ނާސާއިން ބިމުން މާރަސްއަށް ފޮނުވި 5 ވަނަ އުޅަދު ކަމުގައިވާ، "ސައިންސް ރޯވަރ ޕާސެވެރެންސް" މާރސްގެ މާޓިން އެޓްމޮސްފިއަރ ފަހަނައަޅާ ގޮސް، ބުރާސްފަތި ދުވަހު މާސްގެ ބިމަށް ތިރިކޮށްފިއެވެ. މިއީ، ރަތް ޕްލެނެޓްގެ ގޮތުން މަޝްހޫރު ވެފައިވާ މި ޕްލެނެޓުގައި އެއްވެސް ޒަމާނެއްގައި ދިރުމެއް ހުރެފައިވާކަމުގެ އެއްވެސް އަލާމާތެއް ހުރިތޯ ބެލުމަށް، މާސްގެ ބޮޑު ބިމުގައި ހަރަކާތްތެރި ވުމަށް ހަމަޖެހިފައިވާ މި އުޅަދުގެ އެންމެ ފުރަތަމަ މަރުހަލާއެވެ.
އަދި މިއީ، ދުނިޔެއިން ބޭރަށް ދަތުރުކޮށް، އެހެން ޕްލެނެޓެއްގައި މިހާތަނަށް ގާއިމް ކުރެވުނު، ޓެކްނޮލޮޖީގެ ގޮތުން އެންމެ ކުރިއަރާފައިވާ، އެސްޓްރޯ ބައޮލޮޖީގެ ލެބޯޓްރީވެސްމެއެވެ.
މި އުޅަދު މާރސްގެ ބިމަށް ތިރިކުރުމާއެކު، އެމެރިކާގެ ލޮސް އެންޖަލްސްގައި ގާއިމް ކުރެވިފައިވާ، ނާސާގެ ޖެޓް ޕްރޮޕުލްޝަން ލެބޯޓްރީގައި، އުޅަދު މާސްގެ ބިމަށް ތިރި ކުރާ މަންޒަރު ވަގުތުން ބަލަމުންދިޔަ ސައިންޓިސްޓުން އުފާފާޅުކޮށް އަތްޖަހާ ހަދާފައި ވެއެވެ.
Touchdown confirmed. The #CountdownToMars is complete, but the mission is just beginning. pic.twitter.com/UvOyXQhhN9
— NASA (@NASA) February 18, 2021
މި ރޮބޯޓިކް އުޅަދު މާރސްއަށް ދަތުރު ކުރުމަށްޓަކާ، ޖައްވުގައި މެދުނުކެޑި 7 މަސްދުވަސް ވަންދެން ދަތުރު ކޮށްފައި ވެއެވެ. އަދި މި ދަތުރުގައި ޖުމްލަ 472 މިލިއަން ކިލޯ މީޓަރުގެ (293 މިލިއަން މޭލުގެ) ދިގު ރާސްތާއެއް ކަޑައްތު ކޮށްފައި ވެއެވެ. އަދި މާސްގެ ބިމަށް ޖެއްސުމުގެ ކުރިން އެންމެ ފަހުން މި އުޅަދު ކުރިމަތިލީ މަރުހަލާ ކަމުގައިވާ މާރސްގެ މާޓިން އެޓްމޮސްފިއާއާ އަރާ ހަމަކުރިއިރު، އުޅަދު ދަތުރު ކޮށްފައިވަނީ، ގަޑިއަކު 19،000 ކިލޯ މީޓަރުގެ ބާރުމިނުގައެވެ.
Hello, world. My first look at my forever home. #CountdownToMars pic.twitter.com/dkM9jE9I6X
— NASA's Perseverance Mars Rover (@NASAPersevere) February 18, 2021
މާސްގެ ބިމަށް ތިރި ކުރުމަށްފަހު، ރޯބޯޓިކް މިއުޅަދުން މިހާރުވަނީ މާސްގެ ފޮޓޯތައް ބިމަށް ފޮނުވަން ފަށާފައެވެ.
