ޖޯންސަން އެންޑް ޖޯންސަން ކުންފުނިން އުފައްދަމުންދާ ޖޯންސަން އެންޑް ޖޯންސަން ކޯވިޑް19 ވެކްސިންގެ 15 މިލިއަން ޑޯޒްގެ ވެކްސިން، އުފެއްދުމުގެ މަރުހަލާގައި ނުބައި މާއްދާއަކާ އެއްކުރެވިގެން، ބޭކާރުވެގެން ގޮސްފައިވަ ކަމަށް، އެމެރިކާގެ ނިއުޔޯކް ޓައިމްސްއިން ރިޕޯޓު ކޮށްފިއެވެ.

ނިއުޔޯކު ޓައިމްސްއިން އަންގާރަ ދުވަހު ރިޕޯޓު ކޮށްފައިވާ ގޮތުގައި، އެމެރިކާގައި ހުރި ޖޯންސަން އެންޑް ޖޯންސަން ކުންފުނީގެ ކާރުޚާނާގައި ހެދުނު މި ގޯހުގެ ސަބަބުން، އެކުންފުނިން ބާޒާރަށް ނެރެން ހަމަޖެހިފައިވާ ވެކްސިން ޝިޕްމަންޓްތައް އިތުރަށް ލަސްވެގެން ދާނެއެވެ.

އެމެރިކާގެ މެރީލޭންޑުގެ ބަލްޓިމޯރުގައި ހުންނަ، ބައޯ ސޮލިއުޝަންއިން ހިންގަމުންދާ މި ކާރުޚާނާގައި މަސައްކަތް ކުރާ މުވައްޒަފުންނަށް، ވެކްސިން އުފެއްދުމަށް ބޭނުންކުރާ ބައެއް މާއްދާތައް އެއް މާއްދާ އަނެއް މައްދާއާއި އެއްކުރެވިފައިވާ ކަމަށް ނިއުޔޯކު ޓައިމްސްއިން ރިޕޯޓު ކޮށްފައި ވެއެވެ.

އެމެރިކާ ސަރުކާރުގެ އޮފިޝަލުން ވަނީ، މިއީ ކާރުޚާނާގައި މަސައްކަތް ކުރާ މުވައްޒަފުންނަށް އޮޅުމަކުން ހެދިފައިވާ ގޯހެއްކަމަށް ވިދާޅުވެފައެވެ.

ނިއުޔޯކު ޓައިމްސްގައި ރިޕޯޓު ކޮށްފައިވާ ގޮތުގައި، ވެކްސިން އުފެއްދުމުގައި ހެދިފައިވާ މިގޯހުގެ ސަބަބުން، މިހާރު އެމެރިކާގެ އެކި ކަންކޮޅުތަކަށް ޖޯންސަން އެންޑް ޖޯންސަންއިން ފޯރުކޮށްދެމުންދާ ވެކްސިންތައް ފޯރުކޮށްދިނުމުގައި މާ ބޮޑު އަސަރެއް ނުކުރާނެއެވެ. އެހެންނަމަވެސް، ކުރިޔަށް އޮތްތަނުގައި، ބަލްޓިމޯރު ކާރުޚާނާއިން ސަޕްލައިކުރަން ހަމަޖެހިފައިވާ އެތައް މިލިއަން ޑޯޒެއްގެ ވެކްސިން ފޯރުކޮށްދިނުމުގައި މީގެ ސަބަބުން އިތުރު ލަސްކަމެއް އަންނާނެ ކަމަށްވެސް ރިޕޯޓު ކޮށްފައި ވެއެވެ.

ޖޯންސަން އެންޑް ޖޯންސަން ކުންފުނިން ބުދަ ދުވަހު ނެރެފައިވާ ބަޔާނެއްގައި ބުނެފައިވަނީ، އެމާރޖެންޓް ބައޯ ސޮލިއުޝަންއަށްގައި، "ކުއަލިޓީ ސްޓޭންޑާރޑަށް ނުފެތޭ ޑްރަގުގެ މާއްދާތަކެއް ކުއަލިޓީ ކޮންޓްރޯލަށް ފާހަގަ ކުރެވިފައި" ވާކަމަށެވެ. އެހެންނަމަވެސް، މީގެ ސަބަބުން އަސަރު ކޮށްފައިވަނީ، ޖޯންސަން އެންޑް ޖޮންސަން ކުންފުނިން އުފައްދަމުންދާ އެއް ޑޯޒް ވެކްސިންގެ ކިހާ އަދަދެއްގެ ވެކްސިނަކަށް ކަމެއް މި ކުންފުނިން ހާމަ ކޮށްފައެއް ނުވެއެވެ.

"ވެކްސިންގެ މި ބެޗް، ވެކްސިން އުފެއްދުމުގެ އެންމެ ފަހުގެ މަރުހަލާއާއި ހަމައަށް ގޮސްފައެއް ނުވޭ،" ކުންފުނިން ނެރުނު ބަޔާނުގައި ބުނެފައި ވެއެވެ. އަދި ބުނެފައިވަނީ، އެމާޖެންޓް ބައޯ ސޮލިއުޝަންއާއި އަދި އެމެރިކާގެ ފުޑް އެންޑް ޑްރަގް އޮތޯރިޓީއާއި ގުޅިގެން މިމައްސަލަ ހައްލުކުރުމަށް މިހާރު މަސައްކަތް ކުރެވެމުންދާ ކަމަށެވެ.

އަދި މިކުންފުނިން ބުނެފައިވަނީ، އެމަޖެންސީ ހުއްދަ ހޯދުމަށް މިޙާރުވެސް މަސައްކަތް ކުރެވެމުންދާ މި ކާރުޚާނާގައި ވެކްސިން އުފެއްދުން ބެލެހެއްޓުމަށް އިތުރު ތަޖުރިބާކާރުން ބައިތިއްބާގޮތަށް މިހާރުވަނީ ހަމަޖައްސާފައެވެ.

"އެމެރިކާގެ ޑިޕާޓްމަންޓް އޮފް ހެލްތު އެންޑް ހިއުމަން ސާވިސްގެ ލަފައާއެކު، ރައްކާތެރިކަމާއެކު ވެކްސިން ފޯރުކޮށްދިނުމަށް މިއެޅުނު ފިޔަވަޅުތަކާއެކު، އެއް ޑޯޒް ވެކްސިންގެ އިތުރު 24 މިލިއަން ވެކްސިން މި އެޕްރިލްމަހު ފޯރުކޮށްދެވޭނެ ކަމަށް އަހަރުމެން އުއްމީދު ކުރަން،" ޖޯންސަން އެންްޑް ޖޯންސަން ކުންފުނީގެ ބަޔާނުގައި ބުނެފައި ވެއެވެ.

އެމެރިކާގެ އާ ރައީސް ޖޯބައިޑް ރައީސްކަމާ ހަވާލު ވެވަޑައިގަތުމަށްފަހު، އެގައުމުގައި ވެކްސިން ދިނުން އަވަސްކުރުމަށް އެޅުއްވި ފިޔަވަޅުތަކަށް، ޖޯންސް އެންޑް ޖޯންސަން ކުންފުނިން އުފައްދަމުންދާ އެއް ޑޯޒްގެ ވެކްސިންގެ ސަަބަބުން ވަނީ ވަރަށްބޮޑު ކުރިއެރުމެއް ލިބިގެން ގޮސްފައެވެ.

މި ހަފްތާގެ އަންގާރަ ދުވަހުގެ ނިޔަލަށް އެމެރިރާގައިވަނީ 150.2 މިލިއަން ވެކްސިން ދީ، 54 މިލިއަން މީހުންނަށް ދެ ޑޯޒުގެ ވެކްސިންގ ދީ ފުރިހަމަ ކޮށްފައެވެ. އަދި ގައުމުގެ އެކި ކަންކޮޅުތަކަށް 200 މިލިއަން ޑޯޒްގެ ވެކްސިން މިހާރުވަނީ ފޯރުކޮށް ދެވިފައެވެ.