މިޔަންމާގައި ހިންގަމުންއައި ޑިފެންސް ޕްރޮގްރާމް ސަސްޕެންޑުކޮށް، ހުރިޙާ އެހީތަކެއް ހުއްޓާލައިފި

އޮސްޓްރޭލިއާ ސަރުކާާރުން މިޔަންމާއާއެކު ބާއްވަމުންއައި އަސްކަރީ ހުރިހާ ގުޅުންތަކެއް ކަޑާލާ، އަދި އެގައުމަށް ފޯރުކޮށްދެމުންއައި އިންސާނީ ހުރިހާ އެހީތަކެއް މެދުކަޑާލައިފިއެވެ.

މިޔަންމާރއާއި ދެކޮޅަށް އޮސްޓްރޭލިއާއިން މިފިޔަވަޅުތައް އަޅާފައިވަނީ، ފާއިތުވެދިޔަ ފެބްރުއަރީމަހު، އެގައުމުގައި ގެނެސްފައިވާ މިލިޓަރީ ބަޢާވާތުގެ ސަބަބުންނާއި އަދި މިޔަންމާރއިން އޮސްޓްރޭލިއާރަގެ ރައްޔިތަކު ހައްޔަރުކޮށް، ހިފަހައްޓައިގެން ގެންގުޅެމުން ދާދިއުމުގެ ސަބަބުންނެވެ.

އޮސްޓްރޭލިއާގެ ޚާރިޖީ ވަޒީރު މެރިސް ޕައިން ވިދާޅުވި ގޮތުގައި، ފާއިތުވެދިޔަ ފެބްރުއަރީމަހުގެ ކުރީކޮޅު ހައްޔަރުކޮށްފައިވާ އެގައުމުގެ އިކޮނޮމިކް ޕޮލިސީ އެޑްވައިޒަރ ސީން ޓާރނެލް އާއި، އޭނާގެ އާއިލާގެ މީހުންނަށާއި އަދި ޑިޕްލޮމޭޓުންނަށްވެސް ގުޅާއިގެން ވާހަކަދެއްކިފައިވަނީ، ހައްޔަރު ކުރިފަހުން އެންމެ ދެފަހަރުއެވެ.

ޚާރިޖީ ވަޒީރު ވިދާޅުވެފައިވަނީ، ހައްޔަރުކޮށްފައިވާ އިކޮނޮމިކް ޕޮލިސީ އެޑްވައިޒަރާ ގުޅުމަށް ލިބިފައިވަނީ، "ވަރަށް ހަނި ކޮންސިއުލާ ފުރުސަތެއް،" ކަމުގައެވެ.

އާދީއްތަ ދުވަހު، އޮސްޓްރޭލިއާއިން ވަނީ، 5 އަހަރު ދުވަހުގެ މުއްދަތަށް މިޔަންމާރގައި އެގައުމުން ހިންގަމުންއައި، 1.2 މިލިއަން ޑޮލަރުގެ އަގުހުރި ޑިފެންސް ޓްްރެއިނިންގ ޕްރޮގްރާމް ހުއްޓާލުމަށް ނިންމާފައިވާކަންވެސް އިއުލާން ކޮށްފައެވެ. މިޕްރޮގްރާމަކީ، ހަގުރާމައިގެ ހުނަރުތައް ނުހިމެނޭ ގޮތަށް، އިގިރޭސިބަސް ދަސްކޮށްދިނުން ފަދަ ކަންކަމަށް ޚާއްސަކުރެވިގެން ހިންގަމުން އައި ޕްރޮގްރާމެކެވެ.

އަދި މީގެ އިތުރުން، އޮސްޓްރޭލިއާއިން މިޔަންމާއަށް ފޯރުކޮށްދެމުންދާ އިންސާނީ އެހީތަކުގެ ތެރެއިން، މިޔަންމާ ސަރުކާރަށާއި އަދި ސަރުކާރާ ގުޅުންހުރި ފަރާތަކާ ހަމައަށް ފޯރަމުންއައި ހުރިހާ އެހީއެއްވެސް އޮސްޓްރޭލިއާ ސަރުކާރުންވަނީ ހުއްޓުމަކަށް ގެނެސްފައެވެ.

ފޮރިންގ މިނިސްޓަރ ޕައިން ވިދާޅުވެފައިވަނީ، އޮސްޓްރޭލިއާއިން މިޔަންމާރއަށް ފޯރުކޮށްދެމުން އައި އިންސާނީ އެހީތަކުގެ ތެރެއިން ދެން އެހީލިބެމުންދާނީ މިޔަންމާރގެ ސަރުކާރާ އެއްވެސް ގުޅުމެއްނެތް، އެގައުމުގެ ނިކަމެތި ފަގީރުންނާށާއި، އަދި މީގެއިތުރުން ރޮހިންގޔާ ދަރިކޮޅުގެ މުސްލިމުންނަށާއި މިނޫނަސް މިފަދަ ބައިމަދު ނަސްލުތަކަށް ނިސްބަތްވާ މީހުންނަށް ކަމަށެވެ.

ހޯމަ ދުވަހުވެސް މިޔަންމާރގެ ސަލާމަތީ ބާރުތަކުންވަނީ، ބާޢާވާތާ ދެކޮޅަށް މުޒާހިރާ ކުރަމުންދާ ފަރާތްތަކާ ދެކޮޅަށް ބާރުގެ ބޭނުން ކޮށްފައެވެ. މިގޮތުން ފުލުހުންވަނީ މިދުވަހުވެސް، ވެރިރަށް ނައިޕިޓޯގައި މުޒާހިރާ ކުރަމުންދިޔަ 1،000 މީހުންނާ ދެކޮޅަށް ކަރުނަގޭސް ބޭނުން ކޮށްފައެވެ.

މިޔަންްމާގެ އަސްކަރީ ސަރުކާރުން ބަޢާވާތެއް ގެނެސް، އަގައުމުގެ ޑިމޮކްރަޓިކް ސަރުކާރު ވައްޓާލައި، ފާއިތުވެދިޔަ އާންމު އިންތިޚާބު ކާމިޔާބުކުރި އަންގސަންގ ސޫކީ ހައްޔަރު ކޮށްފައިވަނީ ފާއިތުވެދި ފެބްރުއަރީމަހުގެ 1 ވަނަ ދުވަހުއެވެ. އަދި އަސްކަރީ ސަރުކާރުންވަނީ، އެއަށްފަހު އަންގސަންސޫކީއާއި އެކަމަނާގެ ޕާޓީގެ އިސްވެރިންގެ މައްޗަށް ދައުވާ އުފުލާފައެވެ.

އަސްކަރީ ބަޢާވާތާ ދެކޮޅަށް އެގަމުގެ އެތައްހާސް ރައްޔިތުން ކުރަމުންދާ މުޒާހިރާތަކުގައި މިހާތަނަށް އެތައްބަޔަކުވަނީ މަރުވެފައެވެ. އަދި އެމެރިކާއާއި ހުޅަގުގެ ގައުމުތަކުން މިހާރުވަނީ މިޔަންމާރއާއި ދެކޮޅަށް ދަތިކުރުމުގެ ފިޔަވަޅުތައްވެސް އަޅާފައެވެ. އެހެންނަމަވެސް، މިޔަންމާގެ ބަޢާވާތް ޔޫއެންއިން ކުއްވެރިކޮށްފައިވި ނަމަވެސް، ޗައިނާގެ ދެކޮޅު ހެދުންތަކާއެކު، ޔޫއެންއަށް ވަނީ މިޔަންމާރއާއި ދެކޮޅަށް ދަތުކުރުމުގެ ފިޔަވަޅުތައް އެޅުމުގައި ނާކާމިޔާބު ވެފައެވެ.

ޗައިނާއިން ބުނެފައިވަނީ މިޔަންމާގައި ހިގަމުންދަނީ އެގައުމުގެ އެތެރޭގެ މަސްލަހަތާ ގުޅުންހުރި ކަންކަން ކަމުގައެވެ.