ރާއްޖޭގައި 2023 ވަނަ އަހަރު ބޭއްވުމުގެ ފުރުސަތު ލިބިފައިވާ އިންޑިއަން އޯޝަން އައިލޭންޑް ގޭމްސް (އައިއޯއައިޖީ) އާއި ގުޅޭގޮތުން ރާއްޖޭގެ ކުޅިވަރު އެސޯސިއޭޝަންތަކާއި ކުޅިވަރާބެހޭ ވަޒީރު އަހުމަދު މަހުލޫފު ބައްދަލުކުރައްވައިފި އެވެ.
ކުޅިވަރާ ބެހޭ ވުޒާރާއިން ބުނީ ބައްދަލުވުމުގައި މަޝްވަރާ ކުރެވިފައިވަނީ ކޯވިޑް-19 އާ ގުޅިގެން އައިއޯއައިޖީ ބޭއްވުމުގައި ކުރިއަށްދެވޭނެ ގޮތްތަކާ ބެހޭ ގޮތުން ކަމަށާއި، އެކަމަކު މި ބައްދަލުވުމުގައި ވަކި ކަމެއް ނިންމާފައިނުވާ ކަމަށެވެ.
Minister @AhmedMahloof met with senior officials from National Sporting Associations regarding the 2023 Indian Ocean Island Games. pic.twitter.com/zTdzdw4bgo
— Ministry of Youth,Sports and Community Empowerment (@MoYSCEmv) October 12, 2020
މީޑިއާގައި މީގެކުރިން ވާހަކަދައްކަވަމުން ކުޅިވަރާބެހޭ ވަޒީރު އަހުމަދު މަހުލޫފު ވިދާޅުވީ ރާއްޖޭގައި އައިއޯއައިޖީ ބޭއްވުމުގައި ދަތިތަކެއް އެބަހުރިކަމަށެވެ. އެއީ ކޯވިޑް-19 އާއި ގުޅިގެން ކުރަންޖެހޭ ހަރަދުތަކާއި ކުރަންޖެހޭ ކަންކަން ހުރުމުގެ ސަބަބުން ކަނޑައެޅިފައިވާ ޝެޑިއުލްއާއި އެއްގޮތަށް ކަންކަން ނުދާނެތީ ކަމަށް މަހުލޫފު ވިދާޅުވިއެވެ.
އަދިވެސް މަސައްކަތްކުރާނީ އެންމެ ފަހު ވަގުތާއި ޖެހެންދެންވެސް ގޭމްސް ރާއްޖޭގައި ބޭއްވޭތޯ ކަމަށާއި އަދިވެސް އުއްމީދު ގެއްލުވާނުލާ ކަމަށެވެ.
ރާއްޖެއަށް އައިއޯއައިޖީ ބޭއްވުމުގެ ފުރުސަތު ލިބިފައިވަނީ އެންމެފަހުން މޮރިޝަސްގައި ބޭއްވި މުބާރާތަށްފަހު މެމްބަރު ޤައުމުތަކުގެ ވޯޓާއެކުގައެވެ.
