މި ފެބްރުވަރީ މަހު 21 ވަނަ ދުވަހު ދެވަނަ ދަރިފުޅަށް މަރުހަބާކީ ސައިފް ޢަލީ ޚާނާއި ކަރީނާ ކަޕޫރް އެމީހުންގެ ދަރިފުޅު މުޅި ދުނިޔެއަށް ތަޢާރަފްކުރުމަށް ތައްޔާރުވަމުންދާކަމަށް ރިޕޯޓްތައް ބުނެފިއެވެ.
އެ ދެމަފިރިންގެ ފުރަތަމަ ދަރިފުޅު ތައިމޫރް ޢަލީ ޚާނަށް މީޑިއާ އާއި އާންމުން، ފުރަތަމަ ދުވަހުން ފެށިގެން ބޮޑުސަމާލުކަމެއް ދެމުންދާއިރު، އެދެމަފިރިންގެ ދެވަނަ ދަރިފުޅަށް އެވަރުގެ ސަމާލުކަމެއް ބޭނުން ނުވާކަމަށް ކަރީނާ ވަނީ ވިހެއުމުގެ ކުރިންވެސް ބުނެފައެވެ.
އަދި ރިޕޯޓްތައް ބުނާގޮތުން އެ ދެމަފިރިންގެ ދެވަނަ ދަރިފުޅު ތަޢާރަފްކުރުމަށް ނިންމާފައި ވަނީ ކަރީނާގެ އިންސްޓަގްރާމް އެކައުންޓް މެދުވެރި ކޮށެވެ. ކަރީނާ އަކީ އިންސްޓަގްރާމްގައި ވަރަށް އެކްޓިވް ތަރިއެކެވެ.
ގިނަ އަދަދެއްގެ ފޭނުން މިހާރުވެސް ގެންދަނީ ކަރީނާއާއި ސައިފްގެ ދަރިފުޅު ފެންނާނެ ދުވަހަކަށެވެ. އެ ދެމަފިރިން މިފަހަރު ގެންގުޅެމުންދާ ހާއްސަ އުސޫލުތަކުގެ ސަބަބުން ދަރިފުޅުގެ އެއްވެސް ކަމެއް އާއިލާގެ މެމްބަރެއް ނޫނީ ގާތް މީހެއްގެ ފަރާތުންވެސް އަދިި މިހާތަނަށް އާންމުންނަށް އެނގިފައެއް ނުވެއެވެ.
View this post on Instagram
ކަރީނާއާއި ސައިފް އެމީހުންގެ 2 ވަނަ ދަރިފުޅު ލިބެން އުޅޭކަން އިއުލާން ކުރީ މިދިޔަ އަހަރުގެ އޯގަސްޓް މަހު އެވެ. އެ ދެމަފިރިންގެ ފުރަތަމަ ދަރިފުޅު ތައިމޫރް އަލީ ޚާން އުފަންވީ 2016 ވަނަ އަހަރުގެ ޑިސެމްބަރު މަހުގެ 20 ވަނަަ ދުވަހުއެވެ. 4 އަހަރުގެ ތައިމޫރް އަކީ އުފަންވީއްސުރެ މީޑިއާއާއި އާންމުންގެ ސަމާލުކަން އެންމެ ބޮޑަށް ލިބުނު އިންޑިއާގެ "ސްޓަރ ކިޑް" އެވެ.
މިއީ ކަރީނާ އާއި ސައިފްގެ 2 ވަނަ ދަރިފުޅަށް ވީނަމަވެސް ސައިފްގެ4 ވަނަ ދަރިފުޅެވެ. ސައިފްގެ ފުރަތަމަ ކައިވެންޏަށް ވެސް ދެކުދިން ލިބިފައި ވެއެވެ. އެއީ ސާރާ އަލީ ޚާން އާއި އިބްރާހީމް އަލީ ޚާނެވެ.
