ލޯކަލް ކައުންސިލް އިންތޚާބުގެ ކެމްޕޭން ނިންމާލުން ފާހަގަ ކުރުމަށްޓަކާ، ރަސްދޫއަށް ދިޔަ، އެމްޑީޕީގެ ގައުމީ މަޖިލިހުގެ 14 މެމްބަރަކު، އުފުދުނު ބޮދެތި ހިންހަމަ ނުޖެހުންތަކާ ގުޅިގެން، ދަތުރު ފުރިހަމަ ނުކޮށް މާލެ އަތުވެއްޖެއެވެ.
ޚަބަރު އޮންލައިންއަށް މައުލޫމާތު ލިބިފައިވާ ގޮތުގައި، އެމްޑީޕީގެ ގައުމީ މަޖިލިހުގެ ގިނަ އަދަދެއްގެ މެމްބަރުތަކެއް ހިންހަމަ ނުޖެހުން އުފެދެން މެދުވެރިވީ ސަބަބަކީ، ރަސްދުއަށް ދަތުރުކުރި ސަފާރީތަކުގެ ތެރެއިން އެއް ސަފާރީއެއްގައި ދަތުރު ކުރި ގައުމީ މަޖިލިހުގެ މެމްބަރުން، އެރަށަށް ފޭބޭނެ އެއްވެސް އިންތިޒާމެއް ހަމަޖައްސާ ނުދީ، ރަސްދޫގައ ބޭއްވުނު އަލިވިލުން ޖަލްސާ ފެށިގެން ދިޔަ އިރުވެސް މިމެމްބަރުންނަށް ޖަލްސާގައިވެސް ބައިވެރިވުމުގެ ފުރުސަތު ޖަލްސާ އިންތިޒާމް ކުރިފަރާތްތަކުން ދީފައި ނުވާތިއެވެ.
ޚަބަރު އޮންލައިނާއި ވާހަކަ ދެއްކި ބައެއް މެމްބަރުން ވިދާޅުވި ގޮތުގައި، ޖަލްސާ ފެށިގެން ދިޔައިރުވެސް، މި މެމްބަރުންނަށް ޖަލްސާގައި ބައިވެރިވުމުގެ ފުރުސަތު ލިއްބައި ނުދީ، އަދި ރަސްދުއަށް ފޭބުމުގެ ފުރުސަތުވެސް ލިބިގެން ނުދިނުމުން އެ މެމްބަރުން، އެމްޑިޕީގެ ނާއިބު ރައީސްއައި ގުޅާ މިކަމުގެ ހިންހަމަ ނުޖެހުން ފާޅު ކޮށްފައި ވެއެވެ.
އެހެންނަމަވެސް، ރަސްދުގައި ބޭއްވުނު ފޯރިގަދަ އަލިވިލުން ޖަލްސާ ފެށެން ކައިރިވެފައި ވަނިކޮށް މި މެމްބަރުން، ލޯންޗަކަށް އަރައިގެން، ރަށްވެހި ފަތިސް ޓީޝާޓު ލައިގެން ޖަލްސާއަށް އައުމަށް އިވެންޓު އިންތިޒާމްކުރުމުގައި އިސްކޮށް އުޅުއްވި އިލްޔަސް ލަބީބު އެދުނު ކަމަށާއި، އެހެންނަމަވެސް، ޖަލްސާގެ ޑްރެސް ކޯޑެއް، އަދި ފެށޭގަޑިއެއް އަދި ޖަލްސާއަށް ދިއުމަށް މިމެމްބަރުންނަށް ދައުވަތެއްވެސް ދީފައި ނުވާކަމަށް މެމްބަރުން ވިދާޅުވެފައި ވެއެވެ.
ގައުމީ މަޖިިހުގެ ބައެއް މެމްބަރުން އެޕާޓީގެ ގައުމީ މަޖިލިސް ވަޓްސްއަޕް ގުރޫގައި ވިދާޅުވެފައިވަނީ، މިއީ ޖަލްސާއަށް ވަކި ބަޔަކަށް ހާޒިރު ވިޔަ ނުދިނުމަށް ސެލެކްޓިވް ޕްރޮސެސްއެއްގެ ތެރެއިން "ވަރަށް ހަޔާތްކުޑަ ކޮށް" ކޮށްފައި އޮތް ކަމެއް ކަމަށާއި އަދި މިކަމުގެ ޒިންމާ އުފުލަން ޖެހޭ ބަޔަކުވެސް ޕާާޓީގައި ތިބެން ޖެހޭނެ ކަމަށެވެ. އަދި މިއީ އެއްގޮތަކަށްވެސް ބަލައިގަނެވޭނެ ކަމެއް ނޫންކަމުގައިވެސް މިމެމްބަރުންގެ ތެރޭގައި ހިމެނޭ ބައެއް މެމްބަރުން ވަޓްސްއަޕް ގުރޫޕުގައި ލިޔުއްވާފައި ވެއެވެ.
އެމްޑީޕީގެ ގައުމީ މަޖިލީހުގެ 14 މެމްބަރަކަށް ޖަލްސާގައި ބައިވެރިވުމުގ ފުރުސަތު ގަސްތުގައި ގެއްލުވާލިކަމަށް ތުހުމަތު ކުރަމުން، މީގެ ތެރޭގައި ހިމެނޭ ބައެއް މެމްބަރުން ވަނީ، މިއި، ޖަލްސާއައް ނުދާނެ ކަމަށް ބަލައިގެން ތިބި ބައެއް މެމްބަރުން ޖަލްސާއަށް ދާން ނަންނޯޓު ކޮށްލުމުން އެެމެމްބަރުންނަށް ކުރި ޖެއްސުމެއްގެ ގޮތުގައިވެސް ސިފަ ކޮށްފައެވެ. އަދި މިއީ، މި މެމްބަރުންނަކީ، ގައުމި މަޖިލިހުގެ "ޕްލެޓިނަމް"، "ގޯލްޑް" އަދި "ސިލްވަރ" މެމްބަރުންނަށް ނުވާތީ ދިމާވި ކަމަކަށް ވެދާނެމަށްވެސް ގައުމީ މަޖިލިހުގެ ބައެއް މެމްބަރުން ވިދާޅުވެފައި ވެއެވެ.
މަޢުލުމާު ލިބިފައިވާ ގޮތުގައި، މިމެމްބަރުންނަށް ޖަލްސާގައި ބައިވެރި ވުމުގެ ފުރުސަތު ނުލިބުމާއި ގުޅިގެން، ލީަރޝިޕްގެ ބައެއް ބޭފުޅުންނާއި ވަރަށް ހޫނު ޒުވާބުތަކެއް މިމެމްބަރުންނައި ދެމެދު ހިގާފައި ވެއެވެ. އަދި، ރަސްދޫއަށް މި މެމްބަރުން ދަތުރުކުރި ސަފާރީގައި އެބުރި މާލެ އައުމަށް ބޭނުން ނުވާތީވެ، ޖަލްސާގައި ބައިވެރި ވެވަޑައިގަތުމަށްފަހު، އެބުރި މާލެ ވަޑައިގަތުމަށް، އިކޮނޮމިކް މިނިސްޓަރ ފައްޔާޒް އިސްމާއިލް ދަތުރު ކުރެއްވި ލޯޗުގައި މިމެމްބަރުން، ރޭގެ ދަންވަރުގެ ވަގުތެއްގައި ވަނީ އެބުރި މާލެ ވަޑައިގެންފައެވެ.
އެމްޑީޕީން ލޯކަލް ކައުންސިލް އިންތިޚާބު ކެމްޕެއިންގެ ނިމުން ފާހަގަކުރުމަށް ބޭއްވި މިޖަލްސާއަކީ، ކޯވިޑް19ގެ ހާލަތު ރާއްޖޭގައި ގޯސްވެގެން ގޮސްފައި ވިނަމަވެސް، މި ޖަލްސާ ބާއްވަން ކުޑަ ވަގުތު ކޮޅަކަށް ވެފައި ވަނިކޮށް، އެއްރަށުން އަނެއް ރަށަށް ކަރަންޓީނު ކުރުމަކާ ނުލާ ދަތުރުކުރުން އެޗްޕީއޭއިން މަނާކޮށްފަ އޮތް އޮތުން ނިމުމަކަށް ގެނައުމާއެކު ބޭއްވި ޖަލްސާއެކެވެ.
އަދި މި ޖަލްސާގައި އެމްޑީޕީގެ ބައެއް ވަޒީރުންވެސް ބައިވެރިވެ ވަޑައިގެންފައި ނުވާކަން ފާހަގަ ކޮށްލެވެއެވެ.
