ކުޅަދާނަ ކޮރެއޮގްރާފަރ ރެމޯ ޑިސޫޒާ، ޑަކްޓަރުންނާއެކު ނަށާ ވީޑިއޯއެއް ހިއްސާކޮށްފި އެވެ. މިދިޔަ ޑިސެމްބަރު މަހު ރެމޯ އަށް ހާޓް އެޓޭކްއެއް ޖެހިގެން ހޮސްޕިޓަލްގައި އެޑްމިޓްކޮށް ފަރުވާ ދީފައިވެ އެވެ.
ހޯމަ ދުވަހު ރެމޯ އޭނާގެ އިންސްޓަގްރާމްގައި ހިއްސާކުރި ވީޑިއޯގައި ފެނިގެންދަނީ އޭނާ ޕްރޮޑިއުސްކޮށްފައިވާ ފިލްމު "ސްޓްރީޓް ޑާންސާ 3ޑީ" ގެ "މުކާބަލާ" މިލަވައަށް 3 ޑަކްޓަރުންނާއެކު ނަށަނިކޮށެވެ. މި ވީޑިއޯ ހިއްސާކުރަމުން ރެމޯ ލިޔެފައިވަނީ ޑާންސަކީ އޭނާގެ ހިތްހަމަޖެހުންކަމަށާއި ހިތުގެ ދިރުންކަމަށެވެ. އަދި ޑަކްޓަރުންގެ ޓީމަށް ވަނީ ޝުކުރުވެސް އަދާކޮށްފަ އެވެ. މި ވީޑިއޯ ބޮޑަށް ލަފާކުރެވެނީ ރެމޯގެ ފިޒިއޮތެރަޕީ ސެޝަނެއްގެ ތެރެއިން ނަގާފައިވާ ވީޑިއޯއެއް ކަމަށެވެ.
View this post on Instagram
ޑިސެމްބަރު މަހު 11 ވަނަ ދުވަހު ކުއްލިގޮތަކަށް ހާޓްއެޓޭކެއް ޖެހިގެން ރެމޯ އެޑްމިޓްކޮށްފައިވަނީ މުމްބާއީގެ ކޮކިލާބެން ހޮސްޕިޓަލުގަ އެވެ. ރެމޯ ދިން އިންޓަވިއުއެއްގައި މިކަމާއި ބެހޭގޮތުން ވާހަކަ ދައްކަމުން ބުނެފައިވަނީ އޭނާގެ ހާލަތު ގޯސްވިއިރު ހުރީ ޖިމްގައި ކަމަށާއި ލިފްޓުން ތިރިއަށް ފޭބިއިރު ކެއްސާ ހޮޑުލަވާގޮތްވެފައި ހުރިކަމަށެވެ. އަދި އޭރު އަންހެނުން ލިޒެލް ރެމޯގެ އަތުގައި އޮތް ސްމާޓްގަޑިން ހާޓް ބީޓް ބެލިކަމަށާއި ހާޓް އެޓޭކް ޖެހިފައިވަނީ އޭނާގެ އަންހެނުނާއެކު ގެއަށް ދިޔަ މަގުމަތީގައިކަމަށެވެ. އެއަށްފަހު، ހޮސްޕިޓަލްއަށް ގެންދިއުމުން ކުޑަ ހާޓްއެޓޭކް އެއް ޖެހުނުކަމަށް ބުނިކަމަށެވެ.
އެއާއެކު ރެމޯ ބުނެފައިވަނީ އޭނާގެ ހާލު ދެރަވި ޚަބަރު ލިބުމުން ސަލްމާން ޚާން ހޮސްޕިޓަލަށް އައި ކަމަށާއި އަދި ޑަކްޓާރުންނާއި ވާހަކަ ދައްކާ ފަރުވާގެ ކަންކަން ދާގޮތް އޮޅުންފިލުވި ކަމަށެވެ. ރެމޯ ބުނެފައިވަނީ ސަލްމާނަކީ ޖަވާހިރެއް ކަމަށާއި އަބަދުވެސް އެހެން މީހުންނަށް އަޅާލާމީހެއް ކަމަށެވެ.
