ޗެމްޕިއަންސް ލީގު ފުޓްބޯޅަ މުބާރާތުގައި އިނގިރޭސިވިލާތުގެ މެންޗެސްޓަރ ސިޓީ އެޓީމު ކުޅުނު މެޗު ކާމިޔާބުކޮށް ހަމަޖެހިލައިފިއެވެ.
10 ވަނަފަހަރަށް މުބާރާތުގައި ވާދަކުރާ މެންޗެސްޓަރ ސިޓީ މެޗު ކާމިޔާބުކުރީ ޕޯޗުގަލްގެ އެފްސީ ޕޯތޯއާ ވާދަކޮށް 3-1 ލަނޑުންނެވެ. މެޗުގެ ފުރަތަމަ ލަނޑު ފުރަތަމަ ފަނަރަވަނަ މިނިޓުގެ ތެރޭގައި ޕޯތޯއިން ކާމިޔާބުކޮށް ވަނީ މެންޗެސްޓަރ ސިޓީ ހާސް ކޮއްލާފައެވެ. މިލަނޑު އެޓީމަށް ކާމިޔާބުކޮއްދިނީ ލުއިސް ޑައިޒްއެވެ.
ޕޯތޯއިން ލަނޑުޖެހިތާ ހަމިނިޓު ފަހުން ލިބުނު ޕެނެލްޓީގައި ސިޓީގެ ސާޖިއޯ އަގުއޭރޯ ނަތީޖާ ހަމަހަމަކުރިއެވެ. މިއީ ޖެނުއަރީ މަހުގެފަހުން މުބާރަތުގައި އޭނާ ކާމިޔާބުކުރި ފުރަތަމަ ލަނޑެވެ. އަދި މިއީ މުޅި މުބާރާތުގައި އެނާ ކާމިޔާބުކުރި 40 ވަނަ ލަނޑެވެ.
ސިޓީން މެޗުގައި ލީޑް ނެގީ ދެވަނަ ހާފްގައި އިކޭ ގުންޑޮގާން ކާމިޔާބުކުރި ލަނޑުންނެވެ. މެޗުގައި ސިޓީއަށް ލީޑް އިތުރަން ފުޅާ ކޮއްދިނީ މެޗުގެ ފަހުބައިގައި ފެރަން ޓޮރޭސް ކާމިޔާބުކުރި ލަނޑުންނެވެ. މިމެޗުގައި ސިޓީގެ ކޯޗު ގާޑިޔޯލާއަށް ކުރިމަތިވި ނުތަނަވެސް ކަމަކީ ކެޕްޓަން ފެނާންޑީނިޔޯއަށް އަނިޔާވެ ހަހަފްތާއަށް ކުޅުމާ ދުރަށްދާން ޖެހުމެވެ.
ކެވިންދި ބްރެއިނާ، ގެބްރިއަލް ޖެސުސް، ނަތަން އަޔެކް، ބެންޖަމިން މެންޑީ އަދި އެމްރިކް ލަޕޯޓޭ އަށް ރޭގެ މެޗުގައި ގާޑިޔޯލާގެ ޓީމުން ފުރުސަތެއް ދީފައެއްނުވެއެވެ. ބޮޑަށް ބެލޭވޭ ގޮތުގައި މި ކުޅުންތެރިންނަށް ހަފްތާ ބަންދުގައި އޮންނަ ލީގު މެޗުތަކުން ފުރުސަތު ދޭނެއެވެ.
ރޭގައި މިގުރޫޕްގައި ގްރީސްގެ އޮލިންޕިއާކޯސް އާއި ފްރާންސްގެ އޮލިންޕިކް ލިޔޯން ވާދަކުރި މެޗު 1-0 ލަނޑުން ކާމިޔާބުކުރީ އޮލިންޕިއާކޯސްއެވެ. މެޗުގައި ފެނިގެންދިޔަ ހަމައެކަނި ލަނޑު އޮލިންޕިއާކޯސް އިން ކާމިޔާބުކުރީ މެޗުގެ އިތުރުވަގުތު ތެރޭގައިއެވެ.
