އާންމުގޮތެއްގައި ސަންޖޭ ލީލާ ބަންސާލީގެ ފިލްމު ތަކަކީ ވަރަށް ހާއްސަ ގިނަ ކަންތައްތަކެއް ފެންނަ ފިލްމު ތަކެކެވެ. އެގޮތުން މިހާރު އެންމެ ގިނަ ބަޔަކު އިންތިޒާރުކުރަމުންދާ އެއް ފިލްމަކީ ސަންޖޭގެ "ގަންގޫބާއި ކަތިއަވަޅީ" އެވެ.
މި ފިލްމަކީ އިންޑިއާގެ މަޝްހޫރު ގަންގޫބާއި، ޕްރޮސްޓިޓިއުޓަކުން ގޭންގް ސްޓަރ އަކަށް ބަދަލުވެގެންދާގޮތް ދައްކުވައިދޭ ފިލްމެކެވެ. ފިލްމުގެ މައި ތަރި އަކީ އާލިއާ ބަޓެވެ.
ފިލްމުގެ ޓީޒާ މިދިޔަ ބުރާސްފަތި ދުވަހު ދައްކާލާފައިވާއިރު، ޓީޒާއިން ފެނިގެންދާ އާލިޔާގެ އެކްޓިންގއަށް ގިނަ ބައެއްގެ ތަޢުރީފް ދަނީ އޮހެމުންނެވެ. އެގޮތުން ބޮލީވުޑްގެ މަޝްހޫރު ތަރިން ކަމަށްވާ ޝާހްރުކް ޚާން، އަކްޝޭ ކުމާރު، ޕްރިޔަންކާ ޗޯޕްރާ، ފަރްހާން އަޚްތަރު އަދި ވަރުން ދަވަން ފަދަ ތަރިން ވަނީ ފިލްމުގެ ޓީޒާއަށް ވަރަށްބޮޑަށް ތަޢުރީފްކޮށްފަ އެވެ. މީގެ އިތުރުން މި ފިލްމު އޭގެ މައްޗަށް ބިނާކޮށްފައިވާ މަޝްހޫރު ވާހަކަ " މާފިއާ ކުއީންސް އޮފް މުމްބާއީ"ގެ ލިއުންތެރިޔާ ހުސައިން ޒައިދީ ވެސް ވަނީ ސަންޖޭގެ މަސައްކަތަށް ވަރަށްބޮޑަށް ތަޢުރީފްކޮށް ވާހަކަ ދައްކާފައެވެ.
ޖުލައިމަހުގެ 30 ވަނަ ދުވަހު ސިނަމާއަށް ގެނައުމަށް މަސައްކަތްކުރާ މި ފިލްމުގެ ޓީޒާއަށް ފަހު މިހާރު ދެކެވޭ ވާހަކައަކީ މި ފިލްމުގައި އެކްޓަރ އާލިއާ ބަޓްގެ އަޑުން ލަވައެއް ހިމަނާ ވާހަކައެވެ. މައުލޫމާތު އެނގޭ ބައެއް ފަރާތްތަކާއި ހަވާލާދީ ޕިންކްވިލާ އިން ރިޕޯޓްކޮށްފައިވާ ގޮތުގައި މި ލަވަ ކޮމްޕޯސް ކުރަނީވެސް ސަންޖޭއެވެ.
އާލިއާގެ ލަވަކިއުމުގެ ހުނަރު ކޮންމެވެސް ވަރަކަށް އާންމުންނަށް ފެނިފާވާއިރު ޕްރޮޑިއުސަރ އަދި ޑައިރެކްޓަރ ސަންޖޭ ލީލާ ބަންސާލީ އަކީ މިއުޒިކް ކޮމްޕޯސްވެސް ކުރާ ފަރާތެކެވެ. އެހެން ކަމުން މި ދެމީހުންގެ ހުނަރު އެތައް ގޮތަކުން މި ފިލްމުން ފެނިގެންދާނެއެވެ.
ފިލްމުގައި އަޖޭ ދޭވްގަން ކުޅުމަށް ހަމަޖެހިފައިވާ ބައިތަކުގެ ޝޫޓިންގ މިއަދު މުމްބާއީގެ ފިލްމް ސިޓީ ސްޓޫޑިއޯގައި ފަށާނެއެވެ. އަޖޭ ފެނިގެންދާނީ ހަމަ މުމްބާއީގައި އެދުވަސްވަރު މަޝްހޫރުވި މާފިއާ ޑޮން އެއް ކަމަށްވާ ކަރީމް ލާލާގެ ރޯލުންނެވެ.
