އިޓަލީގެ ގަދީމީ ސިޓީއެއް ކަމަށްވާ ޕޮމްޕެއީން މީގެ 15 އަހަރު ކުރިން ވަގަށް ނެގި ތަކެތީގެ ސަބަބުން އޭނާގެ ދިރިއުޅުން އެފުށް މިފުށަށް ޖެހިއްޖެ ކަމަށް ބުނެ، އެ ތަކެތި އަލުން ރައްދުކޮށްފިއެވެ.
ކެނެޑާއަށް ނިސްބަތްވާ އަންހެން މީހާ ބުނެފައި ވަނީ، އެ ތަކެތި ވަގަށް ނެގި ފަހުން އޭނާ އާއި އާއިލާ "ކާސްޑް"ވެފައިވާ ކަމަށެވެ. އޭނާ ވަނީ ވަގަށް ނެގި ތަކެއްޗާއެކު، ސިޓީއެއްވެސް ފޮނުވާފައެވެ. ޕޮމްޕޭއީގެ ޓްރެވެލް އެޖެންޓަކަށް އެ ތަކެތި ފޮނުވުމަށްފަހު އޭނާ އެދިފައި ވަނީ ޕޮމްޕޭއީގެ އާކިލޮޖިކަލް ޕާކަށް އެ ތަކެތި ރައްދުކޮށްދިނުމަށެވެ.
ނިކޯލް ނަމަކަށް ކިޔާ އެ އަންހެން މީހާ ފޮނުވޮ ތަކެތި ތެރޭގައި ހިމެނެނީ ވައިޓް މޮސައިކް ޓައިލްސް ކޮޅަކާއި، އަމްޕޯރާ ވާސްގެ ދެ ތަންކޮޅާއި، ސެރެމިކް ވޯލްގެ ތަންކޮޅެކެވެ. އެ ސިޓީގައި އޭނާ ވަނީ އެތަކެތި އޭނާ ވަގަށް ގެންގޮސްފައި ވަނީ 2005 ވަނަ އަހަރު އެ ގަދީމީ ސިޓީއަށް ޒިޔާރަތް ކުރުމުގެ ތެރޭގައި ކަމަށެވެ.
އަހަރެން ބޭނުންވީ ގަނެގެންވެސް ނުލިބޭނެ ގަދީމީ އެއްޗެސްތަކެއް.
– އޭނާ ސީއެންއެންއަށް ބުނެފައި ވެއެވެ.
އޭނާ ބުނީ، އެކަންތައް ހިނގާދިޔައީ، އޭނާގެ ޒުވާން އުމުރުގައި ކަމަށާއި، އެކަމުގެ ސަބަބުން ދިރިއުޅުމަށް ރަނގަޅު ނޫން ކަންކަން ދިމާވު ކަމަށެވެ. އެގޮތުން އޭނާ ފާހަގަކުރިގޮތުގައި، އެނބުރި ކެނެޑާއަށް އައި ފަހުން އޭނާގެ އުރަމަތީ ކެންސަރު ޖެހުނެވެ. އަދި ފައިސާގެ ގޮތުން ވަރަށް ބޮޑަށް ދަތިވެގެން ދިޔައެވެ. އޭނާ ބުނީ، މިހާރު އުމުރުން 36 އަހަރުވެފައިވާ ކަމަށާއި، ދެ ފަހަރަށް އުރަމަތީ ކެންސަރު ޖެހިފައިވާ ކަމަށެވެ.
އަހަރެންނާއި އާއިލާ ތެރޭގައިވެސް ފައިސާގެ ދައްޗާއި ކުރިމަތިލާން ޖެހުނު، އަހަރުމެންނަކީ ރަނގަޅު މީހުން، އަހަރެން ބޭނުން ނޫން މި ކާސް އަހަރެންގެ އާއިލާއަށް ނޫނީ ދަރިންނަށް ޖެހެން.
– އޭނާ ބުނެފައި ވެއެވެ.
އޭނާ ވަނީ މި ތަކެތި އަނބުރާ ގެންގޮސް އޭނާގެ އާއިލާ ހުރިހާ ނުރަނގަޅު ކަންކަން ސަލާމަތް ކޮށްދިނުމަށް އެދިފައެވެ. އޭނާ އެ ސިޓީގައި ބުނެފައި ވަނީ، އޭނާ ވަގަށް ނެގި ހުރިހާ ތަކެތީގެ ތެރެއިން، އޭނާ ރަހުމަތްތެރިއަކަށް ދިން ތަށިމުށިކޮޅު ފިޔަވާ ހުރިހާ އެއްޗެއް އޭގައި ހުންނާނެ ކަމަށެވެ.
