ކޯވިޑް 19 ޖެހުމުން އާލިއާ ބަޓާއި ލޯބިވެރިޔާ ރަންބީރް ކަޕޫރުވަނީ ކަރަންޓީނުގައި ދުވަސްތަކެއް ހޭދަކޮށްފަ އެވެ. އަދި މިހާރު މި ދެތަރިންވެސް ވަނީ މި ބަލިން އެއްކޮށް ރަނގަޅުވެފަ އެވެ. ބަލިން ރަނގަޅުވުމާއެކު ދެމީހުންވެސް ވަނީ އެކުގައި ޗުއްޓީ ހޭދަކޮށްލުމަށް ދަތުރު ފަށާފައެވެ. މި ދެ ލޯބިވެރިން ހޯމަދުވަހު ވަނީ އެކުގައި މުމްބާއީ އެއާޕޯޓުން ފެނިފައެވެ.
ރަންބީރާއި އާލިއާ އެކުގައި އާންމުތަންތަނުން ފެންނަނީ ވަރަށްވެސް މަދު ފަހަރެއްގައެވެ. ކޯވިޑް 19ގެ ދެވަނަ ރާޅާއެކު ވަރަށް ގިނަ އަދަދެއްގެ ތަރިންވަނީ ބޮލީވުޑުން މި ބައްޔާ ކުރިމަތިލާންޖެހިފަ އެވެ. އޭގެ ތެރޭގައި ރަންބީރާއި އާލިއާގެ އިތުރުން ކެޓްރީނާ ކައިފް، ބޫމީ ޕަޑްނޭކަރް، އަރުޖުން ރާމްޕާލް، އަކްޝޭ ކުމާރު، އަދިތިޔާ ނާރަޔަން، ކާތިކް އާރިޔަން އަދި އާމިރް ޚާން ފަދަ ތަރިން ހިމެނެއެވެ.
ކަރަންޓީނުގައި ދުވަސްތަކެއް ހޭދަކުރުމުގެ ސަބަބުން ރަންބީރާއި އާލިޔާ ބޭނުންވީ ޗުއްޓީއެއް ހޭދަކުރުމަށް އިންޑިއާއިން ބޭރަށް ދިއުމަށެވެ. އެގޮތުން މި ދެ ލޯބިވެރިންގެ މަންޒިލަކީ ދިވެހިރާއްޖެ އެވެ. މި ޕެންޑަމިކްގެ ތެރޭގައި ދިވެހިރާއްޖެ ވަނީ ފަތުރުވެރިންގެ ވަރަށް މަގްބޫލު މަންޒިލަކަށް ވެފައެވެ.
ރަންބީރާއި އާލިއާ އެއާޕޯޓުން ފެނިފައިވަނީ އެއްވައްތަރު އައުޓްފިޓްސްގަ އެވެ. އެގޮތުން ރަންބީރް ލައިގެންހުރީ ހުދު ކުލައިގެ އަތްކުރު ޓީޝާޓަކާއި ޑެނިމް ޖީންސް އަދި ސްނީކާސްއެކެވެ. ހަމަމިގޮތަށް އާލިއާ ލައިގެންހުރީ ތިރިއާއި މަތިވެސް ހުދުކުލައިގެ އައުޓްފިޓެކެވެ.
View this post on Instagram
މަސައްކަތަށް ބަލައިލާއިރު އާލިއާ އެންމެ ފަހުން ފެނިގެން ގޮސްފައިވަނީ 2020 ވަނަ އަހަރުގެ ފިލްމް "ސަޑަކް 2″ އިންނެވެ. އަދި ދެން އެންމެ އަވަހަށް އޭނާ ފެނިގެން ދާނީ އަޔާޏް މުކަރްޖީގެ "ބްރަހަމަސްތުރާ" އިންނެވެ. މި ފިލްމަކީ މި ދެ ލޯބިވެރިން އެކުގައި ފެނިގެންދާނެ ފިލްމެކެވެ.
