މާޒިޔާއާ ޒާތީ އެއްވެސް ކަމެއް ނޯންނާނެ ކަމަށާއި، ނުކުންނާނީ އެޓީމު ބަލިކުރަން ކަމަށް ޓީސީ ސްޕޯޓްސް ކްލަބުގެ ކޯޗު މުހައްމަދު ނިޒާމް ބުނެފިއެވެ.
ދިރާގު ދިވެހި ޕްރިމިއަރ ލީގުގައި މިރޭ މާޒިޔާ އާއި ދެކޮޅަށް ނުކުތުމުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން މާޒިޔާގެ ކުރީގެ ކޯޗު ނިޒާމް ބުނީ، މާޒިޔާ ސްޕޯޓްސް އެންޑް ރެކްރިއޭޝަނުގެ ކޯޗުކަމުން އިސްތިއުފާދިނުމަކީ ޕްރޮފެޝަނަލް ނިންމުމެއް ކަމަށާއި، އެކަމާ ހެދި މާޒިޔާއާ ޒާތީ އެއްވެސް ކަމެއް ނޯންނާނެކަމަށެވެ.
މާޒިޔާ ކޯޗުކަމުން ނިޒާމް ވަކިވި ފަހުން ފުރަތަމަ ފަހަރަށް މާޒިޔާ އާއި ދެކޮޅަށް ކުޅޭ މެޗަށް ވެގެންދާނީ މިރޭ ކުޅޭ މެޗެއެވެ. އެ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ނިޒާމް ބުނީ އޭނާގެ ކެރިއަރުގައި މިދިޔަ 20 އަހަރު މަސައްކަތްކުރީ ޕްރޮފެޝަނަލް ރަނގަޅު އުސޫލުން ކަމަށެވެ.
ލީގުގައި މިހާތަނަށް ބަލިނުވެ ހަމައެކަނި އޮތް މާޒިޔާ ބަލިކުރެވިދާނެތޯ ނޫސްވެރިޔަކު ސުވާލު ކުރުމުން ނިޒާމް ބުނީ، އެއީ ނުކުރެވޭނެ ވަރުގެ ކަމެކޭ ނުބުނާނެ ކަމަށެވެ. އަދި ޓީސީގައި މިހާރު އޮތް ސްކޮޑަކާ ބަލާއިރު، އެ ޓީމު ބަލިކުރެވިއްޖެނަމަ އެކަން ވެގެންދާނީ މި ސީޒަންގައި ޓީސީ ހޯދާ އެންމެ ބޮޑު މޮޅަށް ކަމަށް ނިޒާމް ވަނީ ބުނެފައެވެ.
ދެން އެ އިރެއްގައި އެ ނަގަންޖެހޭ ޕްރޮފެޝަނަލް ޑިޒިޝަނަކީ (ނިންމުމަކީ) އެ ޕްރޮފެޝަނަލް ނިންމުމެއް. އޭގެ ސަބަބުން އެ ޓީމުގެ އޮފިޝަލުންނާއި ނޫނީ މެނޭޖްމަންޓާއި އަދި ކްލަބަކާ ވެސް އެއްވެސް ޒާތީ ކަމެއް ނުބާއްވަން.
މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ނިޒާމްބެ ބުންޏެވެ.
ދިރާގު ދިވެހި ޕްރިމިއަރ ލީގުގައި މާޒިޔާ އެއް ވަަނައިގައި އޮތީ ކުޅުނު 11 މެޗުން 25 ޕޮއިންޓާ އެކު އެވެ. ޓީސީ އޮތީ 12 މެޗުން ލިބުނު 13 ޕޮއިންޓާއެކު ލީގު ތާލަވްގެ 5 ވަނައިގައެވެ.
މާޒިޔާ އާއި ޓީސީ ކުޅޭ މެޗު ފަށާނީ މިރޭ 10 ޖަހާއިރު އެވެ.
