އިންޑިއާގެ މުމްބާއީގައި އުސް އިމާރާތެއްގެ ފާރުމަތީގައި މާ ފޮނިކޮށް ސްޓަންޓް ޖައްސައި، ވީޑިއޯ އާއްމުކުރި މީހަކު ހޯދުމުގެ މަސައްކަތް ފުލުހުން ފަށައިފިއެވެ.
ނުރައްކާތެރިކަން އިންތިހާއަށް ފެނިގެންދާ އެ ވީޑިއޯ މިހާރު މީސް މީޑިއާގައި ދަނީ ދައުރުވަމުންނެވެ. ފުލުހުން މިހާރު ދަނީ އޭނާއާއި، އެ ވީޑިއޯ ނެގުމުގައި ހަރަކާތްތެރިވި ދެ މީހުން ހޯދުމުގެ މަސައްކަތް ކުރަމުންނެވެ.
މިހާރު ދައުރުވަމުންދާ އެ ވީޑިއޯ ފަށައިގަންނަނީ ޒުވާނަކު 22 ބުރީގެ އިމާރާތެއްގެ ބޭރު ފާރު މަތީގައި އިށީންދެ އިނދެ އެނާޖީ ޑްރިންކް ދަޅެއް ބޯލާ މަންޒަރެވެ. އޭގެ ފަހުން އޭނާ އެ ފާރު މަތިން ފުންމާލަނީ ރާނާފައިވާ ބެލްކަންޏެއް ގޮތަށް ހަދާފައިވާ ތަނަކަށެވެ. އޭނާ އެތާ މަތީގައި ހުރެ، އޭނާ މޮޅު ސްޓަންޓެއް ޖައްސައެވެ. އެ މަންޒަރު އޭނާގެ ރަހުމަތްތެރިން ވަނީ ވީޑިއޯ ކޮށްފައެވެ.
އޭނާ އެ ސްޓަންޓް ހެދި ވަގުތު އަރިއަކަށް ޖެހިލިނަމަވެސް، އެތަނުން ވެއްޓޭނެއެވެ. އެ ވީޑިއޯ މީސް މީޑިއާގައި ދައުރުވުމާއެކު ފުލުހުން ވަނީ ހޭނާ ހޯދުމުގެ މަސައްކަތް ފަށާފައެވެ.
ކަންޑިވަލީ ޕޮލިސް އިންސްޕެކްޓަރ ރަވީ އަޑަނީ އެންޑީޓީވީ، ބުނީ އެ ސްޓަންޓް ހެދި އިމާރާތަކީ ޖައި ބަރާތް އިމާރާތް ކަމަށެވެ. އަދި އެ ތިން މީހުންނަކީ ކޮން ބައެއްކަން ދެނެގަނެވިފައިވާ ކަމަށާއި، އެ މީހުން ހޯދުމުގެ މަސައްކަތް ކުރަމުންދާ ކަމަށް ފުލުހުން ބުނެފައި ވެއެވެ. މިފަދަ މޮޅެތި ސްޓަންޓް ހަދައިގެން މީގެ ކުރިން އެތައް ބަޔަކު މަރުވެފައި ވެއެވެ.
