ސީރިއާގެ ރައީސް ބައްޝާރުލް އަސަދުއާއި އަބިކަބަލުން އަސްމާ ކޯވިޑް19އަށް ޕޮޒިޓިވް ވެފައިވާކަމަށް، ރައީސް އޮފީހުން ނެރުނު ބަޔާނެއްގައި ބުނެފިއެވެ.
ރައީސް އޮފީހުން ނެރުނު ބަޔާނުގައި ބުނެފައިވަނީ، ކޮވިޑް19އަށް ޕޮޒިޓިވް ވެފައިވޭތޯ ބެލުމަށް ޕީސީއާރު ޓެސްޓު ހެދުމުގެ ކުރިން ބައްޝާރުލް އަސަދުއާއި އަނބިކަބަލުން އަސްމާގެ ކިބައިން ކޯވިޑްގެ އަލާމާތްތައް ފެންނަން ފަށާފައިވާ ކަމަށެވެ.
މިބަޔާނުގައި ބުނެފައިވަނީ، އުމުރުފުޅުން 55 އަހަރުގެ އަސަދު ހުންނެވީ"ހެޔޮ ހާލުކޮޅުގައި" ކަމަށެވެ. އަދި އެބުރި އޮފީހަށް ވަޑައިގެންނެވުމުގެ ކުރިން ދެމަފިރި ކަނބަލުންވެސް 2 ހަފްތާއާއި3 ހަފްތާއާއި ދެމެދުގެ މުއްދަތެއް ކަރަންޓީނުގައި ހޭދަކުރައްވާނެ ކަމަށްވެސް ރައީސް އޮފީހުން ނެރެފައިވާ ބަޔާނުގައި ބުނެފައިވެއެވެ.
ސީރިއާގައި މިހާތަނަށް އައިއިރު، 15،981 މީހުން ކޯވިޑް19އަށް ޕޮޒިޓިވް ވެފައި ވާއިރު، މިބަލީގައި 1،063 މީހުންވަނީ މަރުވެ ގޮސްފައެވެ.
މިއަަހަރުގެ ފެބްރުއަރީމަހުން، ރަޝިއާގެ ވެރިރަށް މޮސްކޯގައި ހުންނަ ސީރިއާގެ އެމްބަސީއިން ބުނެފައިވަނީ، ރަޝިއާއިން އުފައްދާފައިވާ ސްޕުންޓިކްV ވެކްސިން ބޭނުންކުރުމުގެ ހުއްދަ އެގައުމުގެ ސަރުކާރުން ދީފައިވާ ކަމުގައެވެ.
