ފާއިތުވެދިޔަ އަންގާރަދުވަހު ހައްޔަރުކޮށް، ޖަލަށް ލެވިފައިވާ މިޔަންމާގެ ކުރީގެ ސްޓޭޓް ކައުންސިލަރ އަންސަންގ ސޫކީގެ އެންއެލްޑީ ޕާޓީގެ އިސް އޮފިޝަލަކު ޖަލުގައި މަރުވެއްޖެއެވެ.
މީޑިއާ ރިޕޯޓުތައް ބުނާގޮތުގައި، ޖަލުގައި ހައްޔަރު ކޮށްފައި ވަނިކޮށް މަރުވެފައިވާ ޒޯ މިޔަޓް ލިންއަކީ ޖަލަށް ލެވިފައިވަނިކޮށް ފަހަކަށް އައިސް މަރުވެފައިވާ އެންއެލްޑީއަށް ނިސްބަތްވާ ދެވަ އޮފިޝަލެވެ.
މިހާރު އުވާލެވިފައިވާ، މިޔަންމާގެ ގާނޫނު ހަދާ މަޖިލިހުގެ މަތި ގޭގެ މެމްބަރެއްކަމުގައިވާ ބާ މިޔޯ ތެއިން ވިދާޅުވެފައިވަނި ޒޯ މިޔަޓް ލިން މަރުވެފައިވަނީ މި ހަފްތާގެ ހޯމަދުވަހުގެ ރޭ ދަންވަރު މިޔަންމާރގެ ފުލުހުން އޭނާ ހައްޔަރުކޮށްފައި ވަނިކޮށް ކަމުގައެވެ.
"އޭނާ ގެންދިޔައީ މެދުކެޑުމެއްނެތި، ހިގަމުންދާ މުޒާހިރާތަކުގައި ބައިވެރިވަމުން،" ބާ މިޔޯ ތެއިން ވިދާޅު ވިއެވެ. "މިހާރު އޭނާގެ އާއިލާއިން މަސައްކަތް ކުރަމުންދަނީ، އަސްކަރީ ހަސްފަތާލެއްގައި އޮތް އޭނާގެ ހަށިގަޑު އަބުރާ ހޯދުމުގެ މަސައްކަތް."
މިޚަބަރާ ގުޅޭ އެއްވެސް މަޢުލުމާތެއް މިޔަންމާރގެ އަސްކަރިއްޔާއިންވެސް އަދި ޕޮލިހުންވެސް މީޑިއާތަކަށް ދީފައެއް ނުވެއެވެ.
މިޔަންމާގެ އެންމެ ބޮޑު ސިޓީގައި ވޮކޭޝަނަލް އިންސްޓިޓިއުޓެއް ހިންގަމުންދާ ޒޯ މިޔަޓް ލިންއަކީ، ޖަލުގައި ބަންދު ކުރެވުނު ފަހުން މަރުވެފައިވާ އެންއެލްޑީއަށް ނިސްބަތްވާ ދެވަނަ އޮފިޝަލެވެ. އެންއެލްޑީގެ ކެމްޕެއިން އޮފިޝަލެއްގެ ގޮތުގައި މަސައްކަތް ކުރިން، އެ ޕާޓީގެ އޮފިޝަލެއްކަމުގައިވާ ޚިން މައުންގ ލަޓްވެސް ވަނީ، ފާއިތުވެދިޔަ ހޮނިހިރދުވަހު ފުލުހުން ހައްޔަރުކޮށް ޖަލުގައި ބަންދު ކޮށްފައި ހުއްޓާ މަރުވެފައެވެ.
ފާއިތުވެދިޔަ ފެބްރުއަރީ މަހުގެ 1 ވަނަ ދުވަހު މިޔަންމާގެ ވެރިކަން ކުރަމުންއައި ސަރުކާރު ބަދަލުކޮށް، އެންއެލްޑީގެ ލީޑަރު އަންގް ސަންގ ސޫކީއާއި އެޕާޓިގެ ގިނަ މެމްބަރުން ހައްޔަރުކޮށް، ޕާލަމެންޓު އުވާލާ، އަސްކަރިއްޔާއިން ގެނައި ބަޢާވާތައްފަހު، އެގައުމުވަނީ އިންތިހާއަށް މަހަނުޖެހުން އުފެދިފައެވެ. އަދި އެއަށްފަހު ކޮންމެ ދުވަހަކު ކަހަލަ ގޮތަކަށް މިޔަންމާރގައިދަނީ ބޮޑެތި މުޒާހިރާތައް ކުރެވެމުންނެވެ. އަދި މަދަނީ ބަސް ނޭހުމަކަށްގޮސް، ސިވިލްސާވިސްގެ އިތުރުން އަމިއްލަ ވަޒީފާތަކުގައި މަސައްކަތް ކުރާ އެތައްބަޔަކުވެސް ވަނީ މަސައްކަތް ހުއްޓާލުމަށްފަހު މުޒާހިރާތަކަށް ނިކުމެފައެވެ.
މިޔަންމާގެ ބޮޑެތި ހުރިހާ ސިޓީތަކުގައި ރޭގަޑުގެ ވަގުތުތަކުގައި ކާފިއު ހިންގާ އަދި، ގިނަ ސަރަހައްދުތަކުން އިންޓަރނެޓް ކަޑާލަމުންދާތާ 24 ދުވަހަށްވުރެ ގިނަދުވަސް ފާއިތުވެގެން ގޮސްފައިވި ނަމަވެސް، ޕޮލިހުންނާ ދެކޮޅަށް މަގުތަކަސް ނިކުންނަ ރައްޔިތުން މިޔަންމާގައި ދަނީ ދުވަހެއް ދުވަހަކަށް އިތުރުވަމުންނެވެ.
މިހަމަ ނުޖެހުންތަކުގައި މިހާތަނަށް އައިއިރު 60 އަށްވުރެ ގިނަ މީހުންމަރުވެފައި ވާއިރު، 2،000 އަށްވުރެ ގިނަ މީހުން މިޔަންމާރގެ އަސްކަރީ ސރުކާރުންވަނީ ހައްޔަރު ކޮށްފައެވެ.
ޖަލުގައި ހައްޔަރު ކޮށްފައިވަނިކޮށް މަރުވެފައިވާ ޒޯ މިޔަޓް ލިންގެ ގާތް ރަހުމަތްތެރިޔަކު ކަމުގައިވާ މައުންގ ސައުންޙާ ބައެއް މީޑިއާތަކަށް މައުލޫމާތު ދީފައިވާ ގޮތުގައި، އޭނާގެ ހަށިގަޑާ ހަވާލުވުމަށް ހޮސްޕިޓަލަށް އައުމަށް އޭނާގެ އަންގާފައިވި ނަމަވެސް، އޭނާ މަރުވި ސަބަބެއް ރަސްމީކޮށް އަދިވެސް އާއިލާއަށް އަންގާފައި ނުވާކަމަށެވެ. އެހެންނަމަވެސް، ބަނޑުގައި ބޮޑު އަނިޔާއެއް ލިބިފައިވާ ފާރުގަޑެއް ހުރިކަމުގެ މައުލޫމާތު އޭނާގެ އަންހެނުން ދީފައިކަމަށާއި، އަދި އެއީ ފެންސެއްގެ މަތިން އަރައިގެން ފިލަން އުޅެނިކޮށް ލިބިފައިވާ އަނިޔާއެއްކަމުގައި އަސްކަރިއްޔާއާއި ހަވާލާދީ ބައެއް މީޑިއާތަކުން ރިޕޯޓު ކޮށްފައި ވެއެވެ.
