އިންޑިއާގައި މިހާތަނަށް، އެސްޓްރާޒެނެކާ ވެކްސިން ބޭނުން ކުރުމުގެ ސަބަބުން ލޭ ގަޑުވުމުގެ (ބްލަޑް ކްލޮޓް ވުން) އެއްވެސް މައްސަލައެއް ކުރިމަތިވެފައި ނުވިނަމަވެސް، ޔޫރަޕްގެ ގައުމުތަކުގައި މިވެކްސިންގެ ސައިޑް އިފެކްޓްތަކާ ގުޅޭގޮތުން ހުރި ކަންބޮޑުވުންތައް ބެލުމަށް އިންޑިއާއިން ނިންމައިފިއެވެ.
އިންޑިއާއިން އެސްޓްރާޒެނެކާ ވެކްސިނާ ގުޅޭގޮތުން ހުރި ކަންބޮޑުވުންތައް އިތުރަަށް ބެލުމަށް ނިންމާފައި މިވަނީ، މިވެކްސިން ބޭނުން ކުރުމުގައި ކަންބޮޑުވާން ޖެހޭފަދަ ކަންތައްތަކެއް ނެތްކަމުގައި ދުނިޔޭގެ ސިއްޙަތު ޖަމިއްޔާއިން ބުނެފައިވަނިކޮށްވެސް، ޔޫރަޕްގެ އެތައް ގައުމަކުން މިވެކްސިން ބޭނުންކުރަމުން ދިއުން ވަގުތީގޮތުން މަޑު ޖައްސާލާފައި ވަނިކޮށެވެ.
މިގޮތުން، ޑެންމާކު، ނޯވޭ އަދި އައިސްލޭންޑުންވަނީ، މިވެކްސިން ބޭނުން ކުރުމުގެ ސަބަބުން ބައެއް ފަރާތްތަތަކަށް ބްލަޑް ކޮލޮޓްވުމުގެ މައްސަލަ ދިމާވަމުންދާކަމުގެ ރިޕޯޓުތައް ލިބެން ފެށުމާއި ގުޅިގެން އެސްޓްރާޒެނެކާ ވެކްސިން ވަގުތީގޮތުން ބޭނުންކުރުން ހުއްޓާލާފައެވެ.
"އަހަރެމެން މިދަނީ މިވެކްސިންގެ ސަބަބުން ދިމާވެދާނެ އެއްވެސް މައްސަލައެއް ހުރިތޯ ބަލަމުން، މީގެތެރޭގައި މިވެކްސިންގެ ސަބަބުން އާދަޔާ ޚިލާފަށް ބަލިވެގެން އެއްވެސް މީހަކު ހޮސްޕިޓަލުގައި އެދުމަތި ކޮށްފައިވޭތޯ ބެލުމާއި އަދި މިވެކްސިން ދީގެން މީހަކު މަރުވެފައިވޭތޯވެސް ބަލަމުން މިދަނީ،" އިންޑިއަން ޓާސްކްފޯސް އޮން ކޯވިޑް19ގެ މެމްބަރެއް ކަމުގައިވާ އެން.ކޭ އަރޯރާ އޭފްޕީ ނޫހަށް ވިދާޅުވެފައި ވެއެވެ.
އިންޑިއާއިން ކުރިޔަށް ގެންދާ، ވެކްސިން ދިނުމުގެ ބިޔަ ޕްރޮގްރާމްގެ ތެރެއިން މިހާތަނަށް 28 މިލިއަން މީހުންނަށް ކޯވިޑް19 ވެކްސިން ދީފައިވާއިރު، މީގެ ތެރޭގައި ގިނައީ، އިންޑިއާގެ ސީރަމް އިންސްޓިޓިއުޓްގައި ތައްޔާރު ކޮށްފައިވާ އެސްޓްރާޒެނެކާގެ ވެކްސިނެވެ.
އަދި، އިންޑިއާގެ ވެކްސިްން ޑިޕްލޮމަސީގެ ދަށުން، ފާއިތުވެދިޔަ ހަފްތާތަކުގައި އެގައުމުންވަނީ އެސްޓްރާޒެނެކާގެ އެތައް މިލިއަން ވެކްސިން ޑޯޒުތަކެއް ދުނިޔޭގެ 70 އަށްވުރެ ގިނަ ގައުމަކަށް ފޯރު ކޮށްދީފައެވެ.
އަރޯރާ ވިދާޅުވެފައިވާ ގޮތުގައި، އިންޑިއާގައި ދެމުންދާ ކޯވިޑް19 ވެކްސިންތަކާއި ގުޅޭ މައްސަލަތައް ފެންނަމުންދަނީ ވަރަށްވެސް މަދުން ކަމަށާއި އަދި މިވެކްސިނާ ގުޅޭތުން މިވަގުތު އެއްވެސް ކަންބޮޑުވުމެއް ނެތްކަމުގައެވެ. އެހެންނަމަވެސް، އެސްޓްރާޒެނެކާ ވެކްސިން ބޭނުންކުރުމުން ކުރިމަތިވާކަމަށް ބުނެވޭ މައްސަލަތައް ހަގީގަތުގައިވެސް ހުރިތޯ ބެލުމުގެ މަސައްކަތް މިހާރު ކުރިޔަށްދާ ކަމުގައި އޭނާ ވިދާޅުވިއެވެ.
"އިއްޔެއާއި ހަމައަށް ހަމައެކަނި ފާހަގަ ކުރެވިފައިވަނީ، 59 ނުވަތަ 60 ވަރަކަށް މަރު. މިހުރިހާ މަރަކީވެސް އިއްތިފާގަކުން ކުރިމަތިވެފައިވާ މަރުގެ ހާދިސާތައް،" އަރޯރާ ވިދާޅުވިއެވެ.
"ހުރިހާ ތަހުގީގެއް ކުރިޔަށް ގެންދެވި މުޅިން ނިމުނީމަ، ތަހުގީގާގުޅުންހުރި ހުރިހާ މައުލޫމާތެއް އާންމެ ކުރެވިގެން ދާނެ، އެ މައުލުމާތު ހެލްތު މިނިސްޓްރީގެ ވެބްސައިޓުގައި ފެންނަން ހުންނާނެ،" އޭނާ އިތުރަށް ވިދާޅުވިއެވެ.
ބާރު މިނުގައި އިންޑިއާގައި ފުޅާވަމުންދާ ވެކްސިން ޕްރޮގްރާމްގައި އެގައުމުގައި ބޭނުން ކުރަމުންދަނީ، އެސްޓްރާޒެނެކާ ވެކްސިންގެ އިތުރުން އެގައުމުގެ ވެކްސިން އުފައްދާ އެންމެ ބޮޑު ކުންފުނި ކަމުގައިވާ ބަރާތު ބައޯޓެކްއިން އުފައްދާފައިވާ ކޯވެކްސްއިން ވެކްސިނެވެ.
