ލީޑްސް ޔުނައިޓެޑްދަނޑުގައި މިސީޒަނުގައި އެޓީމު ފުރަތަމަ ފަހަރަށް ބަލިވެއްޖެއެވެ.
އިނގިރޭސި ލީގުގައި ރޭ ކުޅުނު މެޗު ލީޑްސް ބަލިވީ ވުލްވޯސްއާ ވާދަކޮށް 1-0 ލަނޑުންނެވެ. މި މޮޅާއެކު ވުލްވޯސްއިން ތާވަލުގެ ހަވަނައަށް ކުރިޔަށް ވަނީ ޖެހިލާފައެވެ. މިއީ ލީޑްސްގެ އަމިއްލަ ދަނޑުގައި އެލަންރޯޑްގައި މިސީޒަންގައި އެޓީމު ބަލިވި ފުރަތަމަ ފަހަރެވެ.
މެޗުގައި ޖެހި ހަމައެކަނިލަނޑު ވުލްވޯސް އިން ކާމިޔާބު ކުރީ މެޗުގެ 70 ވަނަ މިނިޓުގައި މެކްސް ކިލްމަން ދިން ބޯޅައިކުން ރައުލް ޖިމިނޭޒްއެވެ. މިއީ އޭނާ މިސީޒަންގައި ވުލްވޯސް ކާމިޔާބުކޮއްދިން ތިންވަނަ ލަނޑެވެ. އަދި ޕްރިމިއަރ ލީގުގައި ޖެހި 33 ވަނަ ލަނޑެވެ. ލަނޑުޖެހުމުގެ ކުރިން މެޗުގެ ފުރަތަމަހާފްގައި ލީޑްސްގެ ޕެޓްރިކް ބެންފޯޑް ވަނީ ލަނޑެއް ޖަހާފައެވެ. ނަމަވެސް އެލަނޑު ބަލައިނުގަތީ ކުޅުންތެރިޔާ އޮފްސައިޑުގައި ހުރުމުންނެވެ.
ލީޑްސްޔުނައިޓެޑުން ވަނީ މިމެޗުގެ ކުރިން އެޓީމުގެ އަމިއްލަ ދަނޑުގައި ބަލިނުވެ 12 މެޗު ހަމަކޮއްފައެވެ. މެޗުގެ ކުރިން އެޓީމު ބަލިވެފަވަނީ ހުސްވި ފެބްރުވަރީ މަހުގައި ޗެމްޕިއަންޝިޕުގައި ވިގަންއާ ދެކޮޅަށް ކުޅުނު މެޗުންނެވެ. މިއީ 2004 ވަނަ އަހަރު ޕޯސްމޮޓް އަތުން ލީގުގައި އަމިއްލަ ދަނޑުގައި ބަލިވުމަށްފަހު ލީޑްސް ބަލިވި ފުރަތަމަފަހަރުއެވެ.
ރޭ ލީގުގައި ވެސްޓްބޮރްމް އާއި ބާންލީ ވާދަކުރި މެޗު ނިމުނީ ލަނޑެއް ނުޖެހި އެއްވަރުގެންނެވެ. މިއީ 49 މެޗުފަހުން ލީގުގައި މެޗެއް ލަނޑެއް ނުޖެހި އެއްވަރުވި ފުރަތަމަ ފަހަރެވެ. މިއީ 2004 ވަނައަހަރު ފަހުން ލީގުގެ ފުރަތަމަ ފަސްމެޗުން ވެސްޓްބްރޯމަށް މޮޅެއް ނުހޯދުނު ފުރަތަމަފަހަރުއެވެ.
މި ނަތީޖާއެކު ފަސްމެޗުން ހޯދި 9 ޕޮއިންޓާއެކު ވުލްވޯސް އޮތީ ލީގުގައި 6 ވަނައިގައެވެ. ރޭގައި ބަލިވި ލީޑްސްވަނީ 10 ވަނައަށް ވެއްޓިފައެވެ. ވެސްޓްބްރޮމް 17 ވަނައިގަ އޮތްއިރު ބާންލީ އޮތީ 18 ވަނައިގައެވެ.
