އާ ސިޔާސީ ޕާޓީއެއް އުފެއްދުމުގެ އެއްވެސް ވިސްނުމެއް ނެތްކަމާށާއި، އަދި، ޖެނުއަރީ މަހުގެ 6 ވަނަ ދުވަހު އެމެރިކާގެ ކެޕިޓަލް ހިލްއަށް ޓްރަމްޕްގެ ސަޕޯޓަރުން ދިން ހަމަލާއަށްފަހު ވަރަށްބޮޑަށް ބައިބައިވުން އުފެދިފައިވާ ރިޕަބްލިކަން ޕާޓީ އެއބައިވަންތަ ކުރުވާނެކަމަށް، އެމެރިކާގެ ކުރީގެ ރައީސް ޑޮނަލްޑް ޓަރަމްޕް ވިދާޅު ވެއްޖެއެވެ.
ޓަރަމްޕް މިހެން ވިދާޅުވެފައިވަނީ، މިހާރު ކުރިޔަށްދާ، ރިޕަބްލިކަން ޕާޓީގެ ޓަރަމްޕަށް ތާއީދުކުރާ ގިނަބަޔަކު ހާޒިރުވާ، ކޮންޒަވޭޓިވް ކޮންފަރެންސްގައެވެ.
މިއީ، ފާއިތުވެދިޔަ ނޮވެމްބަރ މަހު ބޭއްވުނު އެމެރިކާގެ ރިޔާސީ އިންތިޚާބުގައި މިހާރުގެ ރައީސް ޖޯ ބައިޑްންއާ ވާދަކުރައްވާ އިންތިޚާބުގައި ނާކާމިޔާބު ވެވަޑައިގަތުމާ ގުޅިގެން ވެރިކަމުން ދުރަށް ވަޑައިގަތުމަށްފަހު، އާންމު އެއްވުމެއްގައި ޓްރަމްޕް ތަގުރީރު ކުރެއްވި ފުރަތަމަ ފަހަރެވެ. މި ތަގުރީރުގައި ޓްރަމްޕް ވިދާޅުވެފައިވަނީ، ރިޕަބްލިކަން ޕާޓީ އޮތީ ވަރަށް ވަރުގަދަކޮށް ކަމަށާއި އަދި، ދަނީވެސް ވަރުގަދަ ވަމުން ކަމުގައެވެ.
"އަހަރެން ނޫޅެން އާޕާޓީއެއް އުފައްދަން. އެއީ ފޭކް ޚަބަރެއް،" އާދީއްތަ ދުވަހު މެންދުރު، ފްލޮރިޑާ ސްޓޭޓުގައި އޮތް ކޮންޒަރވޭޓިވް ޕޮލިޓިކަލް އެކްޝަން ކޮންފަރެންސް (CPAC)އަށް ހާޒިރުވެތިބި ފަރާތްތަކާ މުޚާތަބުކޮށް ވާހަކަ ދައްކަވަމުން ޓަރަމްޕް ވިދާޅުވިއެވެ.
"އަހަރެމްނެ މިތިބީ މީގެކުރިން ދުވަހަކުވެސް ވަރުގަދަ ނުވާހާ ބަދަހިކޮށް،. އަހަރެމެން އެމެރިކާ ސަލާމަތްކޮށް، އެމެރިކާ ވަރުގަދަ ގައުމަކަށް ހަދާނަން، އަދި އަހަރެމެން، ކޮމިއުނިޒަމްއަށް މަގުމަފަހި ކޮށްދޭ، ހައްދު ފަހަނައަޅާ ދިއުމާ، ސޯޝަލިޒަމްއާ ދެކޮޅަށް އަބަދުވެސް މަސައްކަތް ކުރަމުން ދާނަން،" އެރިކާގެ މިހާރުގެ ރައީސަށް ފާޑު ވިދާޅުވުުމުގައި ތަގުރީރުގައި ބޮޑު ހޭދަކުރައްވަމުން ޓްރަމްޕް ވިދާޅުވިއެވެ.
މި ތަގްރީގައިވެސް ޓްރަމްޕްވަނީ، 2020 ވަނަ އަހަރުގެ ނޮވެމްބަރުމަހު ބޭއްވުނު އެމެރިކާގެ ރިޔާސީ އިންތިޚާބުގައި މަކަރުހަދާ އޮޅުވާލާފައިވާ ކަމަށް އޭނާ ކުރައްވަމުން ގެންދަވާ ތުހުމަތުތައް ތަކުރާރު ކުރައްވާފައެވެ. އަދި ވަނީ 2024 ވަނަ އަހަރުގެ ރިޔާސީ އިންތިޚާބުގައި އަލުން ވާދަކުރައްވަފާނެ ކަމުގެ އިޝާރާތެއްވެސް ދެއްވާފައެވެ.
"އެމީހުން އިންތިޚާބުންވީ ބަލި،" އަދި "ކާކަށް އިގޭނީ، އަހަރެން 3 ވަނަފަހަރަށް އެމީހުން ބަލިކޮށްފާނަން،" 2024ގައި އޮންނަ އެމެރިކާގެ ރިޔާސީ އިންތިޚާބުގައި މިހާރުގެ ރައީސް ބައިޑްންއާ ވާދަކުރައްވަފާނެކަަމަށް އިޝާރާތް ކުރައްވަމުން ޓްރަމްޕް ވިދާޅުވިއެވެ.
ކޯވިޑް19 ކޮންޓަރޯލް ކުރުމަށް އަޅާފައިވާ ފިޔަވަޅުތަކަށް ފްލޮރިޑާ ސްޓޭޓްގައި ވަރަށް ބޮޑަށް ލުއި ދީފައިވުމާއެކު، މި ކޮންފަރެންސުގައި، ޓްރަމްޕަށް ތާއީދުކުރާ ރިޕަބްލިކަން ޕާޓީގެ ގިނަ އަދަދެއްގެ މެމްބަރުވަނީ ބައިވެރި ވެފައެވެ.
ކޮންމެ އަހަރަކުވެސް ބާއްވާ، ކޮންޒަރވޭޓިވް ޕޮލިޓިކަލް އެކްޝަން ކޮންފަރެންސް (CPAC) ބައްދަލުވުމަކީ، ކޮންޒަވޭޓިވުންނާ އަދި ރިޕަބްލިކަން ޕާޓިއަށް ތާއީދުކުރާ ގިނަބަޔަކު ބައިވެރިވާ، ގައުމީ އެންމެ ބޮޑު ބައްދަލުވުމެވެ. އަބަދުވެސް މި ބައްދަލުވުން ބެލެވިގެންދަނީ، ރިޕަބްލިކަން ޕާޓީއާއި އަދި އެޕާޓީގެ ސަޕޯޓަރުންގެ ތާއީދާއި އިހުސާސްތައް ހުންނަ ގޮތް ވަރަށް ބޮޑަށް ދައްކުވައިދޭ ބައްދަލުވުމެއްގެ ގޮތުގައެވެ.
ފާއިތުވެދިޔަ ތަނުގައި، މިބައްދަލުވުން ބޭއްވިފައިވަނީ، ކޮންޒަވޭޓިވުންގެ މެދުގައި ތަފާތު ކަންކަމުގައި ބަހުސް ކުރެވޭ ފޯރަމެއްގެ ގޮތުގައި ނަމަވެސް، މިފަހަރު، މިއާ ޚިލާފަށް މިބައްދަލުވުން ފާހަގަވެގެން ދިޔައީ، ރިޕަބްލިކަން ޕާޓީގެ އެތެރޭގައި ކުރީގެ ރައީސް ޑޮނަލްޑް ޓަރަމްޕަށް އޮތް ތާޢީދު ހާމަކޮށްދިން ބައްދަލުވުމެއްގެ އިތުރުން، ރިޕަބްލިކަން ޕާޓީގެ ތެރޭގައި ޓްރަމްޕްގެ ނުފޫޒު އޮތް މިންވަރުވެސް ވަރަށްބޮޑަށް ހާމަވެގެން ދިޔަ ބައްދަލުވުމަކަށެވެ.
