އެމެރިކާގެ އެޓްލާންޓާ ސްޓޭޓުގައި ބަޑިން ހަމަލާ ދީ 8 މީހަކު މަރާލައިފިއެވެ.
މިހަމަލާތަކަށްފަހު މެޓްރޯ އެޓްލާންޓާގެ ޕޮލިހުންގެ ފަރާތުން މައުލުމާތު ދީފައިވާ ގޮތުގައި، ބަޑީގެ މިހަމަލާތަކުގައި 8 މީހަކު މަރުވެ އިތުރު އެކަކު ޒަޚަމް ވެފައިވާ ކަމުގައެވެ. އަދި މެޓްރޯ އެޓްލާންޓާގެ އިދާރާތަކުން މިހަމަލާތައް މިހާރު ތަހުގީގު ކުަމުންދާ ކަމުގައިވެސް ބުނެފައި ވެއެވެ.
ބަޑީގެ ފުރަތަމަ ދެ ހަމަލާ ހިގާފައިވަނީ، އެޓްލާންޓާ ސްޓޭޓްގެ އިރުއުތުގައި، ހުރި މަސާޖު ޕާލާރ ތަކެއްގެ ކައިރީގައެވެ. އިތުރަށް ހިގި ބަޑީގެ ހަމަލާތައް ހިގާފައިވަނީ، މި ސިޓީގެ ހުލަގުދެކުނުގެ ސަރަހައްދެއް ކަމުގައިވާ، ޗެރޮކީ ކައުންޓީގައެވެ.
މި ދެ ސަރަހައްދުގެ ކަމާގުޅޭ މުވައްސަސާތަކުންވެސް ބުނެފައިވަނީ، މި ތިން ހަމަލާގެ ހަގީގީ މަދުސަދެއް އަދި ހޯދިފައި ނުވާކަމަށާއި އަދި މި ހާދިސާތަކަކީ އެއް ހާދިސާ އަނެއް ހާދިސާއާއި ގުޅުންހުރި ހާދިސާތަކެއްކަންވެސް އަދި ޔަގީން ކުރެވިފައި ނުވާ ކަމަށެވެ.
އެހެންނަމަވެސް، ފުލުހުންގެ ފަރާތުން ބުނެފައިވަނީ، މިހަމަލާތަކާއި ގުޅޭ ތަހުގީގު މިހާރު ކުރިޔަށް ދަނީ، ތިން ހާދިސާއަކީވެސް އެއްހާދިސާ އަނެއް ހާދިސާއައި ގުޅިފައިވާ ހާދިސާތަކެއްކަމުގައި ބަލައިގެން ކަމުގައެވެ.
ފުލުހުން ބައެއް މީޑިއާތަކަށް މައުލުމާތު ދީފައިވާ ގޮތުގައި، އެޓްލާންޓާ ސްޓޭޓުގެ ޗެރިކޯ ކައުންޓީގައި ހިގި ބަޑީގެ ހަމަލާއާއި ގުޅުހުން ހުރިކަމަށް ޝައްކުކުރެވޭ މީހަކު މިހާރުވަނީ، އެޓްލާންޓާ ސްޓޭޓްގެ އިތުރުން، މި ކައުންޓީއާއި 150 މޭލު ދުރުގައި އޮންނަ ކްރިސްޕް ކައުންޓީން، ރޭގަޑު 8:30 ހާއިރު ހައްޔަރު ކޮށްފައެވެ. މި މީހާ ހައްޔަރު ކޮށްފައިވަނީ، ބަޑިހަމަލާތައް ހިގިތާ ދޮޅު ގަޑިއެއްހާ އިރު ފަހުންނެވެ.
"ތުހުމަތު ކުރެވޭ މިހާ ހައްޔަރުކޮށް މިހާރު ވަނީ، ކްރިސްޕް ކައުންޓީގެ ޖަލަށް ގެންދެވިފައި،" ފުލުހުންގެ އޮފިޝަލު މައުލުމާތު ދީފައި ވެއެވެ.
މިހަމަލާތަކާއ ގުޅިގެން އެޓްލާންޓާ ސްޓޭޓުގެ ސަލާމަތީ ފިޔަވަޅުތައް ވަރަށް ވަރުގަދަ ކޮށްފައިވާ ކަމަށް އެސްޓޭޓްގެ ސަލާމަތީ ޚިދުމަތްތަކާ ބެހޭ އިދާރާތަކުން ވަނީ ބުނެފައެވެ.
އަދި މީގެ އިތުރުން، ނިޔޯކް ސިޓީގެ ޕޮލިސް ޑިޕާޓްމަންޓުގެ ކްރިޓިކަލް ރެސްޕޮންޑް ކޮމާންޑްއިން ވަނީ، މިހަމަލާތަކާ ގުޅިގެން، އެޓްލާންޓާ ސްޓޭޓުގެ އޭޝިއާދަރިކޮޅަށް ނިސްބަތްވާ އާބާދީތަކުގެ ސަލާމަތަށްޓަކާ، އެ ޔުނިޓްމެ މެބަރުން އެސިޓީއަށް ފޮނުވާފައި ކަމަށް ނިޔޯކް ސިޓީގެ ޕޮލިސް ޑިޕާޓްމަންޓުގެ ކްރިޓިކަލް ރެސްޕޮންޑް ކޮމާންޑުގެ ތަރުޖަމާން ވިދާޅުވެފައި ވެއެވެ.
އެފްބީއައިގެ ތަރުޖަމާން ކެވިން ރޯވްސަން ވިދާޅުވެފައިވަނީ، މި ހަމަލާތަކުގެ ތަހުގީގަށް އެ މުވައްސަސާއިން ގެންދަނީ އެހީތެރިކަން ފޯރުކޮށް ދެމުންނެވެ.
