ޗެމްޕިއަންސްލީގު ފުޓްބޯޅަ މުބާރާތުގެ އެންމެފަހުގެ ޗެމްޕިއަން ބަޔާން މިއުނިކް މޮޅާއެކު މުބާރާތް ފަށައިފިއެވެ.
އަމިއްލަ ދަނޑުގައި ކުޅުނު މެޗު ބަޔާންއިން ކުރި ހޯދީ ސްޕެއިންގެ އެތުލެޓީކޯ މެޑްރިޑާވާދަކޮށް 4-0 ލަނޑުންނެވެ. މެޗުގައި ކިންގްސީލީ ކޯމަން ބަޔާން މިއުނިކަށް ދެލަނޑު ޖަހައިދިން އިރު އަނެއް ދެލަނޑު ބަޔާންއަށް ކާމިޔާބުކޮއްދިނީ ލިއޯން ގޯޓްޒާކާ އާއި ކޮރެންޓިން ތޮލީސިޔޯއެވެ. މިއީ މުބާރާތުގައި އެޓީމުން ވިދިވިދިގެން މޮޅުވި 12 މެޗެވެ.
ބަޔާންމިއުނިކް އިން ލިސްބަންގައި އެންމެފަހުން ޗެމްޕިއަންސްލީގުގެ ތަށި ކާމިޔާބުކުރިތާ 59 ދުވަސްފަހުން ކުޅުނު މިމެޗުގައި އެތުލެޓިކޯ މެޑްރިޑަށް މާއެދެވޭ ކުޅުމެއް ދެއްކިފައެއް ނުވެއެވެ.
ބަޔާންއިން ވަނީ މިހައަރު ކުޅުނު ހުރިހާ މުބާރާތަކުން 33 މެޗުގެ ތެރެއިން 31 މެޗު ކާމިޔާބުކޮއްފައެވެ. އެޓީމުން ވަނީ ހުސްވި ސީޒަނުގައި ޗެމްޕިއަންސް ލީގުގެ ފުޓްބޯޅާ މުބާރާތުގައި ކުލަބުގެ ރެކޯޑް އަދަދަކަށް 43 ލަނޑުޖަހާފައެވެ.
މިގުރޫޕްގައި އޮސްޓިރިޔާގެ ރެޑްބުލް ސަލަޒް ބާގް އާއި ރަޝިޔާގެ ލޮކެމޯޓިވް މޮސްކޯ ވާދަކުރި މެޗު ނިމުނީ 2-2 ލަނޑުން އެއްވަރުވެގެންނެވެ.
