އިގިރޭސިވިލާތުގައި ކޮވިޑް19ގައި މަރުވި މީހުންގެ އަދަދު 100،000 އަަށް އަރައިފިއެވެ.
އިގިރޭސިވިލާތުގައި ކޯވިޑް19 ޖެހިގެން މަރުވި މީހުންގެ އަދަދު 100،000 އެރުމާއިއެކު އެގައުމު ވެގެން މިދިޔައީ ޔޫރަޕްގެ ގައުމުތަކުގައި ކޯވިޑް ބަލީގައި އެންމެ ގިނައަދަކަށް މީހުން މަރުވެފައިވާ ގަުމު ކަމުގައެވެ. އަދި އިގިރޭސިވިލާތް ހިމެނިގެން މިދިޔައީ މުޅި ދުނިޔޭގައި ކޯވިޑް19ގައި މަރުވި މީހުންގެ އަދަދު 100،000 އަށް އެރި5 ވަނަ ގައުމު ކަމުގައެވެ.
ދުނިޔޭގައި 100،000 އަށްވުރެ ގިނައިން ކޯވިޑް19 ގައިމި މީހުން މަރުވެފައިވަނީ، އެމެރިކާ، ބްލެޒިން، އިންޑިއާ އަދި މެކްސިކޯގައެވެ.
ފާއިތުވެދިޔަ މަސްތަކުގައި އިގިރޭސިވިލާތުގައި ވަނީ ކޯވިޑް19 އަށް ޕޮޒިޓިވްވާ މީހުންގެ އަދަދު އިންތިހާއަށް އިތުރުވާން ފަށާފައެވެ. އަދި ކޯވޮޑް19ގެ މުޅިން އާވައްތަރުތައް އެންމެ ފުރަތަމަ ފެނިފައިވަނީވެސް އިގިރޭސިވިލާތުންނެވެ.
މުޅި ދުނިޔޭގައިވެސް ބާރު މިނުގައި ފެތުރެމުންދާ ކޯވިޑް19ގައި މީހުން މަރުވަމުންދާ ނިސްބަތް އެންމެ މަތީ ގައުމަކީ އިގިރޭސިވިލާތްކަމަށް، ސިއްޙީ މިކާރިސާއާއި ގުޅޭ ރަސްމީ މައުލޫމާތު އާންމު ކުރަމުންދާ، އެމެރިކާ ޖޯން ހޮޕްކިންސް ޔުނިވާރސިޓީން އެންމެ ފަހުން އާންމުކޮށްފައިވާ ތަފާސް ހިސާބުތަކުންވެސް ވަނީ ދައްކާފައެވެ.
މި ޔުނިވަރސިޓީން އާންމު ކޮށްފައިވާ ހިސާބުތަކަށް ބަލާއިރު، ކޮންމެ 100،000 މީހުންގެ އާބާދީއަކަށް މީހުން މަރުވާ ނިސްބަތަށް ބަލާއިރު، މީހުން މަރުވާ ރޭޓް އެންމެ މަތީގައި އުޅެނީ އިގިރޭސިވިލާތުގައެވެ.
ކޯވިޑް19ގައި މީހުން މަރުވަމުންދާ ނިސްބަތް އެންމެ މަތީގައުމެއްގެ ގޮތުގައި އިގިރޭސިވިލާތް ފާހަގަ ކުރެވިފައިވާއިރު، އެގައުމުގައި މިހާތަނަށް މިބަލީގައި އެއްދުވަހެއްގައި އެންމެ ގިނަ އަދަދަކަށް މީހުން މަރުވެފައިވަނީ ފާއިތުވެދިޔަ ހަފްތާގެ ބުދަ ދުވަހުއެވެ. އެދުވަހު އެކަނިވެސް އިގިރޭސިވިލާތުގައި ކޯވިޑް19ގައި 1،820 މީހުން މަރުވެފައި ވެއެވެ. އަދި ފާއިތުވެދިޔަ 7 ދުވަހަށް ބަލާއިރު، އެވްރެޖްކޮށް ދުވާކަށް އިގިރޭސިވިލާތުގައި 1،240 މީހުން މިބަލީގައި ވަނީ މަރުވެފައެވެ.
ޖޯން ހޮޕްކިންސް ޔުނިވަރސިޓީން ހާމަކޮށްފައިވާ ގޮތުގައި، ކޯވިޑް19ގައި އެއްގައުމު އަނެއް ގައުމު އަޅާކިޔާފަ ނެރެމުންދާ ތަފާސްހިސާބުތަކުގައި ތަފާތުތަކެއް ހުރެދާނެއެވެ. ސަބަބަކީ، މިހިސާބުތައް ހަމައެކަނި ބިނާވެގެންދަނީ ގައުމުތަކުން ފޯރުކޮސްދޭ ރަސްމީ ހިސާބުތަކުގެ މައްޗަށް ކަމަށް ވާތީއެވެ.
އެހެންނަމަވެސް، 66 މިލިއަން މީހުންގެ އާބާދީއެއް އޮންނަ އިގިރޭސިވިލާތުގައި، ބޮލަކަށް ޖެހޭ ނިސްބަތުގެ، (ޕާ ކެޕިޓާ) ހިސާބުތަކަށް ބަލާއިރު، އެމެރިކާފަދަ، ކޯވިޑްގެ ހާލަތު އެންމެ ގޯސް ބައެއް ގައުމުތަކަށްވުރެ މީހުން މަރުވާ ނިސްބަތް އިގިރޭސިވިލާތުގައި އުޅެނީ މާމަތީގައެވެ.
ސިއްޙީ ކާރިސާ ފެށުނުފަހުން، އިގިރޭސިވިލާތުގައި މިހާތަނަށް މިބަލީގައި 96،166 މީހުންވަނީ މަރުވެފައެވެ.
ބޮލަކަށް ޖެހޭ ނިސްބަތުން (ޕާ ކެޕިޓާ) މީހުން މަރުވާ ނިސްބަތް އެންމެ މަތީ ގައުމުތައް
1. އިގިރޭސިވިލާތް: 142.53
2. ޗެޒް ރިޕަބްލިކް: 140.91
3. އިޓަލީ: 139.34
4. އެމެރިކާ: 125.35
5. ސްޕެއިން: 117.80
އިގިރޭސިވިލާތުގެ ބޮޑުވަޒީރު ބޮރިސް ޖޯންސަން ވިދާޅުވެފައިވަނީ، މިހާރު އަޅާފައި ހުރިފިޔަވަޅުތައް އާދައިގެ ހާލަތަކަށް އިއާދަކުރެވޭ ވަރަށްވުރެ، މީހުން މަރުވާ ނިސްބަތް އަދިވެސް އެގައުމުގައި އުޅެނީ މާމަތީގައެވެ.
އިގިރޭސިވިލާތުގައި ކޯވިޑް19ގައި މަރުވެފައިވާ މީހުންގެ ތެރެއިން 3/4 މީހުންނަކީ އުމުރުން 75 އަހަރުން މަތީގެ މީހުންނެވެ. އުމުރުން 45 އަހަރުން ދަށުގައި މީހުން މަރުވެފައިވާ ނިސްބަތް އުޅެނީ %1 ގައެވެ.
