މާތް ވެގެންވާ ބަރަކާތެރި ރަމަޞާމް މަސް ނިމި، ފިޠުރު ޢީދު ދުވަސް ދިވެހިންނާއި މިއަދު ބައްދަކު ކުރިއިރު، މިއަދަކީ ދިވެހި ރާއްޖެ ބޮޑު މަލިމަޑުކަމެއްގައި އޮތް ދުވަހެކެވެ. ކޯވިޑް-19ގެ ހަތަރުވަނަ ރާޅު ދިވެހިންނާއި ކުރިމަތި ވެފައިވާއިރު، މިއީ ކޯވިޑްގައި ރާއްޖެ ތަޖުރިބާކުރާ އެންމެ ހިތްދަތި އުދަނގޫ ދުވަސްތަކެވެ.

ކޮންމެ އަހަރެއްގެވެސް ބަރަކާތެރި ފިޠުރު ޢީދުގެ ދިވެހިން ފާހަނަކުރަނީ ކުޑަ އީދުގެ ގޮތުގައެވެ. ބޮޑު ޖަމާއަތުގައި ކުރެވޭ އީދު ނަމާދާއާއިއެކު، އީދު ސަލާންކުރުމައި، އެއްގެއިން އަނެއްގެއަށް ޒިޔާރާތްކޮށް، ހާއަހުވާލު ބަލައި، ސައިބުއިމާއި، މަޖާކުރުމާއި، ދަތުރު ދިއުމަކީ ދިވެހިންގެ މިއީދުގައި ދެކެފައިވާ ދުވަސްތަކެވެ. ނަމަވެސް މިއަދު އީދު ދުވަސް ފާހަގަކުރަން ޖެހިފައިވަނީ ވަރަށް ހިތްދަތި ކަމާއިއެކުގައެވެ. އެތައް ބަޔަކަށް އެޑްމިޓްކޮށްގެން ފަރުވާދެމުންދާއިރު، ވެންޓިލޭޓަރުގައާއި، އައިސީޔޫގައިވެސް ދަނީ ބައެއް މީހުންނަށް ފަރުވާ ދެމުންނެވެ.

މިއީ މިއަދު ރާއްޖެއާއި ދުނިވެސް ބަދަކޮށްފައިވާ ބޮޑު ބަލިމަޑުކަމެކެވެ. ދުނިޔޭގެ އެތައް މިލިޔަން ބަޔަކަށް ބަލިޖެހި އެތައް ހާސް ބަޔަކު ކޮންމެ ދުވަހަކު ދަނީ ދުނިޔެއާއި ވަކިވަމުންނެވެ. ހަމަ އެހެންމެ މިހާލަތުގައި އިސްރާއީލްގެ ނުބައި ނުލަފާ ވެރިންގެ އަމުރަށް ފަލަސްތީނުގެ މުސްލިމު އެތައް ބަޔަކު ދަނީ ޝަހީދުކޮށް، ގަތުލުކުރަމުންނެވެ. އަނިޔާވެރި ލާއިންސާނީ މިއަނިޔާތަކުގައި މައުސޫމް ކުޑަކުދިންނާއި، އެތައް ބަޔަކު ދަނީ ބިކަހާލުގައި ޖެހެމުންނެވެ.

ޢީދު ދުވަހަކީ، ދީނީ ގޮތުންނާއި ޘަޤާފީ ގޮތުންނާއި އިޖްތިމާއީ ގޮތުންވެސް، ހިތްތަކުގައި ވަރަށް ޚާއްޞަ ޤަދަރެއް ދެވިފައިވާ ދުވަހަކަށްވާއިރު ޢާއިލީ ގުޅުންތައް ބަދަހިކުރުމާއި، އެކަކު އަނެކަކަށް އެހީތެރިކަން ފޯރުކޮށްދީ އެކުވެރިކަމާއެކު އުޅުމުގެ މަތިވެރި އަޒުމް މިއަދު އާކުރަން އެބަޖެހެއެވެ. އަދި ތިމާފަދަ މުސްލިމު އަހުންނާއި އަހުންނާއި އުހުތުންނަށް ނަސްރާއި ކާމިޔާބަށް އެދި ދުޢާކޮށް، ހައްގަށް ނަސްރުދިނުމަށް އެދި ދުޢާތައް ގިނަކުރަން ޖެހެއެވެ.

ތިމާގެ ފަރާތުން އަނެކާއަށް މިއަދު ފޯރުކޮށްދެވެން އިތް ރައްކާތެރިކަމާއި އެހީތެރިކަމަކީ ގޭގައި މަޑުކޮށްލުން ކަމަށްވާއިރު މިކަން އަނެއާކާގެ ފުރާނައާއި، ނަފްސައްޓަކައި ކުރުމަކީ ކޮންމެ މީހެއްގެވެސް ފަރުދީ ޒިންމާއަކަށް ހަދަންޖެހެއެވެ. މިއީ ޒަމާނީ ވަސީލަތްތަކާއިއެކު، ޒަމާނަށް ބޮޑު ބަދަލެއް އައިސްފައިވާ ދުވަސް ވަރަަކަށްވާއިރު، އާއިލާ މީހުންނާއި، ގާތް ރަހުމަތްތެރިންނާއި ފޯނުން ގުޅައި ހާލު އަހުވާލު ބަލައި، ބަލިހާލަތުގައި ތިބި މީހުންނަށް ހިތްވަރުދިނުމުގެ ދުވަހަށް މިއަދު ހަދަން އެބަޖެހެއެވެ.

ޢީދުގެ ތަހުނިޔާ ދިވެހި ރައްޔިތުންނަށް ފޮނުވައި ރައީސުލްޖުމްހޫރިއްޔާ ވިދާޅުވެފައިވަނީ ނިމިގެން މިދިޔަ ބަރަކާތްތެރި ރަމަޟާން މަހު ރޯދައިގެ އަޅުކަން ފުރިހަމަ ކުރުމުގެ ހެޔޮ ތައުފީޤާއި މަތިވެރި ނަސީބު، އަޅުގަނޑުމެންނަށް މިންވަރުކުރެއްވި ކަމަށްޓަކައި މާތް ﷲގެ ޙަޟްރަތަށް ޙަމްދާއި ޝުކުރު އަދާކުރައްވާފައެވެ. އަދި މި އުފާވެރި މުނާސަބަތުގެ ތަހުނިޔާ، ދިވެހި ރައްޔިތުންނަށާއި އިސްލާމީ ޤައުމުތަކުގެ ވެރިންނަށާއި މުޅި އިސްލާމީ އުންމަތަށްވެސް ރައީސް ވަނީ ފޮނުއްވާފައެވެ.

ޢީދު ފާހަގަކުރުމަށް، އިސްލާމް ދީނުގައި ކަނޑައަޅުއްވާފައި ހުރި ކަންކަމަށް ބަލާއިރު މުޅިންވެސް ފެންނަނީ، އެއް މުސްލިމަކު އަނެއް މުސްލިމަކަށް، އަދި އެއް އިންސާނަކު އަނެއް އިންސާނަކަށް، އޯގާތެރިވުމާއި އެހީތެރިވުމާއި، ހިތްހެޔޮކަން ފާޅުކުރުމާއި، އުފާވެރިކަމާއެކު ބައްދަލުކުރުމަށް މަގުފަހިކޮށްދޭ ކަންކަންކަން ރައީސް ފާހަގަކުރެއްވިއެވެ.

ޢީދުގެ ތަހުނިޔާ ޚަބަރު އޮންލައިންގެ ކިޔުންތެރިންނަށް ނުހަނު އިހުލާސްތެރިކަމާއިއެކު ދަންނަވަމެވެ. އަދި މިއަދުގެ މިހާލަތުގައި ބަލި އެދުގައި ފަރުވާ ދެމުންދާ މީހުންނަށާއި، ކޯވިޑްގައި ނިޔާވި އެންމެހައި މީހުންގެ ފުރާނަޔަށް ސުވަރުގެގޭގެ މަތިވެރި ނިޢުމަތް މިންވަރު ކޮށްދެއްވުމަށް އެދި ދުޢާކޮށް، އެއާއިލާތަކަށް ކެތްތެރިކަން ދެއްވުން އެދި ދުޢާކުރަމެވެ.