2018 ވަނަ އަހަރު ފެބްރުއަރީ މަހު 24 ވަނަ ދުވަހު، ބަތަލާ ސްރީދޭވީގެ ކުއްލި ވަކިވުމާ ގުޅިގެން އެކަމުގެ ހިތްދަތިކަން ލިބުނީ އެ އާއިލާއަށް އެކަންޏެއްނޫނެވެ. ސްރީދޭވީ މަރުވިތާ 3 އަހަރުވެފައިވާއިރުވެސް، އޭނާގެ ފޭނުންދަނީ އަދިވެސް އޭނާގެ ވީޑިއޯތަކާއި ފޮޓޯތައް ހިއްސާކޮށް ހަނދާންއާކުރަމުންނެވެ.
ސްރީދޭވީގެ އަންހެންދަރިފުޅު ޖާންވީ ކަޕޫރު އޭނާގެ މަންމަ މަތިން އަދިވެސް ހަނދާންކުރާ ކަން މިވަނީ ދާދިފަހުން އާންމުވި ފޮޓޯތަކަކުން އެނގިފައެވެ.
ފިލްމު "ދަ ކާގިލް ގާލް" ގެ ތަރި ޖާންވީ ދާދިފަހުން އެއާޕޯޓުން ފެނުނު ފޮޓޯތައް އާންމުވީއިރު، އޭނާ ލައިގެންހުރީ ސްވެޓްޝާޓަކާއި ކަޅުކުލައިގެ ހަރުވާޅަކާއި އައިސް ނޫ ކުލައިގެ ސްޓޯލްއެކެވެ. ނަމަވެސް މި ފޮޓޯތަކުން އެންމެ ލޮލުގައި އަޅައިގަތީ ޖާންވީގެ ފޯނުގެ ވޯލްޕޭޕާއެވެ. ޖާންވީގެ ވޯލްޕޭޕާއަށް ލާފައިވަނީ ސްރީދޭވީ ރަންކުލައިގެ ސާރީއެއް އަޅައިގެން ހުރި ފޮޓޯއެކެވެ.
ޖާންވީ މިހާރު މަސައްކަތްކުރަމުން އަންނަނީ "ގުޑް ލަކް ޖެރީ" ގައެވެ. އަދި އޭނާގެ ކުރިއަށްހުރި ފިލްމް ތަކަށް ބަލާއިރުގައި ފިލްމު "ރޫހީ އަފްޒާނާ" ގައި ރާޖްކުމާރު ރާއޯ އާއެކު އަދި ކަރަން ޖޯހަރްގެ ޑުރާމާ "ތަހްތް" ގައި ރަންވީރު ސިންގް، ވިކީ ކޯޝަލް، ކަރީނާ ކަޕޫރު ޚާން، އާލިއާ ބަޓް، ބޫމީ ޕަޑްނޭކަރ އަދި އަނިލް ކަޕޫރާއެކުގައިވެސް ފެނިގެންދާނެއެވެ.
