މޮޑާނާ ކުންފުނިން އުފައްދާފައިވާ ކޯވިޑް19 ވެކްސިން އެމަޖެންސީކޮށް ބޭނުން ކުރުމުގެ ހުއްދަ ދުނިޔޭގެ ސިއްޙަތު ޖަމިއްޔާ WHOއިން ދީފިއެވެ.

މިއި ދުނިޔޭގެ ސިއްޙަތު ޖަމިއްޔައިން އެމަޖެންސީކޮށް ބޭނުންކުރުމުގެ ހުއްދަ ދޫކޮށްފައިވާ މިފަދަ 5 ވަނަ ވެކްސިނެވެ.

"މަގުސަދަކީ، ބޭނުންވާ ބޭހާއި، ވެކްސިނާއި އަދި އެނޫން ފަރުވާވެސް، އެމަޖެންސީ ހާލަތަށް ބޭނުންވާ ވަރަށް، ވީހާވެސް އަވަހަށް ލިބޭނެ އިންތިޒާމް ހަމަޖެއްސުން،" WHOއިން ނެރެފައިވާ ބަޔާނެއްގައި ބުނެފައި ވެއެވެ.

WHOގެ އެސިސްޓެންޓް ޑިރެކްޓަރ ޖެނެރަލް މަރިއަންގަލަ ސިމާއޯ ހުކުރު ދުވަހު ވިދާޅުވެފައި ވަނީ، ގިނަ ވެކްސިންތައް ފަސޭހައި ލިބެން ހުރުމަކީ މުހިންމު ކަމެއް ކަމުގައެވެ. ސަބަބެއްކަމުގައި އޭނާ ވިދާޅުވީ، އެހެން ވެކްސިންތައް ލިބުމުގައި ހުރި ދަތުތަކުގެ ސަބަބުންނެވެ. އަދި ވަކީން ޚާއްސަކޮށް، ފަގީރު ގައުމުތަކަށް ވެކްސިން ފޯރުކޮށްދިނުމަށް ޔޫއެންއިން ކުރިޔަށް ގެންދާ "ކޯވެސް" ޕްރޮގރާމަށްވެސް ވެކްސިން ފޯކޮށްދޭ އެންމެ މުހިންމު ގައުމަކީ އިންޑިއާ ކަމަށް ވާތީވެސް މެއެވެ.

އިންޑިއާގައި އާދަޔާ ޚިލާފަށް ކޯވިޑް19ގެ ހާލަތު ގޯސްވެގެން ދިއުމާ ގުޅިގެން އިންޑިއާއިން މިހާރުވަނީ، ކޯވިޑް19 ވެކްސިން އެގައުމުން ބޭރު ކުރުން ހިއްޓާލާފައެވެ.

މޮޑާނާއިން ވަނީ، އކުންފުނީގެ ވެކްސިން އުފައްދާ ނެޓްވާކް އިތުރަށް ފުޅާކުރުމަށް މިހާރު ނިންމާފައިވާކަން ފާއިތުވެދިޔަ ހަފްތާގައި އިއުލާން ކޮށްފައެވެ. ކުންފުނީގެ މަގުސަދަކީ 2022 ވަނަ އަހަރު 3 ބިލިއަން ޑޯޒްގެ ވެކްސިން އުފެއްދޭ ވަރަށް ކެޕޭސިޓީ އިތުރު ކުރުމެވެ.

WHOގެ ސްޓަރަޓެޖިކް އެޑްވައިޒަރީ ގްރޫޕް އޮފް އެކްސްޕާޓްސް އޮން އިމުނައިޒޭޝަން (SAGE)އިން ވަނީ އިން ޖެނުއަރީމަހު ވަނީ، މޮޑާނާ ވެކްސިން 18 އަހަރުން މަތީ ހުރިހާ އޭޖް ގުރޫޕެއްގެ މީހުން ބޭނުން ކުރުން އެދެވިގެންވާ ކަމަށް ބުނެފައެވެ.

މޮޑާނާއާއި އެއް ބާވަތެއްގެ، mRNA ވެކްސިނެއް ކަމުގައިވާ ފައިޒާ/ބައޯއެންޓެކްގެ ވެކްސިނަކީ އެމަޖެންސީކޮށް ބޭނުން ކުރުމުގެ ހުއްދަ ދުނިޔޭގެ ސިއްހަތު ޖަމިއްޔާ WHOއިން  އެންމެ ފުރަތަމަ ދިން ވެކްސިނެވެ. މިވެކްސިނަށް WHOއިން ހުއްދަ ދޫކޮށްފައިވަނީ ފާއިތުވެދިތަ އަހަރު ނިމެމުން ދަނިކޮށެވެ.

އެއަށްފަހު، އެމަޖެންސީކޮށް ބޭނުން ކުރުމުގެ ހުއްދަ WHOއިން ދީފައިވާ ވެކްސިންތަކުގެ ތެރޭގައި، އެސްޓަރާޒެނެކާ-އެސްކޭ ބައޯ ކޯވިޑް19 ވެކްސިނާއި، ސީރަމް އިންސްޓިޓިއުޓް އިފް އިންޑިއާ، އަދި ޖޯންސަން އެންޑް ޖޯންސަންއިން އުފައްދާ ވެކްސިންތައްވެސް WHOއިން ހުއްދަ ދީފައިވާ ލިސްޓަށް އިތުރު ކޮށްފައެވެ.

WHOއިން ހާމަ ކޮށްފައިވާ ގޮތުގައި، އެ ޖަމިއްޔާއިން ދޫކޮށްފައިވާ އެމަޖެންސީކޮށް ބޭނުންކުރުމުގެ ހުއްދަ ދޫކޮށްފައިވާ ލިސްޓުގައި ޗައިނާގެ ސިނޯފާމް އަދި ސިނޮވެކް އިން އުފައްދާފައިވާ ވެކްސިން ހިމެނުމަށް ކުރަންޖެހޭ ދިރާސާތައް އެ ޖަމިއްޔާއިން ގެންދަނީ ކުރަމުންނެވެ. WHOއިން ބުނެފައިވަނީ، މިވެކްސިންތަކާމެދު އަންނަ ހަފްތާގައި ގޮތެއް ނިމިގެން ދާނެއެވެ.