ލޯކަލް ގަވަމެންޓް އޮތޯރިޓީ (އެލްޖީއޭ) ބޯޑުގެ ސިޓީ ކައުންސިލްތަކުން ހޮވާ ގޮނޑިއަށް މެމްބަރަކު އިންތިޚާބު ކުރުމަށް މިއަދު ބޭއްވުނު ވޯޓުގައި އައްޑޫ ކައުންސިލްގެ އެމްޑީޕީގެ ބައެއް މެމްބަރުން މާލޭސިޓީ ކައުންސިލްގެ މޭޔަރު މުއިއްޒުއަށް ވޯޓު ދީފައިވާކަން ހާމަ ވެއްޖެއެވެ.
މިކަން ހާމަވެގެން ދިޔައީ އެކައުންސިލުން ވޯޓުލީ 13 މެމްބަރުންގެ ތެރެއިން 7 ކައުންސިލަރުން މުއިއްޒަށް ވޯޓު ދެއްވުމުންނެވެ.
އައްޑޫ ކައުންސިލްގައި އިންތިޚާބު ކޮށްފައި ތިއްބަވަނީ ޖުމްލަ 13 މެމްބަރުންނެވެ. މީގެރޭގައި ހިމެނެނީ، ހިތަދޫގެ 6 ކައުންސިލަރުންނާއި، ހުޅުދޫގެ 2 ކައުންސިލަރުންނާއި، ފޭދޫގެ 2 ކައުންސިލަރުންނާއި މަރަދޫގެ 1 ކައުންސިލަރަކާއި، މަރަދޫފޭދޫގެ 1 ކައުންސިލަރެއްގެ އިތުރުން މޭޔަރު އަލީ ނިޒާރެވެ. މީތެރޭގައި ހިމެނެނީ އެމްޑީޕީ 7 ކައުންސިލަރުންނާއި، ޕީޕީއެމްއަށް ނިސްބަތްވާ 3 ކައުންސިލަރެއްގެ އިތުރުން އަމިއްލަ 3 ކައުންސިލަރެކެވެ.
އެލްޖީއޭ ބޯޑުގެ ސިޓީ ކައުންސިލްތަކުން ހޮވާ ގޮނޑިއަށް މެމްބަރަކު އިންތިޚާބު ކުރުމަށް މިއަދު ބޭއްވުނު އިންތިޚާބުގައި، ޕީޕީއެމްގެ 3 ކައުންސިލަރުން ތިއްބެވިނަމަވެސް، މި ވޯޓުގައި މުއިއްޒުއަށް 7 މެމްބަރުންގެ ވޯޓު ލިބިވަޑައިގެންނެވިކަމަށް އޭނާ ވަނީ ވިދާޅުވެފައެވެ. އަދި އެކަމަށްޓަކާ އައްޑޫ ކައުންސިލްގެ މެމްބަރުންނަށް އޭނާ ވަނީ ޝުކުރު އަދާ ކުރައްވާފައެވެ.
Addu city council ge 13 councillors ge therein PPM ge thibbevee 3 councillors kamahviyas, 7 councillors alhugandah vote dhevveethee varah bodah shukuru dhannavan.
— Dr Mohamed Muizzu (@MMuizzu) June 12, 2021
މި ނަތީޖާއަށް ބަލާއިރު، އައްޑޫ ކައުންސިލް މެމްބަރުންގެ ތެރެއިން ޕީޕީއެމްގެ 3 މެމްބަރުންނާއި އަދި މިނިވަން 3 މެމްބަރުންގެ ވޯޓު މުއިއްޒުއަށް ލިބުނުކަމުގައިވި ނަމަވެސް، އޭނާއަށް ލިބިލައްވާނީ 6 ވޯޓެވެ. އެހެންކަމުން، 7 ވަނަ ވޯޓަކީ އެމްޑީޕީގެ މެމްބަރެއްގެ ވޯޓުކަން ވަނީ ޔަގީން ކުރެވިފައެވެ.
ބައެއް ފަރާތްތަކުން ބުނާގޮތުގައި، މިނިވަން ބައެއް މެމްބަރުންގެ ވޯޓު އެމްޑީޕީއަށް ލިބޭނެކަމަށް ބެލެވޭއިރު، އެމްޑީޕީގެ 1 ވޯޓަށްވުރެ ގިނަ ވޯޓު މުއިއްޒަށް ލިބިގެން ގޮސްފައިވާނެ ކަމަށް ވަނީ ބެލެވިފައެވެ.
އައްޑޫ ކައުންސިލްގެ ބައެއް މެމްބަރުންގެ ވޯޓު ޕީޕީއެމްގެ ކެނޑިޑޭޓަށް ލިބިގެން ގޮސްފައިވާކަން ޔަގީން ކުރެވިފައިވާއިރު، އެމްޑީޕީގެ ލީޑަރޝިޕްގައި ބޮޑެތި މައްސަލަތައް އުފެދި އެޕާޓީ ވަނީ ވަރަށް ބޮޑަށް ބައިބައިވެފައެވެ.
މިގޮތުން، އެމްޑީޕީގެ ރައީސް މުހައްމަދު ނަޝީދަށް މޭ 6ވަނަ ދުވަހު ދިން ޓެރަރިސްޓް ހަމަލާއަށް ފަންޑުކުރި ފަރާތްތަ ހޯދުމަށް ސަރުކާރުން އެކަށީގެންވާ މަސައްކަތްތައް ނުކުރާ ކަމަށްބުނެ، ނަޝީދަށް ތާޢީދުކުރާ ފަރާތްތަކުން ދަނީ، ސަރުކާރުގެ އިސްބޭފުޅުންނަށް ވަރަށް ބޮޑަށް ފާޑު ކިޔަމުންނެވެ.
ލޯކަލް ގަވަމެންޓް އޮތޯރިޓީ (އެލްޖީއޭ) ބޯޑުގެ ސިޓީ ކައުންސިލްތަކުން ހޮވާ ގޮނޑިއަށް ފުވައްމުލަކު ސިޓީގެ މޭޔަރު އިސްމާއިލް ރަފީޤް އިންތިޚާބުކޮށްފިއެވެ.
މި ގޮނޑިއަށް އިސްމާއިލް ރަފީޤާއި ވާދަކުރެއްވީ މާލޭ ސިޓީގެ މޭޔަރ ޑރ. މުހައްމަދު މުއިއްޒުއެވެ. މިއަދު ބޭއްވި އިންތިޚާބުގައި ޑރ. މުއިއްޒުގެ މައްޗަށް ރަފީޤް ކުރި ހޯދެއްވީ 3 ވޯޓުންނެވެ. ނަތީޖާ ދައްކާގޮތުން ރަފީގަށް ލިބިވަޑައިގަތީ 24 ވޯޓެވެ. މުއިއްޒަށް ލިބިވަޑައިގަތީ 21 ވޯޓެވެ. އައްޑޫގައި ބެހެއްޓި ދެ ފޮށިން އިސްމާއީލް އަށް ލިބުނީ ހަ ވޯޓެވެ. މުއިއްޒަށް ލިބުނީ ހަތް ވޯޓެވެ. ފުވައްމުލަކުގައި ބެހެއްޓި ފޮށިން އިސްމާއީލް އަށް ފަސް ވޯޓު ލިބުނުއިރު މުއިއްޒު އަށް ލިބުނީ އެއް ވޯޓެވެ. މިފޮށީގެ އެއް ވޯޓް ވަނީ ބާތިލްވެފަ އެވެ. ކުޅުދުއްފުށީގައި ބެހެއްޓި ފޮށިން ހުރިހާ ވޯޓެއް ވެސް ލިބުނީ އިސްމާއީލް އަށެވެ. މާލޭގައި ބެހެއްޓި ފޮށިން އިސްމާއީލް އަށް ހަ ވޯޓު ލިބުނުއިރު މުއިއްޒު އަށް 13 ވޯޓު ލިބުނެވެ.
އެލްޖީއޭގެ ބޯޑަށް މެމްބަރަކު އައްޔަންކުރުމަށް ސިޓީތަކުގެ ރަށު ކަށުކައުންސިލުން ހޮވާ މެންބަރެއްގެ ވޯޓުވެސް މިއަދު ވަނީ ކުރިއަށް ގެންގޮސްފައެވެ. ނަމަވެސް މި ނަތިޖާ އިލެކްޝަންސް ކޮމިޝަނުން އަދި އިއުލާނެއް ނުކުރައްވައެވެ. ރަށު ކައުންސިލުން އިންތިޙާބުކުރާ މެމްބަރުކަމަށް 7 ކައުންސިލަރުން ވާދަކުރެއެވެ. އޭގެތެރޭގައި ހިމެނެނީ އެމްޑީޕީގެ 5 ކައުންސިލަރަކާއި އިދިކޮޅު ޕީޕީއެމްގެ ކައުންސިލަރަކާއި އަމިއްލަ ގޮތުން ވާދަކޮށް ހޮވުނު ކައުންސިލަރެކެވެ.
