ކަރީނާ ކަޕޫރާއި ސައިފް އަލީ ޚާންގެ ދެވަނަ ދަރިފުޅު ލިބުނުތާ މާގިނަ ދުވަސްތަކެއް ވެފައި ނުވާއިރު ޝަރްމީލާ ޓެގޯރްވަނީ ކަރީނާ އަށް ތައުރީފު ކޮށްފައެވެ.
އާއިލާއަށް އާ މެމްބަރަކު ލިބުމުގެ މުނާސަބާ ދެފަރާތުގެ އާއިލާއިން ދަނީ ކުލަ ގަދަކޮށް ފާހަގަ ކުރަމުންނެވެ. މީގެ އިތުރުން ސައިފްގެ މަންމަ ޝަރްމީލާ ޓެގޯރުގެ އުފަންދުވަސްވެސް މި އާއިލާއިން ދާދި ފަހުން ވަނީ ފާހަގަ ކޮށްފައެވެ.
ޓޯކް ޝޯއެއްގައި ވާހަކަ ދައްކަމުން ޝަރްމީލާ ބުނެފައިވަނީ ކަރީނާ ގައިގައި ހުންނަ އޭނާ އެންމެ ގަޔާވާ ސިފައަކީ އަބަދުވެސް އޭނާގެ މެސެޖުތަކަށް ރިޕްލައި ކުރުމެވެ.
"އަހަރެން އެންމެ ގަޔާވަނީ ކަރީނާގެ 'ކޮންސިސްޓަންސީ' އަބަދުވެސް ހިނގާ ކަންތަކުގެ ވާހަކަ ދައްކާ. އަހަނަށް އެނގޭ ކަރީނާއަށް މެސެޖެއް ކޮށްފިޔާ ރިޕްލައި އެއް ލިބޭނެކަން އެކަމަކު ސޯހާ އެއް ނުކުރާނެ. ސައިފުވެސް ކުރޭ. ސޯހާގެ ޖަވާބެއް ލިބޭނީ އެތަށް އިރެއް ފަހުން."
– ޝަރްމީލާ ޓެގޯރް
މީގެ އިތުރުން ކަރީނާގެ ހުރިހާ ފޭނުންވެސް އެންމެ އިންތިޒާރު ކުރަމުން ދަނީ އޭނާ އާއި ސައިފްގެ ދެވަނަ ދަރިފުޅުގެ ފޮޓޯއެއް ފެންނާނެ ދުވަހަކަށެވެ. މިހާތަނަށް ދެމީހުން ކުރެ އެކަކުވެސް އަދި އާއިލާގެ މެމްބަރެއްވެސް ދަރިފުޅުގެ ފޮޓޯއެއް ބެލުންތެރިންނާއި ހިއްސާކޮށްފައެއް ނުވެއެވެ. ހަމައެހެންމެ ދަރިފުޅުގެ ނަމެއްވެސް ބެލުންތެރިންނާއި ހިއްސާކޮށްފައެއް ނުވެއެވެ.
ކަރީނާ އާއި ސައިފް ކައިވެނި ކޮށްފައިވަނީ 2012 ވަނަ އަހަރު އެވެ. އަދި ދެމަފިރިންގެ ފުރަތަމަ ދަރިފުޅު ތައިމޫރް އަލީ ޚާން އުފަންވީ 2016 ވަނަ އަހަރުގެ ޑިސެމްބަރު މަހުގެ 20 ވަނަަ ދުވަހުއެވެ.
