އެމެރިކާގެ ސެނެޓުގައި ބޭއްވުނު އިންޕީޗްމަންޓް ވޯޓުގައި، އެމެރިކާގެ ކުރީގެ ރައީސް ޑޮނަލްޑް ޓްރަމްޕް އިމްޕީޗް ކުރެވޭ ވަރަށް ވޯޓު ހަމަނުކުރެވި، ކުރެއްވެރި ނުވެ އޭނާ ސަލާމަތް ވެއްޖެއެވެ.
ފާއިތުވެދިޔަ ޖެނުއަރީ މަހުގެ 6 ވަނަ ދުވަހު ޓްރަމްޕަށް ތާއީދުކުރާ ފަރާތްތަކުން އެމެރިކާގެ ގާނޫނުޖަދާ މަޖިލިސް ކުރާގެ، ކެޕިޓަލްހިލް އަށްވަދެގަނެ، މީހުންނަށާއި އަދި ތަކެއްޗަށް ގެއްލުން ދީ އަދި 6 މީހަކު މަރުވެފައިވާ މަސައްލާގައި، މި ހަމަނުޖެހުންތަކަށް ޓްރަމްޕް ހިތްވަރު ދިންކަމަށް ތުހުމަތު ކޮށް މީގެ ކުރިން އެމެރިކާގެ ތިރިގެ، ހައުސް އޮފް ރެޕްރެސެންޓޭޓިވްސްއިން ވަނީ، ޓްރަމްޕްގެ މައްޗަށް އިތުބާރު ނެތްކަމަސް ނިންމާ، އޭނާ އިމްޕީޗްކޮށްފައެވެ.
އެހެންނަމަވެސް، އެމެރިކާގެ ގާނޫނު އަސާސީގައިވާގޮތުން، އެގައުމުގެ ރައީސެއްގެ މައްޗަށް، އަދި ކުރީގެ ރައީސެއްކަމުގައި ވިނަމަވެސް، އެއްވެސް ފިޔަވަޅެއް އެޅެން އަންނަނީ، އެގައުމުގެ ސެނެޓުގައި ޝަރީޢަތް ހިންގާ، އެ ބޭފުޅެއްގެ މައްޗަށް އިތިބާރު ނެތްތަކަށް ސެނެޓްގައި ނެގޭ ވޯޓުގެ މެޖޯރިޓީއިން ފިޔަވަޅު އެޅުމަށް ނިންމައިފި ނަމައެވެ.
އެެހެންނަމަވެސް، ފާއިތުވި 5 ދުވަހު ސެނެޓުގައި ބޭއްވުނު އިމްޕީޗްމަންޓުގެ ޝަރީއަތަށްފަހު، ނެގުނު ވޯޓުގައި ޓްރަމްޕް ކުއްވެރިވާކަމަށް 57 މެމްބަރުން ވޯޓު ދީފައިވާއިރު، ޓްރަމްޕް ކުއްވެރި ނުވާކަމަށް 43 މެމްނަރުން ވޯޓު ދީފައި ވެއެވެ. ޓްރަމްޕް ކުއްވެރިވާ ކަމަށް ފާސްކުރުމަށްޓަކާ ސެނެޓްގައި 67 މެމްބަރުންގެ ވޯޓު ހަމަވާން ޖެހެއެވެ.
އެހެންނަމަވެސް، ހައުސް އޮފް ރެޕްރެސެންޓޭޓިވްސްގައި ނެގުނު އިމްޕީޗްމަންޓް ވޯޓަށް އެއްމަސް ހަމަވިތަނާ ކަހަލަ ގޮތަކަށް ބޭއްވުނު މި ވޯޓުގައި، ޓްރަމްޕްގެ ލޯޔަރުން އުންމީދު ކުރިވަރަށްވުރެ ގިނަ ރިޕަބްލިކަނުން ޓްރަމްޕާ ދެކޮޅަށް ސެނެޓުގައި ވޯޓު ދީފައިވާކަން ފާހަގަ ކޮށްލެވެއެވެ. އަދި، ވި ވޯޓު ފާހަގަކުރެވިގެން ދިޔައީ، މީގެ އަހަރެއްކުރިން ސެނެޓުގައި ބޭއްވުނު ޓްރަމްޕްގެ އިމްޕީޗްމަންޓް ވޯޓާއި ޚިލާފަށް، ޓްރަމްޕް ނިސްބަތްވާ ޕާޓީގެ ގިނަ މެމްބަރުންނެއް، ޑިމޮކްރަޓިކް ޕާޓީއާއެކީ ޓްރަމްޕާ ދެކޮޅަށް ސެނެޓުގއި ވޯޓު ދިންފަހަރެއްގެ ގޮތުގައިވެސްމެއެވެ. ޓްރަމްޕްގެ ފުރަތަމަ އިމްޕީޗްމަންޓް ވޯޓުގައި އޭނާއާ ދެކޮޅަށް ވޯޓު ދީފައިވާ، ރިޕަބްލިކަން ޕާޓީއަށް ނިސްބަތްވާ ސެނެޓަރއަކީ، އުޓަރ ސްޓޭޓްގެ ސެނެޓަރ މިޓް ރޫނީ އެކަންޏެވެ.
ސެނެޓްގެ ޝަރީޢަތަށްފަހު ނެގުނު މި ވިވޯޓުގައި، ޓްރަމްޕް ކުއްވެރިވާ ކަމަށް ވޯޓުދިން، ރިޕަބްލިކަން ޕާޓީއަށް ނިސްބަތްވާ ސެނެޓަރުންނަކީ، ނޯތް ކެރޮލިނާގެ ސެނެޓަރ ރިޗަރޑް ބާރ، ލޮއިސިއާނާގެ ސެނެޓަރ ބިލް ކެސިޑީ، މައިން ސްޓޭޓްގެ ސެނެޓަރ ސޫސަން ކޮލިންސް، އަލަސްކާގެ ސެނެޓަރ ލިސާ މުރުކޮކްސީ، ނެބްރަސްކާ ސްޓޭޓްގެ ސެނެޓަރ ބެން ސެސީ، ޕެންސިލްވޭނިއާގެ ސެނެޓަރ ޕެޓް ޓޫމީގެ އިތުރުން މިޓް ރޫނީއެވެ.
މިވޯޓުގައި، އެންމެ ބޮޑު ހައިރާންކަމެއް ލިބިގެންދިޔަ ވޯޓަކީ، ނޯތް ކެރޮލިނާގެ ސެނެޓަރ ރިޗަރޑް ބާރ ޓްރަމްޕާ ދެކޮޅަށް ވޯޓު ދެއްވި ދެއްވުމެވެ. ސަބަބަކީ، އޭނާވަނީ، މީގެ ހަފްތާއެއްކުރިން، މި ވޯޓަކީ ގާނޫނު އަސާސީ އެއްގޮތަށް ބޭއްވޭ ވޯޓެއްތޯ ބެލުމަށް ނެގުނު ވޯޓުގައި، މިވޯޓަކީ އެމެރިކާގެ ގާނޫނު އަސާސީން ތަންދޭ ވޯޓެއް ނޫންކަމަށް ވޯޓު ދީފައެވެ.
އޭނާ ފަހުން ވިދާޅުވެފައިވަނީ، ފުރަތަމަ ވޯޓުގައި މިވޯޓު ގާނޫނު އަސާސީއާ ޚިލާފްކަމަށް އޭނާ ވޯޓު ދީފައިވި ނަމަވެސް، ޓްރަމްޕްގެ އިތުބާރު ނެތްކަމަށް އޭނާ ވޯޓު ދީފައިވަނީ، މިވޯޓު ކުރިޔަށް ގެންދެވޭނެކަމަށް ސެނެޓުން ނިންމާފައިވާތީއެވެ.
ޖެނުއަރީ 6 ވަނަދުވަހު، ޓްރަމްޕްގެ ސަޕޯޓާރުން އެމެރިކާގެ ގާނޫނު ހަދާ މަޖިލިސްތެރެއަށް ވަދެގަނެ، ދިން ހަމަކާތަކިގައި 6 މީހަކުވަނީ މަރުވެފައެވެ. އަދި ހަމަލާގެ ޒިންމާ ޓްރަމްޕް އުފުއްލަވަންޖެހޭނެ ކަމަށް ރިޕަބްލިކަން ޕާޓީގެ ގިނަ މެމްބަރުން ގަބޫލުކުރި ނަމަވެސް، ގިނަ މެމްބަރުން، މިވޯޓުގައި ޓްރަމްޕާ ދެކޮޅަށް ވޯޓު ދީފައި ނުވަނީ، މި ވޯޓުގެ ގާނޫނީ ސައްޙަކަމާމެދު އުފެދިގެން ގޮސްފައިވާ ސުވާލުތަކާ ހެދިއެވެ. ރިޕަބްލިކަން ޕާޓީގެ ގިނަ ސެނެޓަރުން ގަބޫލު ކުރާ ގޮތުގައި، މަގާމުން ވަކިވުމަށްފަހު، ކުރީގެ ރައީސަކު އިމްޕީޗްކުރުމަކީ، އެމެރިކާގެ ގާނޫނު އަސާސީން ފުރުސަތު ދޭކަމެއް ނޫނެވެ.
ސެނެޓްގެ މައިނޯރިޓީ ލީޑަރ، ރިޕަބްލިކަން ޕާޓީގެ މިޗް މެކާނެލް ވަނީ، ވޯޓަށްފަހުވެސް، ޓްރަމްޕްގެ އަމަލްތަކަށް ވަރަށް ބޮޑަށް ފާޑު ވިދާޅުވެ ވާހަކަ ދައްކަވާފައެވެ. އެހެންނަމަވެސް، އޭނާ ވިދާޅުވި ގޮތުގައި، ޓްރަމްޕް އިމްޕީޗްކުރުމާއި ދެކޮޅަށް އޭނާ ވޯޓު ދެއްވާފައިވަނީ، ކުރީގެ ރައީސަކު އިމްޕީޗް ކުރުމަކީ، އެމެރިކާގެ ގާނޫނު އަސާސީން ފުރުސަތުދޭ ކަމެއް ނޫންކަަށް އޭނާ ގަބޫލު ކުރައްވާތީއެވެ.
"ސެނެޓަރުންގެ މިއަދުގެ ނިންމުމުން، ޖެނުއަރީ 6 ވަނަ ދުވަހު ނުވަތަ އޭގެ ކުރިން ހިގައިދިޔަ ކަންކަން ކުއްވެރި ކުރުމަށް ކުރެވުނު އެއްވެސް ކަމެއް ނެތް،" މައިނޯރިޓީ ލީޑަރ މެކާނަލް ވިދާޅުވެފައި ވެއެވެ. "މި ވޯޓުން ދައްކުވައިދެނީ، ކުރީގެ ރައީސްވެސް ގާނޫނު ނަގަނަހައްޓަން ފެއިލް ވެގެންދިޔަ ފަދައިން، ގާނޫނު ނަގަހައްޓަން ސެނެޓަރުންވެސް ފެއިލް ވެގެންދިޔަތަން. އަހަރުމެން ހިމާޔަތް ކުރަން ޖެހެނީ ގާނޫނު އަސާސީ."
އެންމެ އިސް އިމްޕީޗްމަންޓް މެނޭޖަރ، ރިޕަބްލިކަން ޕާޓީގެ މެރިލޭންޑްގެ ސެނެޓަރ ޖެމީ ރަސްކިން ވަނީ މި ވޯޓަށް ތައުރީފް ކުރައްވާފައެވެ. އޭނާ ވިދާޅުވީ މިއީ އެމެރިކާގެ ތާރީޚުގައިވެސް، ދެޕާޓީން ސެނެޓުގައި ކުރިޔަށް ގެންދިޔަ ކުރިޔަށް ގެންދިޔަ އެންމެ ފުރިހަމަ ވޯޓު ކަމުގައެވެ.
"ހަގީގަތަކީ، މި ކޭސްގެ ހަގީގަތް ސެނެޓްގެ ބޮޑު މެޖޯރިޓީއެއް ގަބޫލު ކޮށްފައި ވާކަން،" އޭނާ ވިދާޅު ވެފައިވެއެވެ.
ޓްރަމްޕްގެ ލޯޔަރު މައިލަލް ވޭން ޑީ ވީން ވޯޓަށް ފަހު ވިދާޅުވެފައިވަނީ، މި ވޯޓަށްފަހު، އެމެރިކާގެ ކުރީގެ ރައީސްގެ ކުށެއް ނެތްކަން ސާބިތުވެގެން ހިގައްޖެ ކަމުގައެވެ.
"މިއަދަކީ ކޯޓުގައި ކުރީގެ ރައީސަށް އުފާވެރި ދުވަހެއް. މިއަދު ސާބިތުވެގެން މިދިޔައީ ކުރީގެ ރައީސަކީ ކުށެއްނެތް މީހެއްކަން،" ވޯޓަށްފަހު މައިކަލް ވޭން ޑީ ވީން ވިދާޅުވެފައި ވެއެވެ. "ޑިމޮކްރަޓުން ކުރީގެ ރައީސާ ދެކޮޅަށް ކުޅުނު ޗަރުކޭހުން އެމީހުން އެވަނީ ބަލިވެފަ، އެހެންކަމުން މިއަދު ރައީސް ޓްރަމްޕަށް ވަރަށް ބޮޑު ހިންހަމަޖެހުމެއް ލިބިގެން ދާނެ،" އޭނާ ވިދާޅުވެފައި ވެއެވެ.
އެމެރިކާގެ ސެނެޓްގައި ދެވަނަފަހަރަށް ޓްރަމްޕްގެ މައްޗަށް އިތުބާރު ނެތްކަމުގެ ވޯޓެއް ނެގިގެން ދިއުމާ ގުޅިގެން، ޓްރަމްޕް ވެގެންދާނީ އެމެރިކާގެ ތާރީޚުގައި ދެފަރަހަށް އިމްޕީޗަމަންޓް ވޯޓު ރައީސަކާ ދެކޮޅަށް ނެގިގެންދިޔަ ހަމައެކަނި ރައީސްކަމުގައެވެ.
