އެމެރިކާގެ އެންމެ ބޮޑު އެއް ސިޔާސީ ޕާޓީ އަދި، ކުރީގެ ރައީސް ޑޮނަލްޑް ޓްރަމްޕް އެޕާޓީއަކަށް ނިސްބަތްވާ ރިޕަބްލިކަން ޕާޓީގެ، ޓްރަމްޕްއާއި ދެކޮޅު ފެކްޝަނުން އާސިޔާސީ ޕާޓީއެއް ހެދުމާމެދު ވިސްނަން ފަށައިފިއެވެ.
"މިއީ ވަރަށް ބޮޑަށް އެންމެނެގެ ވިސްނުމުގައިވެސް އޮތް ކަމެއް،" 2020 ވަނަ އަހަރު ރިޕަބްލިކަން ޕާޓީގެ ޕްރައިމަރީގައި ޓްރަމްޕާ ދެކޮޅަށް ވާދަކުރުމަށް މަސައްކަތްކުރެއްވި، މަސަޝުސެޓްސްގެ ކުރީގެ ގަވަރުނަރު ބިލް ވެކްޑް ވިދާޅުވިއެވެ.
"އަހަރެން އުއްމީދުކުރަނީ އާ ޕާޓީއެއް އުފެއްދުމުގެ ވިސްނުމުގައި ކުލަ ޖެހިގެންދާނެ ކަމަށް. އަހަރެން މި ދެކެނީ އެކަން ވާނެކަމަށް،" އަލް ޖަޒީރާ ނޫހަށް މައުލޫމާތު ދެއްވަމުން އޭނާ ވިދާޅުވެފައި ވެއެވެ.
2020 ވަނަ އަހަރުގެ ރިޔާސީ ކެމްޕޭންގެ ތެރެއިން ވަރަށް ފާޅުކޮށް ފެނިގެންދިޔަ، ޓްރަމްޕާއި ގުޅޭގޮތުން ރިޕަބްލިކަން ޕާޓިތެރޭގައި އުފެދިފަ އޮތް ހިންނަމަ ނުޖެހުންތަކަށް، ފާއިތުވެދިޔަ ޖެނުއަރީމަހު ޓްރަމްޕްގެ ސަޕޯޓަރުން އެމެރިކާގެ ގާނުނުހަދާ މަޖިލިަހަށް ދިން ހަމަލައަށްފަހު ވަނީ އިތުރަށް ބޮޑުވެގެން ގޮސްފައެވެ.
އަދި މި ހަމަލާއަށްފަހު، ކުރިޔަށްދިޔަ ޓްރަމްޕްގެ އިމްޕީޗުމަންޓުގައި އޭނާއަށް ފާޑު ވިދާޅުވެފައިވާ ރިޕަބްލިކަން ޕާޓީގެ މެމްބަރުނަށް ޓްރަމްޕްވަނީ ވަރަށް ބޮޑަށް ފާޑު ވިދާޅުވެފައެވެ. މިގޮތުން، ޖެނުއަރީ 6 ވަނަދުވަހުގެ ހަމަލާގެ ޒިންމާ ޓަރަމްޕް ނަންގަވަން ޖެހޭނެކަމަށް ވިދާޅުވުމާ ގުޅިގެން ޓަރަމްޕްވަނީ، ރިޕަބްލިކަން ޕާޓީގެ ސެނެޓް ލީޑަރ މިކް މެކޯނެލްއަކީ، "ހިނިތުންވާން ވެސް ނުދަންނަ ސިޔާސީ ގަމާރެއް"ގެ ގޮތުގައި ސިފަކުރައްވާފައެވެ. އަދި ޓްރަމްޕްވަނީ، އޭނާގެ "އެމެރިކާ އަލުން އާއުސްމިނަކަށް" މިއެޖެންޑާއަށް ތާޢީދު ނުކުރާ ފަރާތްތަކުގެ އިންތިޚާބުގެ ޕްރައިމަރީތަކަށް ގޮންޖެހުންތައް ކުރިމަރި ކުރުވާނެ ކަމަށް ވިދާޅުވެފައެވެ.
ރިޕަބްލިކަން ޕާޓީގެ މަޝްހޫރު މެމްބަރުތަކެއް ވަނީ، މި ފެބްރުއަރީމަހުގެ 5 ވަނަ ދުވަހު، ކުރީގައި އެމެރިކާގެ ރިޔާސީ އިންތިޚާބަށް އެއް ޓިކެޓެއްގައި ވާދަކުރުމަށް މަސައްކަތް ކުރެއްވި ތިންވަނަ ފަރާތެއްކަމުގައިވާ، އީވާން މެކްމުލިން އާއި، މިންޑީ ފިން ދައުވަތަކަށް އެއްތަނެއްގައި މަޝްވަރާ ބައްދަލުވުމެއް ބާއްވާފައެވެ. އަދި މި ދެބެފުޅުންނަކީ، މިހާރު އުފެދިފައިވާ "ރިޕަބްލިކަން ޕާޓީއަށްޓަކާ ތެދުވަމާ،" މި ގުރޫޕުގެ ދެ ޑައިރެކްޓަރުންވެސްމެއެވެ. މި މަޝްވަރާ ބައްދަލުވުންތަކުގައި މައިގަޑުކޮށް މަޝްވަރާ ކުރެވިފައިވަނީ، ރިޕަބްލިކަން ޕާޓީގައި މިހާރު ހިންހަމަ ނުޖެހިފައިތިބި މެމްބަރުން ޕާޓީގައި ތިބެގެން އިސްލާހީ މަސައްކަތް ކުރާނީތޯ ނުވަތަ، ޕާޓީ ދޫކޮށް ސިޔާސީ މަސައްކަތް ކުރާނީތޯއެވެ.
މީގެއިތުރުން، އާޕާޓީއެއް އުފެއްދުމުގެ އަޑުތައްވަނީ، ފެބްރުއަރީ 13 ވަނަ ދުވަހު އެމެރިކާގެ ސެނެޓުގައި ކުރިޔަށް ދިޔަ އިމްޕީޗަމަންޓު ޝަރީއަތުގައި، ޓްރަމްޕް ކުއްވެރި ނުވާކަމަށް ނިންމުމަށްފަހު، އިތުރަށް ގަދަ ވެފައެވެ. "އަހަރުމެންނަށް މިހާރު އިތުރަށް އިހުސާސް ކުރެވިއްޖެ، ކޮންމެވެސް ގޮތަކުން، ކޮންމެވެސް އާބަދަލެއް އަންނަން ޖެހިއްޖެ ކަމަށް،" މެކްމުލިން ހޯމަދުވަހު، ވޮޝިންޓަން ޕޯސްޓަށް ދިން އިންޓަވިވްއެއްގައި، ވިދާޅުވެފައި ވެއެވެ.
ފެބްރުއަރީ 5 ވަނަ ދުވަހު، ނުރަސްމީކޮށް ބޭއްވުނު މިބައްދަލުވުމުގައި ބައިވެރިވި މަސަޝުސެޓްސްގެ ކުރީގެ ގަވަރުނަރު ބިލް ވެކްޑް ވިދާޅުވެފައިވަނީ، ބައްދަލުވުމުގެ ހުރިހާ ބައިވެރިންވެސް، އާޕާޓީއެއް އުފެއްދުމުގެ ވިސްނުމަށް ވަރަށް ބޮޑަށް ތާއީދު ކުރައްވާފައި ވާކަމަށެވެ.
ކޮންމެ އަހަރަކުވެސް ބާއްވާ، "ދަ އިންޓާނަލް ރިޕްބަލިކަން ޑައިލޮގް" މިއަހަރު ބައްދަލުކޮށްފައިވަނީ، އެމެރިކާގެ ރައްޔިތުންގެ މެދުގައި ތިންވަނަ ސިޔާސީ ފަރާތެއްގެ ޝައުގުވެރިކަން އިންތިހާއަށް ބޮޑުވެފައި ވަނިކޮށް ކަމަށް މަސްރަހު ދިރާސާ ކުރާ ފަރާތްތަކުން ބުނެއެވެ.
މިހިގާ ފެބުރުއަރީ މަހުގެ 5 ވަނަދުވަހު ޝާއިއު ކޮށްފައިވާ ދިރާސާއަކުން ދައްކާ ގޮތުގައި، ރިޕަބްލިކަން %63 މެމްބަރުންނާ އަދި އެމެރިކާގެ ރައްތިތުންގެ ތެރެއިން %62 މީހުން ދެކެނީ މިއީ އާސިޔާސީ ޕާޓީއެށް އުފައްދަން ޖެހިފައިވާ ވަގުތު ކަމުގައެވެ.
ފަހުގެ ތާރީޚުތަކުގައި، އެމެރިކާގައި އާ ސިޔާސީ ޕާޓިތަކަށް ސިޔާސީ މަސްރަހުގައި އެއްވެސް ނުފޫޒެއް ދެއްކުމުގައިވަނީ ފެއިލް ވެގެން ގޮސްފައެވެ.
މިގޮތުން 1970 ގެ ކުރީކޮޅު އުފެދިފައިވާ ޕާޓީއެއް ކަމުގައިވާ، ލިބަރޓޭރިއަން ޕާޓީގެ ނަން، 2016 ވަނަ އަހަރުގައާއި އަދި 2020 ވަނަ އަހަރުގެ ވޯޓު ކަރުދާހުގައިވެސް އޮތެވެ. އެހެންނަމަވެސް މި ޕާޓީއަށް ހޯދިފައިވަނީ، މަދު އަދަދެއްގެ ވޯޓުކޮޅެކެވެ.
1992 ވަނަ އަހަރު، އެމެރިކާގެ ވިޔަފާރި ވެރިއެއްކަމުގައިވާ، ޕެޓްރޯ ވަނީ އެމެރިކާގެ ރިޔާސީ އިންތިޚާބުގައި 50 ސްޓޭޓުގެ ވޯޓުގައިވެސް، ވާދަކުރުމަށް ޝަރުތު ފުރިހަމަ ވެފައެވެ. އަދި އެފަހަރު، ކުރީގެ ރައީސް ބިލް ކުލިންޓަންއާއި ޖޯޖް އެޗް ޑަބްލިއު ބުޝްއާއެކީ ރިޔާސީ ބަހުސަށް އޭނާއަށް ދައުވަތު ދެވުނެވެ. އަދި އެފަހަރުގެ ރިޔާސީ އިންތިޚާބުގައި އޭނާ %19 ވޯޓު ކާމިޔާބު ކޮށްފައިވެސް ވެއެވެ.
އެހެންނަމަވެސް، ދެވަނަފަހަރަށް، 1996 ވަނަ އަހަރު ރިޔާސީ އިންތިޚާބުގައިވާ ވާދަކޮށް އޭނާއަށް ވަނީ މާބޮޑު ކާމިޔާބީއެއް ހާސިލް ނުކުރެވިފައެވެ. އެފަހަރު އޭނާއަށް ހާސިލް ކުރެވިފައިވަނީ އެންމެ %8 ވޯޓެވެ.
