2018ވަނަ އަހަރު، އެމެރިކާއިން، އިރާނުގެ ނިއުކުލިއަރ އެއްބަސްވުމުން އަމިއްލައަށް ބޭރު ވުމުގެ ސަބަބުން، ހުއްޓުމަކަށް އައިސްފައިވާ އެގައުމުގެ ނިއުކުލިއަރ މަޝްރޫޢުގެ އެއްބަސްވުން އަލުން އިއާދަކުރުމަށް އެމެރިކާ ހިމެނޭގޮތުން ދުނިޔޭގެ މުއްސަދި ގައުމުތަކާއެކު ބާއްވަމުންދާ ވާހަކަތަކާމެދު އުއްމީދު ބޮޑު ކަމުގައި، އިރާނުގެ ރައީސް ހަސަން ރޫހާނީ ވިދާޅު ވެއްޖެއެވެ.
އަދި ރޫހާނީވަނީ، އިރާނާ ދެކޮޅަށްއ އެމެރިކާއިން އަޅާފައިވާ ދަތި ކުރުމުގެ ފިޔަވަޅުތައް ނައްތާލުމުގެ ގޮތުން، ދުނިޔޭގެ މުއްސަދި ގައުމުތަކާއެކު، ގާގްގަޑަކަށް އެއްބަސްވުމަކަށް އަދެވިފައިވާ މޭރުމަކުން ވާހަކަ ދައްކަވާފައެވެ.
ރޫހާނީ އާއި ހަވާލާދީ އިރާނުގެ ދައުލަތުގެ މީޑިއާއިން ރިޕޯޓު ކޮށްފައިވަނީ، މިހާރު އެއްބަސްވުމަކަށް އަންނަން ޖެހިފައިވަނީ، މިގޮތުން އުވާޅުމަށް ހަމަޖެހިފައިވާ ދަތިކުރުމުގެ ފިޔަވަޅުތަކުގެ ތަފްސީލްތަކެވެ. އެހެންނަމެސް، އެމެރިކާއިންވެސް އަދި ވާހަކަ ތަކުގައި ބައިވެރިވާ އެހެން އެއްވެސް ގައުމަކުންވެސް، މިކަން އަދި ޔަގީން ކޮށްދީފައެއް ނުވެއެވެ.
"އެމެރިކާއާއި އަދި ޔޫރަޕްގެ ގައުމުތަކުންވެސް، އިރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅު ނައްތާލުމަށްފަހު، ނިއުކުލިއަރ އެއްބަސްވުމަށް އަލުން ރުޖޫޢަވުން ނޫން ހައްލެއް ނެތްކަމަށް ގަބޫލު ކުރާ ހިސާބަށް މިހާރު ވާހަކަތައް އަތުވެއްޖެ. މިގޮތުން އެމެރިކާއިން އަޅާފައިވާ މައިގަޑު ގިނަ ފިޔަވަޅުތައް ވަނީ ނައްތާލެވިފައި، އަދި މިހާރު ކުރިޔަށްދަނީ، އެއްބަސްވާން ޖެހޭ ބައެއް ތަފްސީލުތަކާމެދު އެއްބަސްވުމަށް ކުރިޔަށްދާ މަޝްވަރާތައް،" ރޫހާނީއާއި ހަވާލާދީ އިރާނުގެ މީޑިއާއިން ރިޕޯޓު ކޮށްފައި ވެއެވެ.
ދުނިޔޭގެ ބޮޑެތި ބާރުތަކާ އިރާނާ ދެމެދު ވެވޭ މިއެއްބަސްވުމަށް އަމަލު ކުރާނެ ގޮތްތަކާ ގުޅޭގޮތުން ނުސިދާ މަޝްވަރާތަކުގެ 4 ވަނަ ބުރު ކުރިޔަށް ގެންދިއުމަށް އެމެރިކާގެ ޓީމު ވަނީ މިހަފްތާގައިވަނީ އަލުން ވިއެނާއަށް ދަތުރު ކޮށްފައެވެ.
އިރާނުން ދަނީ، އެގައުމުން ނިއުކުލިއަރ ހަތިޔާރު އުފެއްދުމަށް މަސައްކަތް ކުރާކަމަށް ކުރެވޭ ތުހުމަތުތަކަށް ތަކުރާރުކޮށް ދެކޮޅު ހަދަމުންނެވެ.
