދާ، އަދި ކޮރޯނާ ވައިރަހާ ގުޅޭގޮތުން އަލަށް ލިބެމުންދާ މައުލޫމާތުތަކުގެ މައްޗަށް ބިނާކޮށް، އަދި ފެންނަމުންދާ މުޅިން އާ މިއުޓޭޝަންތަކުގެ ސަބަބުން، މިއަހަރު ހައްޖަށް ދާން ރެޖިސްޓަރ ވުމުގެ ފުރުސަތު ދެވޭނީ، ސައުދީ އަރަބިއާގައި ދިރިއުޅޭ ސައުދީގެ ރައްޔިތުންނަށާއި އަދި ސައުދީ އަރަބިއާގައި ދިރިއުޅޭ އެހެނިގެން ގައުމުތަކުގެ ރައްޔިތުންނަށް އެކަނި،" މިނިސްޓްރީން ބުނެފައި ވެއެވެ.
މިގޮތުން މިއަހަރު ހައްޖަށް ދާން ރެޖިސްޓަރ ވުމުގެ ފުރުސަތު ދިނުމަށް ހަމަޖެހިފައިވަނީ، އުމުރުން 18 އަހަރާއި 65 އަހަރާ ދެމެދުގެ، ވެކްސިންގެ ދެޑޯޒް ފުރިހަމަ ކޮށްފައިވާ ފަރާތްތަކަށާއި، ހައްޖަށް ދިއުމުގެ މަދުވެގެން 14 ދުވަސް ކުރިން ވެކްސިްނގެ ފުރަތަމަ ޑޯޒް ޖަހާފައިވާ ފަރާތްތަކަށާއި، ވެކްސިން ޖަހާ އަދި ކޯވިޑް19އިން ރަގަޅު ވެފައިވާ ފަރާތްތަކަށެވެ.
ހައްޖަށް ދިއުމަށް ބޭނުންވާ ފަރާތްތަަކަށް ރެޖިސްޓްރޭޝަން ޕޯޓަލް ހުޅުވާލުމަށް ހަމަޖެހިފައި ވަނީ ޖޫންމަހުގެ 13 ވަނަ ދުވަހުއެވެ.
