ކުވައިތުގެ އަމީރު ޝެއިޚް ނަވާފް އަލް-އަހުމަދު އަލް-ސަބާހުގެ ޚާއްސަ ގަރާރަކުން އެގައުމުގެ ގާނޫނުހަދާ މަޖިލިސް ސަސްޕެންޑް ކޮށްފިއެވެ.
އެއްމަސް ދުވަހުގެ މުއްދަތަށް ގާނޫނު ހަދާ މަޖިލީހުގެ ޖަލްސާތައް ސަސްޕެންޑް ކޮށްފައިމިވަނީ، އިންތިޚާބު ކުރެވިގައިވަ އެސެމްބްލީއާއި، ސަރުކާރާ ދެމެދުނު ހަމަނުޖެހުންތަކުގައި ފާއިތުވެދިޔަ މަހު އެގައުމުގެ ކެބިނެޓް އިސްތިއުފާ ދީފައިވަނިކޮށެވެ.
2020 ވަނަ އަހަރުގެ ސެޕްޓެމްބަރުމަހު، އަމީރުކަމުގެ މަގާމަށް އައްޔަން ކުރެވުނު ޝެއިޚް ނަވާފް އަލް-އަހުމަދު އަލް-ސަބާހުއަށް ކުރިމަތިވެގެންދާ އެންމެ ފުރަތަމަ ސިޔާސީ ގޮންޖެހުމުގެ ގޮތުގައި ބެލެވޭ މި ސިޔާސީ ހަލަބޮލިކަމާއެކު، އޭނާ ވަނީ އާ ކެބިނެޓެއް އެކުލަވާލުމުގެ ފުރުސަތު ކުވައިތުގެ ބޮޑުވަޒީރު ޝެއިޚް ސަބާހު އަލް-ޚާލިދު އަލް-ސަބާހުއަށް ދެއްވާފައެވެ.
ކުވައުތުގެ ގައުމީ ނޫސް އޭޖެންސީ KUNAއިން އާންމުކުރި މިޚަބަރާގުޅޭ އިތުރު އެއްވެސް މައުލޫމާތެއް އެ އޭޖެންސީން ހާމަކޮށްފައެއް ނުވެއެވެ.
ކުވައިތުގެ ގާނޫނު އަސާސީގައި ވާގޮތުން ދައުލަތުގެ ހުރިހާ ކަމެއްގަވެސް އެންމެ ފަހުބަސް ބުނާ ފަރާތަކީ އެގައުމުގެ އަމީރެވެ.
ފާއިތުވެދިޔަ މަހު، ކުވައިތުގެ ސަރުކާރު އިސްތިއުފާ ދީފައިވަނީ، 50 މެމްބަރުންގެ މައްޗަށް އެކުލެވޭ އެގައުމުގެ ގާނޫނު ހަދާ މަޖިލިހުގެ 30 މެމްބަރަކު، 2019 އިން ފެށިގެނ އެގައުމުގެ ބޮޑުވަޒީރުކަމުގައި ހުންނެދި ޝެއިޚް ސޮބާހުއާ، ވަޒީރުން އައްޔަން ކުރުމުން ފެށިގެންގޮސް، ސަރުކާރާ ގުޅުންހުރި އެތައްކަމެއްގައި ސުވާލުކުރުމަށް މަޖިލީހަށް ހުށަހެޅުނު ކުއްލި މައްސަލައަކަށް ތާއީދު ކުރުމާ ގުޅިގެންނެވެ.
މިއަހަރުޖެ ޖެނުއަރީމަހުގެ 24 ވަނަދުވަހު އަލުން ބޮޑުވަޒީރު ކަމަށް އައްޔަން ކުރެވުމަށްފަހު، ޝެއިޚް ސޮބާހު ގެންދަވަނީ، އަމީރުގެ ހުއްދައަށް ހުށަހަޅުއްވާނެ އާކެބިނެޓް އެކުލަވާލުމަށް ގާނޫނުހަދާ މަޖިލިހުގެ އެކި ބްލޮކްތަކާ މަޝްވަރާ ކުރައްވަމުންނެވެ. އެހެންނަމަވެސް، ކެބިނެޓް އެކުލަވާ ނުލެވި ދިގުލައިގެން ދިއުމުގެ ސަބަބުން ގާނޫނުހަދާ މަޖިލިހުގެ މެމްބަރުންގެ މެދުގައިވަނީ ވަރަށް ބޮޑު ނުތަނަވަސްކަމެއް އުފެދިފައެވެ.
އަރަބި ގައުމުތަކުގެ ތެރެއިން، އެންމެ ހަލަބޮލި ވެރިކަމުގެ ނިޒާމެއް އޮންނަނީ ކުވައިތުގައެވެ. އަރަބި ގިނަ އެހެން ގައުމުތަކާ ޚިލާފަށް، ގާނޫނުތައް ފާސްކުރުމާ އަދި ފާސްވިޔަ ނުދީ ހިފެހެއްޓުމުގެ ބާރު ލިބިދީފައި އޮތުމުގެ އިތުރުން، ވަޒީރުން ހާޒިރުކޮށްގެން ސުވާލުކުރުމުގެ ބާރުވެސް އެގައުމުގެ ގާނޫނު ހަދާ މަޖިލީހަށް ލިބިދީފައި އޮވެއެވެ.
އެހެންނަމަވެސް، ސަރުކާރުން މަތީ ފަންތީގެ ގިނަ މަގާމްތަކަށް އަޔަން ކުރެވެނީ އެގައުމުގެ ވެރިކަންކުރާ އާއިލާގެ މެމްބަރުންނެވެ.
