ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ކޮވިޝީލްޑް ވެކްސިންގެ ދެވަނަ ޑޯޒް ޖައްސަވައިފި އެވެ.
ރައީސް ޞާލިޙް ވެކްސިންގެ ދެވަނަޑޯޒް ޖެއްސެވީ މާލޭގައި އެންމެ ފުޅާކޮށް ވެކްސިން ޖެހުމުގެ ކަންކަން ކުރިއަށްގެންދާ ސޯޝަލް ސެންޓަރުގައި ގާއިމްކޮށްފައިވާ ވެކްސިން ސެންޓަރުންނެވެ. އެމަނިކުފާނު ވެކްސިންގެ ފުރަތަމަ ޑޯޒްވެސް ޖެއްސެވީ، ރާއްޖޭގައި އެންމެ ފުރަތަމަ ވެކްސިން ދޭން ފެށި ދުވަހު ހަމަ އެ ސެންޓަރުންނެވެ.
ވެކްސިންގެ ދެވަނަ ޑޯޒް ޖެއްސެވުމަށްފަހު ކުރެއްވި ޓްވީޓެއްގައި ރައީސް ވަނީ ފުރަތަމަ ޑޯޒް ޖެހިފަހުން 8 ހަފްތާ ވެފައިވާ ފަރާތްތަކުން އަވަހަށް ދެވަނަ ޑޯޒް ޖެހުމަށް އިލްތިމާސްކުރައްވާފަ އެވެ. އަދި ވެކްސިންގެ ފުރަތަމަ ޑޯޒް އަދި މިހާތަނަށް ނުޖަހާ ފަރާތްތަކުންވެސް ވީއެންމެ އަވަހަށް ވެކްސިން ޖެހުމަށް ރައީސް ވަނީ އިލްތިމާސް ކުރައްވާފައެވެ.
Got my second shot of Covishield vaccine today. If eight weeks have passed since your first shot, please go get your second dose now.
Those who haven’t got their first dose of vaccine, please go and get your shot now. Together we can beat COVID19. #AaUmmeedhu#COVID19Dhifaau pic.twitter.com/5Xn0zxsr4s
— Ibrahim Mohamed Solih (@ibusolih) April 5, 2021
ކޯވިޑް-19އިން ދިފާޢުވުމަށް ޖަހާ ވެކްސިން ކޮވިޝީލްޑްގެ ދެވަނަ ޑޯޒް ދޭން ފަށާފައިވަނީ މިމަހުގެ 3 ވަނަ ދުވަހުއެވެ. ރާއްޖެއިން ކޯވިޑް ވެކްސިންގެ ދެވަނަ ޑޯޒް ޖެހި މީހުންގެ ޖުމްލަ އަދަދު އިއްޔެގެ ނިޔަލަށް ވަނީ 3737 އަށް އަރާފައެވެ.
މިމަހުގެ 3 ވަނަ ދުވަހުން ފެށިގެން އާއްމުކޮށް ހުޅުވާލައިގެން ވެކްސިންގެ ދެވަނަ ޑޯޒް ޖަހަން ފެށިނަމަވެސް އެޗް.ޕީ.އޭއިން މީގެ ކުރިން ވަނީ ޚާއްސަ ހާލަތްތަކުގައި ތިބި މީހުންނަށް ވެކްސިންގެ ދެވަނަ ޑޯޒް ޖަހައިދީފަ އެވެ.
ވެކްސިންގެ ދެވަނަޑޯޒް ދިނުން ކުރިއަށްގެންދަނީ ސޯޝަލް ސެންޓަރުގެ އިތުރުން، ނޭޝަނަލް އާޓްގެލެރީ، ހުޅުމާލޭ ވެކްސިން ސެންޓަރ، އަދި ސެނެހިޔާގައި ހެނދުނު 10:00 އިން މެންދުރުފަހު 3:00 އާ ހަމައަށެވެ. އަދި ވިލިމާލެ ޒުވާނުންގެ މަރުކަޒުގައި ވެކްސިން ދިނުން ކުރިއަށްދާނީ ހެނދުނު 10:00 އިން މެންދުރު 2:00 އާ ހަމައަށެވެ.
މީގެ އިތުރުން މާލެ ސަރަހައްދުގައި ވެކްސިންގެ ފުރަތަމަ ޑޯޒް މިހާރު ޖަހައިދެނީ ރައްޔިތުންގެ މަޖިލީހުގައި ގާއިމްކޮށްފައިވާ ވެކްސިން ސެންޓަރާއި ޓްރީޓޮޕް ހޮސްޕިޓަލުންނެވެ.
ކޮމެންޓު ފޮނުވާ