އިންޑިއާގެ ޓަމިލް ނެޑޫއަށް ނިސްބަތްވާ އުމުރުން 74 އަހަރުގެ ބަލަސްބުރަމަނިއާ ކުމާރް ނަމަކަށް ކިޔާ މީހަކު މަރުވެއްޖެ ކަމަށް ނިންމައި، އޭނާ އައިސް ފޮއްޓެއްގައި ބޭއްވީ "މަރާލަން" ކަން ހާމަވެއްޖެ އެވެ.
އޭނާ މަރުވެއްޖެ ކަމަށް ކަނޑައަޅައި އެ ފޮއްޓަށް ލީ އޭނާގެ ކޮއްކޮ ސަރްވަނަން އެވެ. ކުމާރް ސަލާމަތްކޮށް ފުލުހުން ވަނީ އޭނާ ހޮސްޕިޓަލަށް ގެންގޮސްފައެވެ. އިންޑިއާގެ މީޑިއާތަކުން ރިޕޯޓްކޮށްފައިވާގޮތުގައި ކުމާރް ދިރިއުޅެމުން ގޮސްފައި ވަނީ އޭނާގެ ކޮއްކޮ ސަރްވަނަން އާއެކުގައެވެ. އަދި އޮކްޓޯބަރ 12 ވަނަ ދުވަހު އޭނާ ވަނީ ބޭބެ މަރުވެއްޖެ ކަމަށް ބުނެ ކުންފުންޏަކަށް ގުޅައި، ގެއަށް ފްރީޒަރ ފޮއްޓެއް ގެނެސްދިނުމަށް އެދިފައެވެ.
އެ ފްރީޒާ ބޮކްސް ލިބުމުން ސަރްވަނަން އާއި އޭނާގެ އާއިލާ މީހުން ކުމާރް އޭގެ ތެރެއަށް ލާފައި އެއް ރޭ ވަންދެން ބޭއްވިއެވެ. އަދި އޭނާ މަރުވެއްޖެ ކަމަށްވެސް އެންގިއެވެ. ނަމަވެސް އޭގެ އަނެއް ދުވަހު ފްރީޒަރު ކުންފުނީގެ ސްޓާފުން އެ ފޮށި ބަލައި އައިރު، އޭގެ ތެރޭގައި އޮތް ކުމާރް ނޭވާ ލައެވެ. އަދި އޭނާ އޮތީ މަރު ނުވެއެވެ.
މިކަން އަވައްޓެރިން ފުލުހުންގެ ސަމާލުކަމަށް ގެނައެވެ. ފުލުހުން ބެލި ބެލުމުން އެނގުނުގޮތުގައި، އާއިލާ މީހުން ތިބީ އޭނާ މަރުވަންދެން އެ ފޮށީގައި ބައިތިއްބައިގެންނެވެ. ފުލުހުން ވަނީ އޭނާގެ އާއިލާއާ ދެކޮޅަށް މައްސަލައެއް ފައިލްކޮށްފައެވެ. އަދި އެކަން ބަލަމުންދާނެ ކަމަށްވެސް ފުލުހުން ބުނެފައި ވެއެވެ.
