ދެވަނަ ދަރިފުޅު ވިހެއުމަށްފަހު ކަރީނާ ކަޕޫރު ފުރަތަމަ ފަހަރަށް ބެލުންތެރިންނަށް އޭނާގެ މޫނު ދައްކާލައިފި އެވެ.
އެގޮތުން އޭނާ ވިހެއިތާ އެއް ހަފްތާފަހުން ބެލުންތެރިންނާއި ހިއްސާކޮށްލާފައިވަނީ އޭނާގެ ހިތްގައިމު ސެލްފީއެކެވެ.
ކަރީނާ ކަޕޫރު ހިއްސާ ކޮށްފައިވާ މި ފޮޓޯއިން އޭނާ ފެނިގެންދަނީ ވަރަށް ރޭޑިއަންޓް ކޮށެވެ. އެގޮތުން އޭނާގެ މި ފޮޓޯ އިތުރަށް ފުރިހަމަ ވަނީ އޭނާ އަޅާފައިވާ ތޮތްޕާއި ކަޅުކުލައިގެ އަވި އައިނުންނެވެ. މިހާރު ކުދިންގެ ބަހުންނަމަ މި "ސަންކިސްޑް" ފޮޓޯއިން ކަރީނާ ފެނިގެން ދަނީ ވަރަށް ހިތްގައިމުކޮށެވެ.
21 ފެބުރުވަރީގެ ފަހުން ފުރަތަމަ ފަހަރަށް ހިއްސާކޮށްފައިވާ މި ފޮޓޯއަށް ގިނަ ބެލުންތެރިންގެ ސަމާލުކަން ވަނީ ލިބިފައެވެ. މި ފޮޓޯ ހިއްސާ ކުރަމުން ކަރީނާ ލިޔެފައިވަނީ "އޯ ހެލޯ ދެއާ… މިސްޑް ޔޫ އޯލް" މިހެންނެނެވެ. މިފޮޓޯ ނަގާފައިވާ ކަމަށް ލަފާ ކުރެވެނީ ކަރީނާގެ އާ ގޭގެ ޓެރަސް މަތިންނެވެ. މިއީ ކަރީނާ ވިހެއުމުގެ ދުވަސް ކޮޅެއް ކުރިން ބަދަލުވެފައިވާ ގެއެކެވެ.
View this post on Instagram
ކަރީނާ ވިހެއުމަށްފަހު މާ ގިނަވަގުތެއް ނުވެ ސައިފް ވަނީ ހެޔޮއެދޭ އެންމެނަށް ޝުކުރު އަދާކޮށްފަ އެވެ. އަދި އޭނާ ބުނެފައިވާ ގޮތުން ދަރިފުޅު އަދި މަންމަގެ ވެސް ހާލު ރަނގަޅުކަމަށެވެ. އަދި ބެލުންތެރިން ދެމުންދާ ލޯތްބާއި ހިތްވަރަށް ޝުކުރުއަދާކޮށްފައި ވެއެވެ.
ކަރީނާ އާއި ސައިފްގެ ސަޕޯޓަރުން މިހާރު އިންތިޒާރު ކުރަމުން ދަނި މި ދެމީހުންގެ ދަރިފުޅުގެ ފޮޓޯއެއް އާންމު ކުރާނެ ވަގުތަކަށެވެ. މި ފަހަރު ދަރިފުޅު މުޅިދުނިޔެއަށް ތައާރަފްކުރާނީ ކަރީނާގެ އިންސްޓްގްރާމް އެކައުންތް މެދުވެރިކޮށް ވަރޗުއަލް ކޮށްކަމަށް ރިޕޯޓްތައް ބުނެއެވެ.
