އެމެރިކާގެ ރިޔާސީ އިންތިޚާބަށް އެންމެ ދެހަފްތާއަށް ވެފައިވާއިރު، މިއިންތިޚާބުގައި ވާދަކުރާ ދެބޭފުޅުން ކަމުގައިވާ މިހާރުގެ ރައީސް ޑޮނަލްޑް ޓްރަމްޕްއާއި އަދި ކުރީގެ ނާއިބުރައީސް ޖޯ ބައިޑްންއާއި ދެމެދު ބޭއްވުމަށް ހަމަޖެހިފައި އެންމެ ފަހުގެ ރިޔަސީ ބަހުސްގައި ބަހުސް މޮޑެރޭޓް ކުރާ އުސޫލަށް ބަދަލު ގެނައުމަށް މިބަހުސް އިންތިޒާކުރާ އެގައުމުގެ ކޮމިޝަން އޮން ޕްރެޒިޑެންޝަލް ޑިބޭޓްސްގެ ފަރާތުން ނިންމައިފިއެވެ.
އަންނަ ބުރާސްފަތި ދުވަހުގެ ރޭ ބެއްވުމަށް ހަމަޖެހިފައިވާ މިބަހުސްގައި ކޮމިޝަނުން ނިންމާފައިވަނީ، ބަހުސްގެ ބައެއް ސުވާލުތަކަށް އެއް ކެޑިޑޭޓަކު ޖަވާބު ދެމުންދާއިރު އަނެއް ކެޑިޑޭޓުގެ މައިކްރޯ ފޯނު އޮފްކޮށްފައި ބެހެއްޓުމަށެވެ.
ބެލެވޭގޮތުގައި ކޮމިޝަންގެ މި ނިންމުމަށް ޓްރަޕް ދެކޮޅު ހައްދަވާނެއެވެ.
އެމެރިކާގައި ބޭއްވޭ ރިޔާސީ ބަހުސްތައް މިނިވަންކަމާއެކު ބޭއްވުމަށް އުފައްދާފައި އޮންނަ މިކޮމިޝަންއިން މިގޮތަށް ނިންމާފައިވަނީ، ކުރިޔަށްއޮތް ބަހުސްގައި ގެންގުޅޭނެ އުސޫލުތަކެއް ކަޑައެޅުމަށް އެކޮމިޝަންގެ ފަތާރުން ހޯމަދުވަހު ބޭއްވި ބައްދަލުވުމަށް ފަހުއެވެ. ކޮމިޝަންނުން ބުނެފައިވަނީ މި ބަދަލުތައް ގެންނަން ޖެހުނީ ފުރަތަމަ ބަހުސްގައި، އުސޫލުތައް މުގުރާލައި އެކަކު އަނެކަކާއި ޒާތީގޮތުން ދިމާކުރުންތައް އެބަހުސްގައި ހައްދު ފަހައަޅާ ދިއުމާއި ގުޅިގެންނެވެ. ފުރަތަމަ ރިޔާސީ ބަހުސްގައި ބަހުސް ކުރިޔަށް ގެންދިއުމުގައި ދެފަރާތުންވެސް އެއްބަސްވެފައިވާ އުސޫލުތަކާއި ޚިލާފަށް އެންމެބޮޑަށް އަމަލު ކުރައްވާފައިވަނީ ޓްރަޕްއެވެ. މިގޮތުން މިބަހުސް އެމެރިކާގެ ގިނަ ރައްޔިތުން ސިފަކޮށްފައިވަނީ އެމެރިކާގެ ތާރީޚުގައިވެސް ބޭއްވުނު އެންމެ ހުތުރު ރިޔާސީ ބަހުސްގެ ގޮތުގައެވެ.
މިމަހުގެ 22 ވަނަ ދުވަހު ބޭއްވުމަށް ހަމަޖެހިފައިވާ މިބަހުސްގައި މައިކްރޯ ފޯން ކަޑާފަ ބެއްޓުމަށް ހަމަޖެހިފައިވަނީ، ބަހުސްގެ 6 ބުރުގެ ތެރެއިން ކޮންމެ ބުރެއްވެސް ފަށާއިރު ކުރެވޭ ފުރަތަމަ ސުވާލަށް ޖަވާބު ދިނުމަށް ކޮންމެ ކެޑިޑޭޓަކަށްވެސް ލިބޭ ދެމިނިޓްގެ ވަގުތުކޮޅުގައި އެއް ކެޑިޑޭޓަކު ޖަވާބު ދެމުންދާއިރު އިދިކޮޅު ކެޑިޑޭޓުގެ މައިކްރޯ ފޯން އޮފްކޮށްފައި ބެހެއްޓުމަށެވެ. އަދި މި ދެމިނިޓް ފިޔަވައި ބަހުސްގެ އެހެން ހުރިހާ ވަގުތެއްގައިވެސް ދެ ކެޑިޑޭޓުންގެ މައިކްރޯ ފޯނުވެސް ހުންނާނީ އޮން ކޮށްފައެވެ.
އެމެރިކާގެރައީސް ޑޮނަލްޑް ޓްރަމްޕަށް ކޯވިޑް ޖެހިވަޑައިގަތުމާއި ގުޅިގެން، އަޅާ ސަލާމަތީ ފިޔަވަޅެއްގެ ގޮތުން، ދެވަނައަށް ބޭއްވުމަށް ހަމަޖެހުނު ރިޔާސީ ބަހުސް ވާރޗުއަލްކޮށް (އޮންލައިކޮށް) ބޭއްވުމަށް އެމެރިކާގެ 'ކޮމިޝަން އޮން ޕްރެޒިޑެންޝަލް ޑިބޭޓްސް' އިން ނިންމާފައި ވަނިކޮށް، އެފަދަ ބަހުސެއްގައި ބައިވެރިވެވަޑައި ނުގަތުމަށް ކުރިން ޓްރަމްޕް ނިންމަވާފައިވެއެވެ. ނަތީޖާއެއްގެ ގޮތުން ބޭއްވުމަށް ކުރިން ހަމަޖެއްސި ދެވަނަ ބަހުސް ރިޔާސީ ކޮމިޝަނުން ވަނީ ކެންސަލް ކޮށްފައެވެ.
'ކޮމިޝަން އޮން ޕްރެޒިޑެންޝަލް ޑިބޭޓްސް' އަކީ އެމެރިކާގެ މައި ސިޔާސީ ދެ ޕާޓީ ކަމުގައިވާ ޑިމޮކްރަޓިކް ޕާޓީއާއި ރިޕްބްލިކަން ޕާޓީގެ ޗެއަރމަނުން އެއްބަސްވެ، އެމެރިކާގައި ބޭއްވޭ ރިޔާސީ އިންތިޚާބުތަކަށް ތައްޔާރު ވުމުގެ ގޮތުން ބޭއްވޭ ރިޔާސީ ބަހުސްތައް މިނިވަންކަމާއިއެކު ބޭއްވުމަށް 1987 ވަނަ އަހަރު އުފެއްދި ކޮމިޝަންއެކެވެ. މިކޮމިޝަންގެ މުވައްޒިފުންގެ ގޮތުގައި މަސައްކަތް ކުރަނީ މިދެޕާޓީގެ މެމްބަރުންނެވެ. އަދި ރިޔާސަތު ބަލަހައްޓަނީ މިދެޕާޓީއަށް ނިސްބަތްވާ އިސްފަރާތްތަކުންނެވެ.
