ސަލްމާން މިސްކިތް ރޯދައަށް ހުޅުވިގެން ނުދިޔުމަކީ ދެރަކަމެއް ކަަމަށް ވިދާޅުވެ މަޝްހޫރު ދީނީ ޢިލްމުވެރިޔާ އަލީ ޒައިދު ކަންބޮޑުވުން ފާޅުކޮށްފިއެވެ.
މި ރަމަޟާން މަހަށް ސަލްމާން މިސްކިތް ހުޅުވާނެކަމަށް ރައީސުލްޖުމްހޫރިއްޔާ ވިދާލުވެފައިވަނިކޮށް، އަނެއްކާވެެސް ސަރުކާރުން ވަނީ އެ މިސްކިތް ހުޅުވުން ފަސްކޮށްފައެވެ. ކުރީގެ ރައީސް އަބްދުއްﷲ ޔަމީން ޢަބްދުލްޤައްޔޫމް ބިނާކުރެއްވި ސަލްމާން މިސްކިތް ހުޅުވުން ސަރުކާރުން ފަސްކޮށްފައިވާއިރު، އެތަން ހުޅުވުމަށް އެކި ތާރީޚުތައް މިސަރުކާރުން ދިނެވެ. ނަމަވެސް ސަރުކާރު ދެ އަހަރާއި ބައި ވެގެން ދިޔައިރުވެސް އެތަން ހުޅުވާފައެއްނުވެއެވެ.
ޑރ.ޢަލީ ޒައިދު ވިދާޅުވީ، އެތައް ތާރީޚުތަކެއް ދީގެންވެސް ސަލްމާން މިސްކިތް ނުހުޅުވަމީ ދެރަކަމެއްކަަމށާއި، ރޯދައަށް ހުޅުވުމަކީ ވަރަށް ބޮޑު އިންތިޒާރެއްކަަމަށެވެ.
ސަލްމާން މިސްކިތް ރޯދައަށް ހުޅުވިގެން ނުދިޔުމަކީ ދެރަކަމެއް! ކުރިން ސަރުކާރުން ވިދާޅުވީ ޖެނުއަރީގެ ނިޔަލަށް ނިމޭނެޔޭ! ދެން ވިދާޅުވީ ރޯދަމަހަށޭ! ދެން މިހާރު ރޯދައަށްވެސް ނުހުޅުވޭނަމަ މިއީ ވ ދެރަކަމެއް! އެތައް ތާރީޚުތަކެއް އެބަފެނޭ މީގައި! ރޯދައަށް ހުޅުވުމަކީ ވ ބޮޑު އިންތިޒާރެއް!
— Ali Zaid (@alizaid1000) April 5, 2021
އިސްލާމިކް މިނިސްޓްރީން ބުނެފައިވަނީ މި ރޯދަ މަހަށް ވެސް މިސްކިތް ނުހުޅުވޭނެ ކަމަށެވެ. މިސްކިތުގައި އަދިވެސް ފުރިހަމަ ކުރަން ޖެހޭ ގިނަ މަސައްކަތްތަކެއް އެބަހުރިކަމަށް އެމިނިސްޓްރީން ބުނެއެވެ. އެކަމަށް ބޭނުންވާ ފައިސާ ހޯދުމުގެ މަސައްކަތް ކުރައްވަމުން ގެންދަވާ ކަމަށާއި، އެހެން ކަމުން މުޅި މިސްކިތް ފުރިހަމަކޮށްގެން މި ރޯދަ މަހަށް ނުހުޅުވޭނެ ކަމަށް އިސްލާމިކް މިނިސްޓްރީން ބުނެއެވެ.
ސަޢޫދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒް އާލް ސަޢުދުގެ އެހީގެ ދަށުން ބިނާކުރި “ކިންގް ސަލްމާން” މިސްކިތް ބިނާކުރުމުގެ މަސައްކަތް ފެށީ 2017ވަނަ އަހަރުގައެވެ.
5 ފަންގިފިލާއަށް ފަރުމާކޮށްފައިވާ ކިންގް ސަލްމާން މިސްކިތުގައި ނަމާދުކުރުމަށް ޚާއްސަ ބައެއްގެ އިތުރުން، އިސްލާމީ މަރުކަޒަކުން ލިބޭނެ ގިނަ ޚިދުމަތްތަކެއް ވަނީ ޤާއިމުކޮށްފައެވެ. މިސްކިތުގައި ނަމާދުކުރާ ބައިގެ ގޮތުގައި ޚާއްސަކޮށްފައިވަނީ ފުރަތަމަ ފުރަތަމަ ފަންގިފިލާއާއި ދެވަނަ ފަންގިފިލާއެވެ. މި ދެ ބައިގައި ގާތްގަނޑަކަށް 4000 މީހުންނަށް އެއް ފަހަރާ ނަމާދުކުރެވޭނެއެވެ.
ކޮމެންޓު ފޮނުވާ