ހއ. ކެލާއިން ފަތުރުވެރިކަމަށް ތަރައްގީކުރުމަށް ރައީސުލްޖުމްހޫރިއްޔާ ކަނޑައަޅުއްވާފައިވާ ބިންތައް ކުއްޔައްދިނުމާއި ބީލަމާގުޅޭ ކަންކަން ކުރިއަށްގެންދިއުމާ ގުޅޭ އެއްބަސްވުމެއްގައި އެރަށު ކައުންސިލާއި ޓޫރިޒަމް މިނިސްޓްރީއާ ދެމެދު ސޮއިކޮށްފި އެވެ.
ކެލާގައި ފަތުރުވެރިކަން ތަރައްޤީކުރުމަށް ރައީސުލްޖުމްހޫރިއްޔާ ކަނޑައަޅުއްވާފައިވާ ބިންތައް ދިވެހިރާއްޖޭގެ ޓޫރިޒަމާބެހޭ ޤާނޫނުގައި ބަޔާންކޮށްފައިވާ ގޮތަށް ޢާންމުކޮށް ޢިއުލާންކޮށްގެން، ކަނޑައެޅިފައިވާ އުޞޫލެއްގެ މަތިން، އެކަށީގެންވާ އެންމެ ރަގަނޅު ހުށަހެޅުމެއް ހުށަހަޅާ މީހަކަށް ނުވަތަ ފަރާތަކަށް ކުއްޔަށްދިނުމަށް ވަނީ ނިންމާފައެވެ.
އެގޮތުން، އެކައުންސިލުން އާއްމުކޮށް ޢިއުލާނުކުރުމަށް ނިންމާފައިވަނީ ޓޫރިސްޓް ގެސްޓްހައުސް ތަރައްޤީކުރުމަށް 5000 އަކަފޫޓުގެ 12 ބިމާއި ޓޫރިސްޓް ހޮޓާ ތަރައްޤީކުރުމަށް 10000 އަކަފޫޓުގެ 2 ބިމެވެ.
މިއަދު ސޮއިކުރި ފަހުމުނާމާގައި ސޮއިކުރެއްވީ ކެލާ ކައުންސިލުގެ ރައީސް އާދަމް ޤުފްރާން އާއި މިނިސްޓްރީގެ ސީނިއަރ ޕޮލިސީ ޑިރެކްޓަރ މުހައްމަދު ޚުއްސާނެވެ. ފަހުމުނާމާގައި ސޮއިކުރުމަށް ޒޫމް މެދުވެރިކޮށް ބޭއްވި ރަސްމިއްޔާތުގައި ކެލާދާއިރާގެ މެމްބަރު ޢިބްރާހިމް ޝަރީފާއި ޓޫރިޒަމް މިނިސްޓަރ ޑރ. ޢަބްދުﷲ މަޢުޞޫމްް ވެސް ބައިވެރިވެވަޑައިގެންނެވި އެވެ.
ފަތުރުވެރިކަން ތަރައްޤީކުރުމަށްކުރެވޭ މަސައްކަތްތަކުގައި ކައުންސިލްގެ ބައިވެރިވުން އިތުރުކުރުމަކީ ސަރުކާރުން ވަރަށް ބޮޑު އަހަންމިއްޔަތުކަމެއްދޭ ކަމެއް ކަމަސް ޓޫރިޒަމް މިނިސްޓްރީން ފާހަގަކުރެއެވެ.
ފަތުރުވެރިކަމުގެ މަންފާ ސީދާ ރައްޔިތުންނަށް ހޯދައިދިނުމަށްޓަކައި މީހުން ދިރިއުޅޭ ރަށްރަށުގައި ފަތުރުވެރިކަން ތަރައްޤީކުރުމުގެ މަސައްކަތްތައް އިތުރަށް ފުޅާކުރުމަކީ ސަރުކާރުގެ ސިޔާސަތެކެވެ.
މިހާރު ޓޫރިޒަމް މިނިސްޓްރީއާއި ކައުންސިލްތަކާ ގުޅިގެން ފަތުރުވެރިކަމަށް ބިންދޫކުރުމުގެ ތަފާތު މަރުހަލާތަކުގައި މަސައްކަތް ކުރިއަށްދާ ކައުންސިލްތަކަކީ ކެލާގެ އިތުރުން އައްޑޫ ސިޓީ ކައުންސިލް، ގދ. ވާދޫ ކައުންސިލާއި ހއ. ހޯރަފުށީ ކައުންސިލެވެ.
