ސްޕެއިންގެ ބާސެލޯނާއިން އެޓީމަށް ކުޅެމުންދާ ހަތަރު ކުޅުންތެރިއެއްގެ އެއްބަސްވުން އާކުރަން ނިންމައިފިއެވެ.
އެއްބަސްވުން އާކުރަން ނިންމާފައިވަނީ އެޓީމުގެ ޖަރުމަނު ކީޕަރު ޓާ ސްޓެގަން އާއި ޖެރާޑް ޕީކޭގެ އިތުރުން ފްރާންސްގެ ޑިފެންޑަރު ކްލެމެންޓް ލެންގްލެޓް އަދި ނެދަލޭންޑްސްގެ ޒުވާން މިޑްފީލްޑަރު ފްރޭންކީ ޑި ޖޮންގް ގެއެވެ. އެޓީމުން ވަނީ މިމުހިންމު 4 ކުޅުންތެރިއެއްގެ އެއްބަސްވުން އާކުރާކަން އިއުލާން ކޮށްފައެވެ.
2014 ވަނަ އަހަރު ޖަރުމަނުގެ ބޮރޫޝިއާ މޮންޗެންގްލަޑްބަކަށް ކުޅުމަށްފަހު ބާސާއަށް ބަދަލުވި ކީޕަރު ޓާ ސްޓަރޖެންގެ ކުރީގެ އެއްބަސްވުން ހަމަވާން އޮތީ 2022 ވަނަ އަހަރުގެ ސީޒަންގެ ނިޔަލަށެވެ. އެހެންނަވަމެސް އާ އެއްބަސްވުމުގެ ދަށުން 2025 ވަނަ އަހަރުގެ ސީޒަނުގެ ނިޔަލަށް އޭނާ އެޓީމުގައި މަޑުކުރާނެއެވެ.
ބާސާއިން 23 އަހަރުގެ ޒުވާން މިޑްފީލްޑަރު ޑި ޖޮންގްގެ އެއްބަސްވުން 2026 ވަނަ އަހަރުގެ ސީޒަނާ ހަމައަށް އިތުރުކުރަން ނިންމާފއެވެ. ޕީކޭގެ އެއްބަސްވުން ވަނީ 2024 ވަނަ އަހަރުގެ ސީޒަންގެ ނިޔަލަށް އިތުރު ކުރަން ވަނީ ނިންމާފައެވެ. މިއީ 33 އަހަރުގެ ޕީކޭ ބާސާއާއި އެކު ހޭދަކުރާ ތޭރަވަނަ ސީޒަނެވެ.
2018 ވަނަ އަހަރު ސްޕެއިންގެ ސެވިއާ އިން ބާސާއަށް ބަދަލުވެ މޮޅު ކުޅުމެއް ދައްކަމުން އަންނަ ކްލެމެންޓް ލެންގްލެޓްގެ އެއްބަސްވުން އާކުރަން ބާސާއިން ނިންމާފައިވަނީ 2026 ވަނަ އަހަރުގެ ސީޒަންގެ ނިޔަލަށެވެ. މިހާތަނަށް ބާސާއަށް 89 މެޗު ކުޅެދީ 6 ލަނޑު އޭނާ ވަނީ ކާމިޔާބުކޮއްފައެވެ.
