ދިހަ ދުވަސް ވަންދެން ކޯވިޑް ބައްޔާއި ހަގުރާމަކުރުމަށްފަހު އެބަލިން ރަގަޅުވެ، އެމެރިކާގެ ރައީސް ޑޮނަލްޑް ޓްރަމްޕް ރިޔާސީ ކެމްޕެންގެ ހަރާކަތްތައް އަލުން ފައްޓަވައިފިއެވެ.
ބަލިން ރަގަޅުވުމަށްފަހު ފުރަތަމަފަހަރަށް ޓްރަމްޕް ބޭއްވި އެއްވުން ބާވާފައިވަނީ އެމެރިކާގެ ސްޓޭޓެއްކަމުގައިވާ ފްލޮރިޑާގެ ސެންފޯޑުގައެވެ. މިއެއްވުމުގައި ބައިވެރި މީހުންނާއި މުޚާތަބުކޮށް ޓްރަމްޕް ވިދާޅުވެފައިވަނީ ބަލީގެ އެއްވެސް އިހުސާސެއ މިހާރު އޭނާގެ ކިބައިގައި ނެތްކަމަށާއި ބޭނުންވަނީ އެއްވެ ތިބި މީހުންގެ ތެރޭގައި ހުންނެވުމަށް ކަމަށެވެ.
ކޯވިޑް ބަލިން ރަގަޅުވެ ޓްރަމް ކެމްޕެއިން ހަރަކާތްތަކަށް އެބުރި ވަޑައިގެންފައިވާއިރު، އެމެރިކާގަ ކުރިޔަށް އޮތް ރިޔާސީ އިންތިޚާބަށް ވަނީ 3 ހަފްތާއަށް ވެފައެވެ. ވޯޓުލާ ދުވަސް ގާތްވަމުން ދާއިރު މިހާރު ބޭއްވެމުންދާ ގިނަ ޚިޔާލު ހޯދުންތަކުން ޓްރަމްޕް އުޅެނީ ޑިމްކްރަޓިކް ޕާޓީގެ ކެނޑިޑޭޓް ޖޯބައިޑަންއަށްވުރެ ފަހަތުގައެވެ. އަދި މިކަމުގެ ކަންބޮޑުވުން ރިޕްލަން ޕާޓީގެ އިސްފަރާތަތަކުންވެސް ގެންދަނީ ފާޅުކުރަމުންނެވެ.
ފްލޮރިޑާރގައި ގަޑިއެއްހާ އިރަށް ދިގުމެދިގެންދިޔަ މި ކެމްޕެއިން އިވެންޓުގައި އާދައިގެމަތިން ޓްރަމްވަނީ އިދިކޮޅު ކެނޑިޑޭޓް ޖޯ ބައިޑަންއަށް ބަހުގެ ހަމަލާތައް ރައްދު ކުރައްވާފައެވެ. މިގޮތުން ޓްރަމްޕް ވިދާޅުވެފައިވަނީ ޖޯ ބައިޑްން މަސައްކަތް ކުރައްވަމުން ގެންދަވަނީ އިންތިޚާބުގެ ނަތީޖާ އޮޅުވާލުމަށެވެ. އަދި ވިދާޅުވީ ޖޯ ބައިޑްންއަކީ އެމެރިކާގެ މުޅި ތާރީޚުވެސް ދެކެފެފައިނުވާފަދަ ނާގާބިލް ރިޔާސީ ކެނޑިޑޭޓެއްކަމަށެވެ.
އެމެރިކާއަކީ ދުނިޔޭގައި ކޯވިޑްގެ ނުރައްކާތެރިކަން އެންމެ ބޮޑު އެއްގައުމެވެ. މިގައުމުގައި މިހާތަނަށް މިބަލީގައި 215000 މީހުން ވަނީ މަރުވެފައެވެ. އެމެރިކާގެ ރިޔާސީ އިންތިޚާބުގެ ދުވަސްވަރު ޚާއްސަކޮށް ޓްރަމްޕް ކެމްޕޭން ހަރަކާތްތައް ގިނަބަޔަކު އެއްކޮށްގެން ބާއްވަމުން ގެންދަވާތީ އެކަމުގެ ކަންބޮޑުވުން ކަމާއި ގުޅުން ހުރި އިދާރާތަކުންވެސް ގެންދަނީ ފާޅުކުރަމުންނެވެ. އަދި އެތައް ސަތޭކަ ބަޔަކު ސަލާމަތީ ފިޔަވަޅުތައް އެޅުމެއްނެތި ބައިވެރިވާ މިފަދަ ކޮންމެ އިވެންޓަކުން އެތައްބަޔަކަށް ބަލި ފެތުރިގެންދާނެ ކަމަށްވެސް ސިއްހީ މާހިރުން ގެންދަނީ ބުނަމުންނެވެ.
ކެމްޕެއިނަށް އަލުން ޓްރަމްޕް، ނިކުމެވަޑައިގެންފައި ވާއިރު، ރިޔާސީ ކެންޑިޑޭޓުންގެ މެދުގައި ބާއްވާ ރިޔާސީ ބަހުޘް އިންތިޒާމްކުރާ ފަރާތުންވަނީ ރިޔާސީ ބަހުސްގެ ދެވަނަ ބުރު ނުބާއްވާނެކަމަށް ރަސްމީކޮށް އިޢުލާނުކޮށްފައެވެ. އޮކްޓޯބަރު މަހުގެ 15ވަނަ ދުވަހު ބޭއްވުމަށް ތައްޔާރުވަމުންދިޔަ ރިޔާސީ ބަހުސްގެ ދެވަނަ ބުރު ރައީސް ޓްރަންޕަށް ކޯވިޑް-19 ޖެހުމުން އިންޓަނެޓު މެދުވެރިކޮށް ބޭއްވުމަށް އިންތިޒާމްކުރާ ފަރާތުން ނިންމުމުން ޓްރަންޕުވަނީ އެގޮތަށް ބަހުސްގައި ބައިވެރިވެވަޑައި ނުގަންނަވާނެކަމަށް ވިދާޅުވެފައެވެ.
