ޓޮޓްނަމުން ބޭލްއަށް ފުރިހަމަ އެއްބާރުލުން ލިބޭނެކަމަށް އެޓީމު ކޯޗު ހޯސޭ މޮރީނިޔޯ ބުނެފިއެވެ.
މި ސީޒަނުގައި ސްޕެއިންގެ ރެއާލްމެޑްރިޑުން ޓޮޓްނަމަށް ލޯނު އެއްބަސްވުމުގެ ދަށުން ބަދުލިވި އެކުލަބުގެ ކުރީގެ ތަރި ގެރެތް ބޭލް ޓޮޓްނަމްގައި ހިތްހަމަޖެހިގެން ހުރުމަކީ ކުލަބަށް ވަރަށް މުހިންމުކަމެއް ކަމަށް އެޓީމުގެ ހޯސޭ މޮރީނިޔޯ ބުނެއެވެ. ބޭލް ވަނީ އަނިޔާއިން މުޅުން ރަނގަޅުވެ ޓޮޓްނަމުން އިއްޔެ ބޭއްވި ފަރިތަކުރުންތަކުގައި ވެސް ބައިވެރިވެފައެވެ. ލީގުގައި މާދަމާރޭ ވެސްޓްހަމްއާ ދެކޮޅަށް ކުޅޭ މެޗުގައި ބޭލް ފެނުމުގެ ފުރުސަތު ބޮޑު ކަމަށް މޮރީނިޔޯ ބުނިއެވެ.
އޭނާ ބުނީ ބޭލްކުލަބާ ގުޅުނީ ކުލަބަށް އޭނާގެ އެހީތެރިކަން ބޭނުންޖެހިފަވާ ދަނޑިވަޅެއްގަ ކަމަށާއި ކުލަބުން އޭނާއަށް ފުރިހަމަ އެއްބާރުލުން ލިބޭނެކަމުގެ ޔަގީންކަން އަރުވާކަމަށެވެ. މޮރީނިޔޯ ބުނީ އެނާ ނިންމުތައް ނިންމާނީ ކުލަބަށާއި ކުޅުންތެރިޔާ އަށް އެންމެ ރަނގަޅު ގޮތް ބެލުމަށްފަހުކަމަށެވެ.
ބޭލްއަކީ ތަފާތު ކުޅުންތެރިޔެއް، އަދިވެސް އޭނާގެ މޮޅު ކުޅުން ދެއްކޭނެ، އޭނާ ހިތްހަމަޖެހިގެން ހުރުން އެއީ ކުލަބަށް އެންމެ ފައިދާ ބޮޑު ގޮތް.
– މޮރީނިޔޯ
ބޭލް ހަމަޖެހިގެން ކުލަބުގައި ހުރުމަކީ ޓޮޓްނަމް މިސީޒަނުގައި ވަރަށް މުހިންމު ކަމެއް ކަމަށާއި އެއީ ބޭލްގެ ކެރިއަރަށްވެސް މުހިންމުކަމެއް ކަމަށް މޮރީނިޔޯ ބުނެފައި ވެއެވެ.
ގައުމީ ޓީމަށް ބްރޭކްގެ ކުރިން ޓޮޓްނަމްއިން ވަނީ ވަރަށް ގާތްގާތުގައި މެޗުތަކެއް ކުޅެފައެވެ. އެގޮތުން 10 ދުވަސްތެރޭގައި ޓޮޓްނަމުން ވަނީ ފަސްމެޗު ކުޅެފައެވެ. ފަސްމެޗުގެ ތެރެއިން ހަތަރު މެޗު ޓޮޓްނަމުން ކާމިޔާބުކުރުމުނުގެ ފަހަތުގައި ވަނީ ކުޅުންތެރިން ކުރި ބުރަ މަސައްކަތް ކަމަށް މޮރީނިޔޯ ބުނިއެވެ.
މީގެ ކުރިން ޓޮޓްނަމްގެ ކުރީގެ ކޯޗު ހެރީ ރެޑްނެޕް ބުނެފަވަނީ މި ސީޒަންގައި މޮރީނިޔޯއާ އެކު ޓޮޓްނަމަށް ލީބު ކާމިޔާބު ކުރެވިދާނެކަމަށް ބުނެފައެވެ. މިވަގުތު ލީގުގައި ޓޮޓްނަމް އޮތީ 7 ޕޮއިންޓާއެކު ހަވަނަގައެވެ.
