އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން، އިރާގުގައި ހިފެހެއްޓިފައިހުރި، އިރާނުގެ އެތައް ބިލިއަން ޑޮލަރެއް ދޫކުރުމުހެ ހުއްދަ އެމެރިކާއިން ދީފައިވާ ކަމަށް، އިރާނުގެ އޮފިޝަލުން ވިދާޅުވެއްޖެއެވެ.

އިރާގުގެ އޮފިޝަލުންނާ ހަވާލާދީ، އިރާން-އިރާގް ޖޮއިންޓް ޗެމްބަރ އޮފް ކޮމާސްގެ މެމްބަރެއް ކަމުގައިވާ ހާމިދު ހުސެއިނީ ވިދާޅުވި ގޮތުގައި، ވޮޝިންޓަންއިން، ޓްރޭޑް ބޭންކް އޮފް އިރާގްގައި ހިފަހައްޓާފައިވާ އިރާނުގެ އެސެޓްތައް ދޫކޮރުމުގެ ހުއްދަ އެމެރިކާއިން މިހާރުވަނީ ދީފައެވެ.

"ވަރަށް ގިނަ ޓަރާންސެކްޝަންތަކެއް މިހާރުވަނީ ހަދާ ނިންމާފަ،" މި ޓްރާންސެކްޝަން ތަކުގެ އަދު ހާމަ ނުކޮށް، ހުސެއިނީ އޭނާގެ ޓުވިޓަރގައި ލިޔެފައި ވެއެވެ.

އެމެރިކާއިން އިރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން، ގައުމުން ބޭރުގެ ބޭންކުތަކުގައި ހިފެހެއްޓިފައިވާ އެތައް ބިލިއަން ޑޮލަރެއްގެ އެސެޓްރައް އިރާނަށް ލިބުނަ ނުދީ ވަނީ ހިފެހެއްޓިފައެވެ.

އިރާނުގެ އޮފިޝަލުން މައުލޫމާތު ދީފައިވާ ގޮތުގައި، އިރާގުގައި އެކަނިވެސް، އެމެރިކާގެ ދަތިކުރުމުގެ ފިޔަވަޅުތަކުގެ ސަބަބުން ހިފެހެއްޓިފައިވާ ފައިސާގެ އަދަދު 6 ބިލިއަން ޑޮލަރަށްވުރެ މައްޗަށް އަރައެވެ.

ހުސެއިނީ ވިދާޅުވި ގޮތުގައި، ހިފެހެއްޓިފައިވާ އިރާނުގެ އެސެޓްތައް ދޫކުރުމުން، ކުރިޔަށް އޮތް، އިރާނުގެ އާަހަރު ފެށިގެންދާއިރު، އަދި ވަކީން ޚާއްސަކޮށް ކުރިޔަށް އޮތް ރޯދަމަހަށް އިރާނުގެ ރައްޔިތުންނަށް ބޭނުންވާ އަސާސީ ތަކެތި ހޯދުމުގައި ވަރަށް ބޮޑުތަނުން މަގުފަހި ވެގެންދާނެއެވެ،

އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކުގެ ދަށުން، އިރާގުން ގަންނަ އިރާނުގެ ގޭހަށް ދައްކާ ފައިސާ ޖަމާކުރަންޖެހެނީ، ޓްރޭޑް ބޭންކް އޮފް އިރާގުގައި ހުޅުވާފައިވާ ޚާއްސަ އެކައުންޓަކަށެވެ. އަދި މިފައިސާ އިރާނަށް ބޭނުން ކުރެވެނީ ހަމައެކަނި އަސާސީ ބޭނުންތަކަށް ބޭނުންކުރާ ތަކެތި ގަތުމަށް އެކަންޏެވެ.

ފާއިތު ވެދިޔަ އަހަރުގެ އޮކްޓޯބަރުމަހު، އިރާން-ސައުތު ކޮރެއާ ޗެމްބަރ އޮފް ކޮމާސްއިން ބުނެފައިވަނީ، ސައުތު ކޮރެއާގައި ހިފެހެއްޓިފައިވާ 8.5 ބިލިއަން އެމެރިކާ ޑޮލަރު ދޫކުރުމާމެދު ގޮތެއް ނިމިގެން ދާނީ، އެމެރިކާގެ ރިޔާސީ އިންތިޚާބުގެ ނަތީޖާ ނިކުމެގެންދާ ގޮތެއްގެ މައްޗަށް ކަމަށެވެ.

އެމެރިކާގެ ކުރީގެ ރައީސް ޑޮލަންޑް ޓްރަމްޕްގެ ވެރިކަމުގައި، 2018 ވަނަ އަހަރު، އިރާންއާއި ދުނިޔޭގެ ބޮޑެތި ބާރުތަކާއެކީ ހަދާފައިވާ ނިއުކުލިއަރ އެއްބަސްވުމުން އެމެރިކާ ބޭރުވެ، އިރާނާ ދެކޮޅަށް ދަތިކުރުމުގެ ފިޔަވަޅުތައް ވަރުގަދަ ކުރުމާއިގުޅިގެން، އިރާންގެ އިގްތިސާދަށް ވަނީ ބޮޑެތި ނޭދެވޭ އަސަރުތަކެއް ކޮށްފައެވެ.

ފާއިތުވެދިޔަ މަހު، ސައުތު ކޮރެއާއިން ބުނެފައިވަނީ، އެގައުމުގެ ބޭންކުތަކުގައި ހިފެހެއްޓިފައިހުރި އިރާނުގެ އެސެޓްތައް ދޫކުރުމާ ގުޅޭގޮތުން އިރާނާއެކީ އެއްބަސްވުމަކަށް އާދެވިފައިވާ ކަމަށެވެ. އެހެންނަމަވެސް، މިފައިސާ ދޫކުރުމަށް ހަމަޖެހިފައިވަނީ، އެމެރިކާއިން ހުއްދަ ހޯދުމަށްފަހުއެވެ.